१ युहनाल 5 - Muria Far Western

निमाट दुनियाता पोरो विजय आम्ट

¹ अनि बोर येसुन मसिहा इन्जोर विस्वास किन्तोर ओर परमेस्वरताल जनम आतोर, अनि बोरायि बाबोन मया किन्तोर ओर ओना मरिन वने मया किन्तोर।

² अनि बसके माक परमेस्वरदुन मया किन्तोरोम अनि ओना आग्यातुन मानेमान्तोरोम इदेनते माक परमेस्वरनोर बालक इन्जोर पुन्तोराट।

³ बाक्याकि परमेस्वरदुन मया कियाना मन्जे माक ओना आग्यातुन मानेमायाना इन्जोर मन्ता अनि ओना आग्या कटिन हिले।

⁴ बाक्याकि परमेस्वरताल जनम आतोर सबोय लोकुरक इद दुनियाता पोरो विजयि मन्तोरक। अनि दुनिया पोरो विजय पुटहान्ता ओद मावा विस्वासता द्वारा मन्ता।

⁵ येसु मसि परमेस्वरना मरि आन्दुर इदाम विस्वास किन्तोर ओरा सिवायि बोर इद दुनियाता पोरो विजयि आयवाल मन्तोर?

येसु मसिना बारेते गवाहि

⁶ अनि येसु मसि परमेस्वरना मरि इन्जोर एता बपतिस्मा अनि कुरुस पोरोता हायानाते प्रगट कितुर। केवल एता बपतिस्माता आयो मति कुरुस पोरोता हायानाते मन्ता।

⁷ अनि ओद गवाहि हिन्तोर ओर आत्मा आन्द बाक्याकि आत्मा खरोय मन्ता।

⁸ गवाहि हेवालोर मुवुर मन्तोर पवित्र आत्मा, येसुना बपतिस्मा अनि येसुना हायाना; अनि मुन्डास उन्दिय पोल्लोतिगा गवाहि हिन्तोरक।

⁹ बसके माक मानेयना गवाहि मानेमान्तोराट ते परमेस्वरना गवाहि अदेनताल वने हजोर मन्ता। परमेस्वरना गवाहि ओर आपुना मरिना बारेते गवाहिये मन्ता।

¹⁰ अनि परमेस्वरना मरिनिगा विस्वास किन्तोर ओर आपुना मन्दे ओद गवाहि मन्तोर। अनि परमेस्वरनिगा विस्वास केवोर ओर परमेस्वर आपुना मरिना बारेते हितोर ओद गवाहितिगा विस्वास केवोर इन्जोर परमेस्वरतुन खोटाल ठहरे किन्तोर।

¹¹ अनि परमेस्वर माकुन अनन्त जिवा हितोर अनि इद जिवा ओनोर मरिनिगा मन्ता इन्जोर ओद गवाहि मन्ता।

¹² बोना हेरे मरि मन्तोर ओना हेरे अनन्त जिवन मन्ता अनि बोना हेरे परमेस्वरनोर मरि हिलेर ओना हेरे अनन्त जिवन वने हिले।

अनन्त जिवन

¹³ परमेस्वरना मरिना पोरोयते विस्वास किन्तोरक मिकुन नना इव पोल्लोंग कोटान्तोना मिकुन अनन्त जिवन मन्ता ओद मिकुन पुन्दान साटि मन्ता।

¹⁴ अनि माक ओना इच्चा अनुसार बारायि तलकान्तोराट ते ओर मावा केन्जान्तोर इदाम मावा ओनासंग सोबाय संबन्द मन्ता इन्जोर ओना मुने माक हिमत मन्ता।

¹⁵ अनि बाताल आयि माक तलकान्तोराट ते ओर मावा प्रार्थना केन्जान्तोर इन्जोर माक पुन्तोराट ते बाताल आयि माक ओन तलकताट अद माकुन पुटता इन्जोर वने पुन्तोर।

¹⁶ अनि बोरायि आपुना तमोन पाप कियानपा हुळिर ओद पापता काया हायाना हिले ते ओना साटि विनन्ति किम्ट परमेस्वर ओन जिवा हियानुर। अनि बोर इदाम पाप कितोर अदेना काया हायाना हिले ओरा साटि विनन्ति किम्ट। अनि पाप इदाम वने मन्ता अदेना काया हायाना मन्ता इदेना बारेते नना विनन्ति कियान साटि इनोन।

¹⁷ अनि सबोय प्रकारता अदरम पाप मन्ता, मति इदाम पाप वने मन्ता अदेना काया हायाना हिले।

¹⁸ अनि बोरायि परमेस्वरताल जनम आतोर ओर पाप किसोर मनोर इन्जोर माक पुन्तोराट; मति बोर परमेस्वरताल जनम आतोर ओर आपुनातुन पिसिहिच इरान्तोर अनि सयतान ओन इटिला परोर।

¹⁹ अनि माक परमेस्वरताल मन्तोरोम इन्जोर माक पुन्तोराट, अनि सबोय दुनिया ओर सयताना अदिकारता अडिय मन्तोर।

²⁰ अनि परमेस्वरनोर मरि वातोर अनि ओर माकुन खरोय परमेस्वरतुन समजेह किस हितुर इन्जोर माक पुन्तोराट। अनि परमेस्वरनासंग मावा सोबाय संबन्द मन्ता बाक्याकि माक येसु मसिनिगा मन्तोरोम ओर खरोय परमेस्वर मन्तोर। अनि खरोय परमेस्वर अनि अनन्त जिवन ओरेय आन्दुर।

²¹ अनि हे बालक, मूरतिताल लक मन्जुन आपुनतुन पिसिहिच इराट।