१ युहनाल 4 - Muria Far Westernआत्मातांग परिक्षा किम्ट 1 हे प्रिया गोतियालोरक, पकाय खोटाल परमेस्वरना पोल्लो वेहवालोरक दुनियातिगा पसियतोर इन्जोर परमेस्वरना आत्माताल पुटतु इदाम वेहचुन बोरे करिहता बोदे पोल्लोतिगा सान्डेय विस्वास केमाट। मति पकाय ध्यान किस ओद करिहना परमेस्वरनिकेडाल मन्ता या हिले इन्जोर विचार किस समजेमायिला पहाजे। 2 परमेस्वरना आत्मातुन इद रितिते निमाट पुन्द परान्तोरिट: बोद आत्मा येसु मसि मेन्दुलतिगा आस वातोर इन्जोर स्विकार किन्तोर ओद आत्मा परमेस्वरनिकेडाल मन्तोर। 3 मति सबोय आत्मा येसु मसि परमेस्वरनिकेडाल मानेय आस वातोर इन्जोर स्विकार केवो अनि ओद ते मसिना विरोद केवालना आत्मा आन्दु। अनि ओर वायवाल मन्तोर इदाम निमाट केन्जतोरिट अनि इदेक वने ओर दुनियातिगा मन्तोर। 4 हे बालक, निमाट परमेस्वरनोर आन्दिट, अनि निमाट ओद दुश्मनिगा विजय आतोरिट बाक्याकि बोर मियागा मन्तोर ओर मसिना विरोद केवालताल हजोर मन्तोर। 5 अनि परमेस्वरना गिरदा केवोरक ओर लोकुरक बोद पोल्लो परमेस्वरना गिरदा आयो अद वळकान्तोर, अनि दुनियातोर लोकुरक ओरा पोल्लो केन्जान्तोरक। 6 अनि माक परमेस्वरनोर आन्दोम। अनि बोर परमेस्वरदुन पुन्तोर ओर मावा पोल्लो केन्जान्तोर अनि बोर परमेस्वरदुन पुनोर ओर मावा पोल्लो केन्जोर। अनि इदेनते खरोयता आत्मा बोद अनि दोखा हेवाल आत्मा बोद मन्ता इन्जोर माक पुन्तोम। परमेस्वर मया आन्दुर 7 हे प्रिय गोतियालोरक, माक आपसते मया इरिला पहाजे बाक्याकि मया परमेस्वरताल वान्ता। बोरायि मया किन्तोर ओर परमेस्वरनिकेडाल जन्मे मातोर अनि ओर परमेस्वरदुन पुन्तोर। 8 अनि बोर दुसरोन मया केवोर ओर परमेस्वरदुन पुनोर बाक्याकि परमेस्वर मया आन्दुर। 9 अनि परमेस्वर आपुनोर वरोरे मरिन माक ओना द्वारा जिवन पुटान साटि जागादिगा लोहतोर अनि इदेनते मावा साटि परमेस्वरना मया प्रगट आतु। 10 अनि माक परमेस्वरदुन मया केवोम मति ओर माकुन मया कितुर अनि मावा पापता प्रायश्चित साटि आपुनोर मरिन लोहतुर इदेनते ओर आपुना मया प्रगट कितुर। 11 हे प्रिय गोतियालोरक, परमेस्वर माकुन इदाम मया कितुर ते माक वने आपसते मया इरिला पहाजे। 12 परमेस्वरदुन बसकेय बोरायि हुळोर माक आपसते मया कियाकाट ते परमेस्वर मावासंग मन्तोर अनि ओना मया मावागा पुरा आतु। 13 अनि माक ओनासंग मन्तोरोम अनि ओर मावासंग मन्तोर इन्जोर ओर आपुना आत्मातुन माकुन हितोर इदेनतेय माक पुतोम। 14 अनि बाबो आपुनोर मरिन दरतिता लोकुरकुन पिसान साटि लोहतोर ओद हुळस माक गवाहि हिन्तोरोम। 15 अनि येसु परमेस्वरनोर मरि आन्दुर इन्जोर बोरे विस्वास किन्तोर ते परमेस्वर ओनागा मन्तोर अनि ओर परमेस्वरनिगा मन्तोर। 16 अनि इदाम परमेस्वर माकुन मया किन्तोर इन्जोर माक पुन्तोरोम अनि विस्वास किन्तोरोम। अनि परमेस्वर मया आन्दुर। अनि बोर दुसरो लोकुरकुन अनि परमेस्वरदुन मया किन्तोर ओर परमेस्वरनिगा मन्तोर अनि परमेस्वर ओनागाय मन्तोर। 17 अनि न्यायता दिया माकुन हिमत आयान साटि इदेनतेय मया मावागा पुरा आता बाक्याकि बदाम ओर मन्तोर अदामे दुनियातिगा माक वने मन्तोम। 18 अनि मयातिगा बाताले वरे हिले आस मन्ता। मति पुरा मया वरेतुन लक किस वाटान्ता बाक्याकि ओर माकुन दन्ड हियानुर इद मावा वरे मन्ता, अनि बोर वरयान्तोर ओर मयातिगा पुरा आयोर। 19 अनि ओर माकुन पहले मया कितुर इन्जोर माक ओन मया किन्तोराट। 20 अनि बोरायि इनिर, “नना परमेस्वरतुन मया किन्तोना,” मति ओर आपुनोर तमोन दुश्मन किन्तोर ते ओर खोटाल मन्तोर बाक्याकि कोन्डांग मुने मन्वाल तमोन ओर मया किया परोर ते दिसोर ओर परमेस्वरतुन बदाम मया किया परनुर। 21 अनि बोरायि परमेस्वरदुन मया किन्तोर ओर आपुना तमोन वने मया इरीर इन्जोर ओनाकेडाल माकुन आग्या पुटता मन्ता। |
© (Active) Wycliffe Bible Translators, Inc. All rights reserved.
Wycliffe Bible Translators, Inc.