१ युहनाल 3 - Muria Far Westernपरमेस्वरनोर मरि 1 हुळाट माक परमेस्वरनोर बालक इन्दान साटि मावोर परमेस्वर बाबो माकुन बचोन हजोर मया कितोर। अनि माट खरोय परमेस्वरनोर बालक मन्तोराट! अनि इद दुनिया येसु मसिन बोर आन्दुर इन्जोर पुनो, इन्जोर दुनिया माक वने बोर आन्दोम इन्जोर पुनो। 2 हे प्रियलोकुरक, इदेक माक परमेस्वरनोर बालक आन्दाट मति माक बाताल आयकाट इन्जोर इदेक वनाह प्रगट आयोय। अनि बसके येसु प्रगट आयनुर ओर बदाम मन्तोर अदामे माक हुळकाट इन्जोर माक ओना लेहका आयकाट इचोन पुन्तोराट। 3 अनि ओनागा इद आशा इरान्तोर ओर बदाम येसु पवित्र मन्तोर अदामे आपुना जिवनतुन पवित्र बनेकिन्तोर। 4 अनि बोरायि पाप किन्तोर ते ओर परमेस्वरना नियमता विरोद किन्तोर बाक्याकि पाप परमेस्वरना विरोद मन्ता। 5 अनि येसु पापता नाश कियान साटि प्रगट आतुर इन्जोर निमाट पुन्तोरिट। अनि येसुन बोदे पाप किपरोर। 6 अनि बोरायि ओनासंग मन्तोर ओर पाप किसोर मनोर अनि बोरायि पाप किसोर मन्तोर ओर ओन हुळोर अनि ओन पुनोर। 7 हे बालक, मिकुन बोने बहके कियानाता सन्दि हेमाट। अनि परमेस्वरना मुने खरोय पोल्लो किसोर मनकिट ते ओर येसु मसि बदाम परमेस्वरना मुने खरोय पोल्लो किसोर मतोर अदाम लेहका निमाट वने परमेस्वरना मुने खरोय पोल्लो किसोर मनकिट। 8 बोरायि पाप किन्तोर ओर सयतानोर बालक मन्तोर बाक्याकि सयतान मुनेटाले पाप किसोर मन्तोर। परमेस्वरनोर मरि सयताना बुतोता नाश कियान साटि प्रगट आतुर। 9 बोरायि परमेस्वरताल जन्मेमातोर ओर पाप केवोर बाक्याकि ओना विजा ओनासंग मन्ता; अनि ओर पाप कियाय परोर बाक्याकि परमेस्वरताल जनम आतोर। 10 अनि परमेस्वरनोर बालक अनि सयतानोर बालक बोर मन्तोर इन्जोर इदेनतेय पुन्तोर; बोरायि परमेस्वरना मुने येताना योग्य बुतो केवोर ओर परमेस्वरताल आयो अनि ओर आपुनोर तमोन मया केवोर। वरोर दुसरोनसंग मया किम्ट 11 अनि मुनेटाले निमाट केन्जता पोल्लो वरोर दुसरोन मया कियाना इन्जोर मन्ता। 12 अनि केयिन पोरोयतोर मानेय लेहका आयमाट, ओर सयतानोर मतोर अनि ओर आपुना तमोन हव्कतुर अनि ओर बाक्या ओन हव्कतुर? बाक्याकि ओर परमेस्वरना मुने खराब बुतो किसोर मतोर अनि ओनोर तमो परमेस्वरना मुने खरोय बुतो किसोर मतोर। 13 हे बायि-दादालोरक, इद दुनिया मिकुन विरुद किन्ता ते आश्चरय केमाट। 14 अनि माक हायानाताल पार आस जिवनते अवतोम इन्जोर तमोहकुन मया इरानाता कारण माक पुन्तोराट। अनि मया इरोर ओर हायानाता अदिकारता अडिय मन्तोर। 15 अनि आपुना तमोन दुश्मन किन्तोर ओर हव्कवाल मन्तोर अनि बोरायि हव्कवालनिगा अनन्त जिवन मनो आन्ता इन्जोर निमाट पुन्तोरिट। 16 अनि ओर मावा साटि आपुना जिवा हितुर इदेनतेय माक मया बाताल इन्जोर पुतोम। इन्जोर माक वने तमोन साटि आपुना जिवा हियाला पहाजे। 17 मति बोनाय हेरे दुनियाता धनसंपति मन्ता अनि ओर आपुना तमोन गरिब हुळस दया वायो ते ओनासंग परमेस्वरना मया बदाम मन्दार। 18 हे बालक, माक मया किन्तोरोम केवल इदाम वळकानाते आयो मति खरोय मदत किसुन मया कियाला पहाजे। निमाट परमेस्वरना मुने हिमतते मन्ट 19-20 अनि माक दुसरो लोकुरकुन मया कियाकाट ते माक खरोयतासंग मन्तोरोम इन्जोर माक पुन्तोरोम। मावा मन माकुन दोष लावेकियार ते वने परमेस्वर मावा मन्दाल हजोर मन्तोर अनि सबोय पोल्लोतुन पुन्तोर इन्जोर माक ओना मुने शान्तिते मनकाट। 21 हे प्रिय लोकुरक, मावा मन माकुन दोष लावेकेवो आयार ते माकुन परमेस्वरना मुने हिमत मन्ता। 22 अनि बारायि माक तलकान्तोराट ओद माकुन ओनाकेडाल पुटान्ता बाक्याकि माक ओना आग्यातुन मानेमान्तोराट अनि ओना गिरदाकियाना बुतो किन्तोरोम। 23 अनि माक ओनोर मरि येसु मसिना पोरोयतिगा विस्वास केविर इन्जोर ओना आग्या मन्ता अनि बदाम ओर माकुन आग्या हितोर अदेना अनुसार आपसते मया किम्ट। 24 अनि बोर परमेस्वरना आग्यातुन मानेमान्तोर ओर ओनासंग अनि ओर ओनासंग मन्तोर अनि येसु मसि मावासंग मन्तोर इन्जोर ओर माकुन हितुर ओर पवित्र आत्माताल माक पुन्तोराट। |
© (Active) Wycliffe Bible Translators, Inc. All rights reserved.
Wycliffe Bible Translators, Inc.