१ युहनाल 2 - Muria Far Westernमसि मावोर मदतकेवाल आन्दुर 1 हे नावोरक बालक, निमाट पाप केमाट इन्जोर साटि नना इव पोल्लोंग मिकुन कोटान्तोना। अनि बोरायि पाप केविर ते बाबोना हेरे मावा मदत साटि येसु मसि मन्तोर अनि ओर खरोय परमेस्वरना मुने येताना योग्य मन्तोर। 2 अनि ओरे मावोर पापता प्रायश्चित मन्तोर अनि केवल मावोर पापता साटि आयो मति सबोय लोकुरा पापता साटि ओर प्रायश्चित मन्तोर। 3 माक ओना आग्यातुन मानेमायकाट ते माक ओन पुतोम इन्जोर इदेनते माक जरुर पुन्काट। 4 अनि “नना ओन पुन्तोना” इन्जोर बोरायि इन्तोर अनि ओना आग्यातुन मानेमायोर ते ओर खोटाल मन्तोर, अनि ओनागा बाताले खरोय हिले। 5 मति बोरायि ओना पोल्लोता पालन कियानुर ते ओनागा परमेस्वरना मया खरोय पुरा आता। अनि माक ओनासंग संबन्दते मन्तोरोम इन्जोर इदेनते माक पुन्तोरोम। 6 नना ओनासंग मन्तोना इदाम बोरायि इन्तोर ते बदाम येसु ताकिन्दुर अदामे ओर वने ताकिला पहाजे। पुनाल आग्या 7 हे प्रिय गोतियालोरक, नना मिकुन बोदायि पुनाल आग्या कोटोन मति ओदे आग्या मुनेटाले मिकुन पुटता। इद जुनाल आग्या निमाट केन्जतोरिट ओदेय पोल्लो आन्दु। 8 ते वने नना मिकुन पुनाल आग्या कोटान्तोना अनि इदेना खरोय येसु मसिनिगा अनि मियागा मन्ता बाक्याकि बदाम आन्दार मायसोर दान्ता अदाम लेहका पाप अनि खरोयता बारेता अन्जान कम आसोर मन्ता अनि बदाम वेळिचि मान्जिला आता अदामे परमेस्वरना बारेता खरोय मान्जिला आता। 9 अनि नना वेळिचितिगा मन्तोना इन्जोर बोरायि इन्तोर मति आपुना तमोनसंग दुश्मनि किन्तोर ओर इदेकवनाह आन्दारतेय मन्तोर। 10 बोरायि आपुना तमोन मया किन्तोर ते ओर वेळिचितिगा मन्तोर अनि ओर आपुना तमोन पाप कियाना साटि कारण आयोर। 11 मति बोरायि आपुना तमोन दुश्मनि किन्तोर ओर खरोयता बारेता अन्जानतिगा मन्तोर अनि ओद अन्जानतिगा ताकान्तोर अनि ओर बगा दान्तोर इन्जोर पुनोर बाक्याकि बदाम आन्दार वरोर मानेयना कोन्डाहकुन आन्दळाह बनेहकिता अदामे खरोयता बारेता अन्जान खरोयतुन समजेमायान साटि विरोद किन्ता। 12 हे बालक, येसुना अदिकारते अनि येसु मावा साटि किता बुतोता द्वारा मियांग पाप मापि आतांग इन्जोर नना मिकुन कोटान्तोना। 13 हे बाबो लोकुरक, येसु मुनेटाले मन्तोर, निमाट ओन पुन्तोरिट इन्जोर नना मिकुन कोटान्तोना। अनि हे लयोरक, निमाट ओर दुष्ट बुतो केवालनिगा विजय आतोरिट इन्जोर नना मिकुन कोटान्तोना। हे बालक, निमाट बाबोन पुतोरिट इन्जोर नना मिकुन कोटतोना। 14 हे बाबो लोकुरक, येसु मसि मुनेटाल मन्तोर ओन निमाट पुतोरिट इन्जोर नना मिकुन साटि कोटतोना। हे लयोरक, निमाट लाववाले मन्तोरिट अनि परमेस्वरना पोल्लो मियासंग मन्ता अनि निमाट ओद दुष्ट बुतो केवालनिगा विजय आतोरिट इन्जोर नना मिकुन कोटतोना। निमाट दुनियातुन मया केमाट 15 निमाट दुनिया अनि दुनियाता बोदे चिजतुन मया केमाट। बोरायि दुनियातुन मया किन्तोर ते ओनागा बाबोना मया हिले। 16 बाक्याकि दुनियाता बोदायि खराब इच्चा अनि कोन्डाना इच्चा अनि जिवाता घमन्ड ओद बाबो परमेस्वरनिकेडाल आयो मति दुनियाताल मन्ता। 17 दुनिया अनि अदेना इच्चा रन्डास मायसोर दानतांग मति बोर परमेस्वरना इच्चा किन्तोर ओर दरोज मन्दानुर। मसिना-विरोदकेवाल 18 हे बालक, इद दुनियाता नाश आयानाता आकरि बेरा मन्ता! अनि मसिना विरोदि वायवाल मन्तोर इन्जोर निमाट केन्जतोरिट अनि अदेना अनुसार इदेक वने पकाय मसिना विरोद केवालोरक तेदीतोरक अनि इदेनते इद दुनियाता आकिरता बेरा आन्दु इन्जोर माक पुन्तोरोम। 19 ओर लोकुरक मावोर मसिलोकुरा सभातिगाडाले पसियतोरक मति ओरक खरोय विस्वासि लोकुरक आयोरक बाक्याकि ओर लोकुरक मावागाडाल मन्ज मनेर ते मावासंग मनेर। मति ओर लोकुरक इदाम पसियस हतुर इन्जोर ओर सबोयलोरक खरोय विस्वासि लोकुरक आयोर इदाम प्रगट आन्ता। 20 मति पवित्र आत्मा मियागा मन्तोर अनि ओना मदतते मिकुन सबोय समजेमायार। 21 अनि निमाट खरोयतुन पुनविट इदाम आयो मति खोटाल खरोयताल वायो इदाम निमाट खरोय पुन्तोरिट इन्जोर नना मिकुन इद पोल्लो कोटान्तोनान। 22 खोटाल बोर मन्तोर? बोर येसुन खरोय मसि आयोर इन्जोर इन्कार किन्तोर ओर खोटाल आन्दुर। अनि परमेस्वर बाबोन अनि ओनोर मरिना इन्कार किन्तोर ओर मानेय मसिना विरोद केवाल मन्तोर। 23 अनि बोरायि मरिना इन्कार किन्तोर ते ओना हेरे परमेस्वर बाबो हिलेर। अनि बोर ओनोर मरि येसु मसिन मानेमान्तोर ओना हेरे परमेस्वर बाबो वने मन्तोर। 24 अनि निमाट बारायि मुनेटाले करिहतोरिट ओदे पोल्लो मियासंग मनि। बारायि निमाट मुनेटाल करियितोरिट ओद मियासंग मनि ते निमाट वने मरिनिगा अनि परमेस्वर बाबोनिगा मनकिट। 25 अनि ओर येसु मसि माकुन हिता वाचा अनन्ता जिवन आन्दु। 26 अनि बोर मिकुन बहके किन्तोर ओरा कारणते नना इव पोल्लोंग मिकुन कोटान्तोनान। 27 मति येसु मसि मिकुन हिता ओर पवित्र आत्मा मियासंग मन्दार। अनि ओर पवित्र आत्मा मिकुन सबोय पोल्लोंग करहान्तोर इन्जोर मिकुन बोरायि बाताले करिहानाता जरुरि हिले। अनि पवित्र आत्मा मिकुन करहिता ओद पोल्लो खोटाल आयो मति खरोय मन्ता इन्जोर बदाम ओर मिकुन करहीतोर अदामे निमाट ओनासंग मन्ट। 28 इन्जोर हे बालक, बसके ओर प्रगट आयनुर असके माक हिमत आयि ओना मुने लज्जा आयमाकि इन्जोर येसुनासंग मन्ट। 29 निमाट येसु परमेस्वरना मुने येताना योगय मन्तोर इन्जोर पुन्तोरिट ते बोरायि परमेस्वरना मुने येताना योगय बुतो किन्तोरक ओरक वने ओनाकेडाल जनम आतोर इन्जोर वने पुन्तोरिट। |
© (Active) Wycliffe Bible Translators, Inc. All rights reserved.
Wycliffe Bible Translators, Inc.