१ कुरिन्थुस 9 - Muria Far Western

येसुना खास चेला लोकुरा अदिकार

¹ नावा गिरदाता पोल्लोंग कियाना साटि नना स्वतन्त्र मन्तोना बहे? नना येसुना खास चेला मन्तोना बहे? अनि नना मावोर प्रबु येसुन खरोय हुळतोना। नना प्रबुना बुतो कियानाता कारण निमाट ओनिगा विस्वास कितिट इन्जोर निमाट नावोर ओद बुतोता कायांग मन्तोरिट।

² नना येसुना खास चेला आयो इदाम दुसरो लोकुरक विचार किन्तोरक मति नना येसुना खास चेला मन्तोना इदाम निमाट मानेमान्तोरिट। निमाट प्रबुना विस्वासतिगा पका मन्तोरक ओदेनते नना प्रबु येसुना खास चेला मन्तोना इन्जोर खरोय तोहान्ता।

³ “नना येसुना खास चेला आन्दान बहे”? इदाम परिक्षा किस प्रश्न पुच्चेमायवालोर लोकुरकुन नावा उत्तर इद मन्ता:

⁴ प्रबु येसुना बुतो कियान बेरा नना पोलुस अनि बरनाबासिन वने तिन्दाना उन्डाना चिज पुटाना अदिकार मन्ता,

⁵ पिसतोर येसुना विशेषाल चेला लोकुरक अनि प्रबुनोर तमोह अनि पतरस वने किन्दुर अदामे माक इवुरासिन वने मसिना सोबाता पोल्लो वेहान साटि विस्वासि मुतेनासंग हिके होके हन्दाना अदिकार मन्ता।

⁶ केवल माक इवुरास पोटासाटि बुतो कियाकोम बहे?

⁷ बोरे सयनिक आपुना डबुते सयनिक सेवा कियानुर बहे? अंगुरता बगिचा लावेकेवाल मानेय अदेना कायांग तिन्दानुरे। हरेनुंग मेहवाल मानेय अवेहना पाल उन्डानुरे।

⁸ नना इद पोल्लो मानेयना विचारताल वेहोन। मूसाना नियम वने अदामे इन्ता।

⁹ “विसान साटि कोन्दानुंग तिरहान बेरा कोन्दाना टोडितुन मुसका दोहाना आयो” इन्जोर मूसाना नियमतिगा इदाम कोटता मन्ता बहे? बाताल परमेस्वर केवल कोन्दा साटिय चिन्ता किन्तोर बहे? या विशेषाल माकुन साटि वने चिन्ता किन्तोर बहे?

¹⁰ इंगो! खरोय इद पोल्लो माकुन साटि कोटतोर। बाक्याकि डन्डतिगा नांगेल पुहवाल मानेय अनि वन्जिंग विसवाल मानेय आपुना हिसा पुटान साटि आशाते बुतो किन्तोर।

¹¹ माक इवुरास मिया साटि परमेस्वरना सोबाता पोल्लो वेहतोम अनि अदेन निमाट स्विकार कितोरिट। ओद बुतो माक मियागा किता आत्मिक पोल्लोता विजा वीताना लेहका मता। पजा माकुन तिन्दाना उन्डाना लेहका मन्ता मावा जरुरतुन मियागडाल येतानाता अदिकार हिले बहे? इद माक किता बुतोता फसलतुन कोयाना लेहका मन्ता।

¹² दुसरो लोकुरक मियाताल तिन्दाना उन्दाना लेहका मन्ता जरुर पोल्लोंग पुटहान साटि लायक मन्तोर ते माक ओराताल वने लायक हिलेम बहे? मति माक इवुरास इद अदिकारता उपयोग केवोम अनि मसिना सोबाता पोल्लो वेहाना बेरा अदेन बोदे बन्दन केमाकिर इन्जोर माक इवुरास सबोय सहेन किसोर मतोम।

¹³ बोरे मन्दिरता बुतो किन्तोरक ओरक मन्दिरतुन पुटता चिजताल आपुना पोटा निहान्तोरक अनि बोर वेदिता सेवा किन्तोरक ओरकुन वेदितुन हिता चिजताल हिसा पुटान्ता इन्जोर निमाट पुन्तोरिट बहे?

¹⁴ अदामे परमेस्वरना सोबाता पोल्लो वेहान्तोरक, सोबाता पोल्लो वेहाना आपुना बुतोता द्वारा पुटान्ता मदतते ओरा तिन्दाना उन्डाना आयिला पहाजे इन्जोर प्रबु वने लोकुरक साटि आग्या हितोर।

¹⁵ मति नना इद सबोय अदिकारता पोल्लोता उन्दिगला पोल्लोतुन उपयोग केवोन। नाकुन मियागडाल बाताले पुटार इन्जोर नना इद कोटोन। नावा हजोरपण इद मन्ता: मसिना सोबाता पोल्लो वेहानपा नावा तिन्दाना उन्डाना साटि मियागडाल बाताले येतवाय मसिना सोबाता पोल्लोतुन वेहिला आतोना। नावा हजोरपण कियानाता ओद पोल्लोताल नाकुन बोरे पिसहानुर ते नाकुन हायाना सोबाय मन्ता।

¹⁶ नना सोबाता पोल्लो वेहान्तोना इन्जोर अदेना हजोरपण किया परोन। बाक्याकि नाकुन इद सोबाता पोल्लो वेहाना जवाबदारि मन्ता इन्जोर इद नना वेहिला पहाजे। मति नना सोबाता पोल्लोतुन वेहोन आयिका ते नना बचोन हजोर दन्डता योग्य आयका!

¹⁷ इद सोबाता पोल्लोतुन वेहाना बुतो आपुना इच्चाते किन्तोना ते नाकुन रोजि पुटार। इद नावा इच्चाते आयो मति मसिना सोबाता पोल्लो वेहाना बुतो नाकुन सोपे कितुर इन्जोर नना इद बुतो किन्तोना।

¹⁸ ते पजा नावा रोजि बाताल मन्ता? अनि सोबाता पोल्लोतुन प्रचार केवालना अदिकारते नाकुन पुटाना मता ओद हक्क बोरे विस्वासि लोकुराताल नना तलकोन अनि बोनाय कयते बाताले येतवाय मसिना सोबाता पोल्लोतुन फुकोटते नना वळकतान ओद नावा रोजि मन्ता।

¹⁹ इदाम नना केवल स्वतन्त्र मानेय मन्तोना, बोनाय गुलाम हिलेन ते वने पकाय लोकुरकुन परमेस्वरना हेरे विस्वासते ततका इन्जोर नना आपुनतुन सबोय लोकुरा गुलाम बनेकितान।

²⁰ नना यहुदिलोकुरकुन परमेस्वरना हेरे ततान साटि यहुदिलोकुरक साटि वरोर यहुदि मानेय लेहका बनेमातान। अनि मूसाना नियमतुन मानेमान्तोर लोकुरकुन परमेस्वरनिके ततका इन्जोर नना मूसाना नियमता गुलामते हिलेन ते वने नना मूसान नियमतुन मानेमायवाल लेहका अदेना कबजाते मतान।

²¹ मूसाना नियमतुन मानेमायोर यहुदि आयोर लोकुरकुन परमेस्वरना हेरे ततका इन्जोर नना मूसाना नियमतुन मानेमायोर यहुदि आयोर मानेय लेहका बनेमातान। नना परमेस्वरना आग्यातुन मानेमायोन इदाम आयो मति मसिना आग्यातुन मानेमान्तोना।

²² मसिना विस्वासते कमजोर लोकुरकुन पिसहान साटि ओरा विस्वासता कमजोरतिगा नना संगत बनेमातान। अनि बोदे रितिते हुचुलोर लोकुरकुन परमेस्वरना हेरे ततान साटि ओरासंग सोबाय संबन्द बनेकिस सबोय लोकुरक साटि सबोय बुतो कियालातान।

²³ इव सबोय पोल्लोंग नना येसु सोबाता पोल्लोतुन वेहान साटि किन्तोना। सोबाता पोल्लोतिगा बोद आशिष मन्ता ओद दुसरो लोकुरासंग नाकुन वने पुटार इन्जोर नना किन्तोना।

²⁴ वितना करसानातिगा जिकान साटि पकाय लोकुरक हिसा येतान्तोरक। मति बकसिस वरोनेय पुटान्ता इन्जोर निमाट पुनविट बहे? इन्जोर निमाट वने हजोर बकसिस साटि विताट।

²⁵ अनि वरोर वरोर कुस्टि करसवाल मानेय ओद करसनाता नियमता अनुसार पकाय ध्यानते तयार आन्तोर। ओर कुस्टि करसवाल नाश आस मारिन्ता ओद मुकुटता बकसिस मन्ता ओद बकसिस साटि सबोय किन्तोर मति माक दरोज मन्वाल बकसिसता मुकुट साटि सबोय किन्तोरोम।

²⁶ इन्जोर नना बिना लक्षते वितोन। बोदे लक्ष हिले इदाम आपुना कयदे वळियतिगा हेवाल कुस्टि करसवाल मानेयना लेहका नना लळायि केवोन मन्जे नना बेकारते बोदे बुतो केवोन।

²⁷ मति नना दुसरो लोकुरकुन सोबाता पोल्लो वेहतान पजा नाकुन पुटिला पहाजे ओद बकसिस नाकुन नष्ट आयमाकि इन्जोर नना नावा मेन्दुलतुन कबजा किस अदेन दास बनेहकिन्तोना।