१ कुरिन्थुस 8 - Muria Far Western

मूरतिता मुने बलि हिता जेवनता बारेते पोलुसना सल्ला

¹ मूरतिता मुने बलि हिता जेवनता बारेते निमाट पत्रतिगा कोटस नाकुन पुच्चेमाता ओद प्रश्नता बारेते वने नना इदेक उत्तर हियाका: इंगो, इदेना बारेते “माक सबोय लोकुरकुन ग्यान मन्ता” इन्जोर माक वळकिलातरोम। मति ग्यानते लोकुरक आपुनतुन हजोर किन्तोर इन्जोर आलहाट। मति मया दुसरो लोकुरकुन बरसिला मदत किन्ता।

² अनि नना सबोय पुन्तोना इदाम बोरे वळकान्तोर ते ओर बाताल बाताल पुन्दिलाय पहाजे अदेन इदेकवनाह पुनोर।

³ मति बोरे मानेय परमेस्वरतुन मया किन्तोर ते ओन परमेस्वर पुतोर।

⁴ इन्जोर मूरतिता मुने बलि हिता जेवनतुन तिन्दाना बारेते: “मूरति खरोय दुनियातिगा परमेस्वर आयो अनि परमेस्वर वरोरे मन्तोर” इन्जोर माक सबोय लोकुरक पुन्तोरोम।

⁵ अनि आबारतिगा अनि दरतितिगा पकाय “पेनक” अनि “प्रबु” मन्तोर इदाम इन्वालोर पेनक पकाय मन्तांग मति खरोय इव सबोय परमेस्वरेय आयो।

⁶ मति माकुन वरोरे परमेस्वर मन्तोर, ओरे मावोर बाबो मन्तोर, अनि ओरे सबोय चिज बनेकितोर अनि माक ओना साटि जिवेमायिला पहाजे। अनि माकुन वरोरे प्रबु मन्तोर ओर येसु मसि आन्दुर। अनि ओरे सबोय चिज बनेकितोर अनि माक वने ओनाय कारणते जिवित मन्तोरोम।

⁷ मति सबोय मसिलोकुरकुन इद ग्यान हिले। ओरक मूरतिता हेरे इदेक वने हन्दुरक ओद कारणते ओरक मूरति उन्दि जितो मन्ता इदाम बेकार विचार किन्तोरक। इन्जोर ओरक मूरतिता मुने बलि हिता चिजतुन इद चिज मूरतिता आन्दु इदाम मानेमास तिन्दुरक। ओरा सोबाय अनि खराब पुन्दानाता अन्तकरण कमजोर मन्ता इन्जोर ओद मूरतिता मुने बलि हिता तिन्दाना चिजतुन तिन्दानाते माक अशुद्ध आतोम इदाम ओरक समजेमान्तोरक।

⁸ मति जेवन माकुन परमेस्वरना हेरे ओयो अनि माक तिनवेक ते वने माकुन बोदे नुकसान आयो अनि तितेक वने माक बोदे फायदा आयो।

⁹ इदाम सबोय पोल्लोंग निमाट पुन्तोरिट। अनि मूरतिना मुने बलि हिता चिज ओरा मन्डिलितिगा हन्जुन तिन्दाना मिया ओद स्वतन्त्र विस्वासते कमजोर मन्तोर मसि विस्वासि लोकुरकुन पापतिगा अरानाता कारण आयार इन्जोर हुशियार मन्ट।

¹⁰ बाक्याकि “इद पोल्लोता बारेते सबोय पोल्लोंग पुन्तोर” निमा ओरा मन्दिरतिगा हन्जुन मूरतिता मुने बलि हिता चिज तिन्दानपा सोबाय या खराबतुन पुन्दाना साटि विस्वासते पका हिलेर वरोर मानेय ओद हुळतुर ते ओना कमजोर मन “निमा किता ओद पोल्लो खराब मन्ता इदाम इन्दानुर।” मति निकुन हुळस ओना कमजोर मन्दा ओद पोल्लोतुन केन्जोर आस ओर मूरतिता मुने बलि हिता ओद चिजतुन तिन्दान साटि हिमत किन्तोरक।

¹¹ इदाम निया “सबोय पुन्तोना” ओद ग्यानता कारणते बोना साटि मसि हातुर ओर विस्वासते पका हिलेर निया तमो पापतिगा अरस नाश आयनुर।

¹² इदाम मसिनिगा विस्वास कितोर ओर तमोना विरोदते निमाट पाप किन्तोरिट अनि विस्वासते पका हिलेरे ओना मन्दुन दुःख हियानपा निमाट मसिना विरोदते पाप किन्तोरिट।

¹³ इन्जोर इद बलि हिता चिज तितेक मसिनिगा विस्वास कितोर नावोर तमोन दुःख आन्ता अनि इदेनते ओन पाप किन्तोर। नावोर तमो पापतिगा अरमाकिर इन्जोर नना मूरतिता मुने बलि हिता हविंग बसकेय तिनोन।