१ कुरिन्थुस 6 - Muria Far Westernमसिलोकुरा नडुमता वाहचानातुन मिलेह कियानाता बारेते 1 मियागडाल बोरे वरोर दुसरो विस्वासिनसंग वाहचाना आतेक ओद वाहचानाता मिले कियाना साटि परमेस्वरना पवित्र लोकुरा हेरे हन्दाना बदला बाक्या निमाट अविस्वासि लोकुरा हेरे दान्तोरिट? 2 पवित्र लोकुरक इद दुनियाता न्याय कियानुरक इन्जोर निमाट पुनविट बहे? दुनियाता लोकुरा न्याय कियाकिट ते निमाट विस्वासि लोकुरा हुडिला हुडिला पोल्लोता न्याय किया परविट बहे? 3 माक स्वरगदूतकना न्याय कियाकाट इदाम निमाट पुनविट बहे? पजा दुनियाता पोल्लोता न्याय पकाय कियाला परवि आयकिट बहे? 4 ते मिया वाहचनातुन मिले कियान साटि निमाट मसिलोकुरा सभातुन मानेमायोर लोकुरा हेरे बाक्या दाकिट? 5 नना मिकुन लज्जा आयान साटि इदाम पुच्चेमान्तोना; निमाट विस्वासि लोकुरा वाहचानातुन मिलेहकियान साटि मियागा बाताल वरोर वने बुद्धिवाले हिलेर बहे? 6 मति वरोर विस्वासि दुसरो विस्वासिना विरोदते दोष लावे किस कोरटतिगा दानतोरिट, अनि ओद वने अविस्वासि लोकुरा मुने कियाला आतोरिट ते ओद बचोन खराब मन्ता! 7 निमाट विस्वासि लोकुरक वरोन दुसरोनसंग वाहचान्तोरिट ते निमाट खरोय मसि विस्वासि आयो। मिया विरोदते बोरे मानेय गुना किन्तोर ते ओद सहेन कियाना अनि मिया बोदे चिज बोरे मानेय ओन्तोर ते बाक्या अदेन ओयिला हेविट? 8 मति इदाम सहेन कियानाता बदला निमाटे ते आपुना विस्वासि लोकुरासंग खराब बुतो कियाला आतोरिट अनि दोखा हियाला आतोरिट। 9 खराब बुतो केवालोर परमेस्वरना राज्यता वारिस आयोर इन्जोर निमाट पुनविट बहे? आपुनतुन दोखा आयाना आयो। वेश्या बुतो केवालोर, मूरति पुजा केवालोर, दुसरो आळदासंग हुन्जवालोर, वेश्यामानेय, मानेय मानेयनासंग व्यभिचार केवाल, 10 कलेरक, लालचि, दाळंगो उन्वालोरक, वाहचवालोरक, दोखा हेवालोरक इदाम लोकुरक परमेस्वरना राज्यता वारिस आयोर आयनुर। 11 मियागा हुचुलोर लोकुरक मुने इदामे पाप केवालोरक मतोरक मति प्रबु येसु मसिना कारण मावोर परमेस्वरना आत्मा मिया पापतुन नोरस पवित्र बनेकिस परमेस्वरना येताना योग्य ठहरे कितुर। माक आपुना मेन्दुलतुन परमेस्वरना हजोरपण साटि सोपे किम्ट 12 परमेस्वर नाकुन “बाताल आयि कियान साटि परवांगि हितोर” इन्जोर हुचुलोर लोकुरक वळकान्तोरक। मति सबोय पोल्लोंग मिकुन कियाना सोबाय हिलेंग इन्जोर नना इन्तोना। अनि “सबोय चिज नावा साटि सोबाय मन्ता” इदाम हुचुलोर लोकुरक वळकान्तोरक। मति नना बोदेवने खराब पोल्लोता गुलामते मनोन इन्जोर वेहान्तोना। 13 अनि बोरे इतोरक: “जेवन पोटासाटि मन्ता अनि पोटा जेवन साटि आचता मन्ता।” परमेस्वर इद रन्डास चिजकुन नाश कियानुर। मति मेन्दुल व्यभिचार साटि बनेकेवोर मति मिया मेन्दुल प्रबुन साटि मन्ता अनि प्रबु मावा मेन्दुलता काळजि किन्तोर। 14 अनि परमेस्वर आपुना लावदे मावोर प्रबुन हातोरिगाडाल असा जिवेहकितुर अदामे ओर माकुन वने जिवेहकियानुर। 15 मिया मेन्दुल मसिना मेन्दुलता उन्दि भाग मन्ता इन्जोर निमाट पुन्तोरिट ते पजा नना मसिना मेन्दुलता भाग पयस बाताल अदेन व्यभिचारि आळदासंग मिलेकिस अदेना मेन्दुलता भाग बनेकियाका बहे? बसकेन आयो! 16 बोरे व्यभिचारि आळदासंग मिलेमान्तोर ते ओर अदेनासंग उन्दि मेन्दुल आयनुर इन्जोर निमाट पुनविट बहे? बाक्याकि “ओर इवुरास उन्दि मेन्दुल आयनुरक” इन्जोर पवित्र पुस्तकतिगा कोटता मन्ता। 17 अदामे प्रबुनसंग मिलेमायवालोरक प्रबुनसंग उन्दिय आत्मा आन्तोरक। 18 व्यभिचारताल लक मन्ट। मानेय बोद किन्तोरक अद सबोय पाप मेन्दुलताल बाहरो मन्ता मति व्यभिचार केवाल आपुनाय मेन्दुलता विरोद पापकियाला आतोर। 19 मिया मेन्दुल पवित्र आत्माता मन्दिर मन्ता इन्जोर निमाट पुनविट बहे? अनि मिकुन परमेस्वरताल पुटता पवित्र आत्मा मियागा मन्तोर इन्जोर मिकुन आपुनिगा बोदे अदिकार हिले। 20 बाक्याकि परमेस्वर पकाय किमत हिस मिकुन असतोर इन्जोर आपुना मेन्दुलता द्वारा परमेस्वरना हजोरपण किम्ट। |
© (Active) Wycliffe Bible Translators, Inc. All rights reserved.
Wycliffe Bible Translators, Inc.