१ कुरिन्थुस 5 - Muria Far Western

व्यभिचारि केवालोरकुन मसिलोकुरा सभाताल बाहरो टन्डस हियाना

¹ मियागा खरोय परमेस्वरतुन पुनोर ओर लोकुरकनिगा वने आयो इदाम पकायि खराब रितिता व्यभिचार आयिला आता इन्जोर नना केन्जतान। थु! वरोर मानेय आपुना हुडला यायानसंगवने हुन्जान्तोर!

² ते वने निमाट आपुनतुन हजोर किन्तोरिट! मति इद पोल्लोते निमाट खरोय दुःख केविट अनि ओन मसिलोकुरा सभाताल बाहरो टन्डसिवोर।

³ नना मियाताल लक मन्तोना ते वने नना मन्दे मियासंग मन्तोना। खरोय मियासंग मन्तोर वरोर मानेय आस नना इद खराब बुतो कितोर ओर मानेयतुन प्रबु येसुना पोरोयते बदाम दन्ड हियाला पहाजे इन्जोर मुने ठहरे कितोना।

^4-5 मावोर प्रबु येसु पोरोयते निमाट उन्दि जागा जमा आयकिट अनि मन्दे नना वने मियासंग अगा मनका असके निमाट प्रबु येसु मसिना अदिकारते ओद पाप केवाल मानेयतुन ओना पापि स्वभावतुन तासिस ओना आत्मा प्रबुना मलस वायाना दिया पिसहि इन्जोर मियागडाल टन्डस सयतानना कयदे हियाका।

⁶ इचोन पोल्लोंग आतु ते वने निमाट आपुनतुन हजोर किन्तोरिट इद बेस आयो। हुचुन्सा हवियता पिन्डि सबोय नाहता पिन्डितुन बोगलिन्ता इदाम बाताल निमाट पुनविट?

⁷ ओद सोडा लेहकाता जुनाल पापता स्वभावतुन तासिस निमाट सबोय लोकुरक पवित्र आयकिट। असके सोडा वाटोर अदाम पुनाल पिन्डि लेहका आयकिट। निमाट खरोय बोदे पाप हिले अदाम मन्दिला पहाजे। बाक्याकि ओद पसहा हनुमता बेरा बलि हिता बेळा पिला लेहका मसि सबोय लोकुरा पापतुन पिसहान साटि बलिदान आतोर।

⁸ परमेस्वर यहुदिलोकुरकुन मिस्रि देशता गुलामिताल पिसिहितुर इन्जोर ओर यहुदिलोकुरक पसहा हनुमता बेरा गिरदा किन्तोरक। अदामे माक वने परमेस्वर माकुन आपुना पापताल पिसिहतुर इन्जोर गिरदा कियाकाट। मावा खराब स्वभाव अनि पाप, तिन्दाना सोडाते बनेकिता रोटि लेहका मन्ता। इन्जोर बिना सोडाते बनेकिता रोटिते यहुदिलोकुरक पसहा हनुम मानेमान्तोरक अदाम लेहका बिना पापते अनि खरोयते येसु मसिना बलिदानतुन दरोज मानेमाम्ट।

⁹ निमाट व्यभिचारिहना संगत केमाट इन्जोर नना आपुना पत्रतिगा मिकुन मुने कोटतोना।

¹⁰ मति निमाट इद दुनियाता व्यभिचारि या लालचि या दोखा केवालोर या मूरति पुजा केवालोरा संगत केमाट इदाम आयो बाक्याकि इदाम कियाकिट ते मिकुन दुनियाताल पसिस हन्दिला लागार।

¹¹ मति बोरे पोरोयते मसिना विस्वासि इन्तोर मति ओर व्यभिचार कियाना या लालच कियाना या मूरति पुजा कियाना या सराप हेवाल, या दाळुंगो उन्डाना या दोखा हेवाल मनिर ते ओना संगत केमाट अनि इदाम लोकुरासंग जेवन वने केमाट।

¹² बाक्याकि मसिलोकुरा सभाता बाहरोटोर लोकुरा न्याय कियाना नावा बुतो आयो। निमाट पाप केवालोर विस्वासि लोकुरा न्याय जरुर कियाकिट, मति मसिलोकुरा सभाता बाहरटोर लोकुरकुन परमेस्वर न्याय कियानुर।

¹³ “ओर व्यभिचार केवाल मानेयतुन मिया संगताल टन्डस वाटा” इन्जोर पवित्र पुस्तकतिगा कोटता मन्ता।