१ कुरिन्थुस 4 - Muria Far Westernयेसुना खास चेलाल लोकुरा बुतो 1 आपुलोस अनि नना परमेस्वर इदेकवनाह बोरे मानेयनिगा बसकेय तोहोर आस मता ओद पोल्लो दुसरोन वेहान साटि सोपेहकिता मसिना बुतो केवालोर मन्तोरोम इन्जोर मावा बारेते निमाट समजेमायिला पहाजे। 2 इदेक परमेस्वर हिता बुतोतुन संभाले कियाना सोपे कितोर सबोय मानेय आपुना स्वामिनसंग इमानदार मन्दिला पहाजे। 3 निमाट नावा न्याय किम्ट या दुसरो बोदे कोरटतिगा नावा न्याय केविर ते वने नावा विचारते ओद उन्दि हुडला पोल्लो मन्ता। नना ते आपुनतुन न्याय वने केवोन। 4 नना बोदे गलति कितान इदाम पुनोन ते वने इद पोल्लोते नना परमेस्वरना मुने निरदोष आयोन। बाक्याकि प्रबु नावोर न्याय केवाल मन्तोर। 5 इन्जोर प्रबु असा मलस वायनुर; ओद बेराता मुने निमाट बोरे मानेयना न्याय केमाट। प्रबु वायनुर असके लोकुरा न्याय आयार। प्रबु आन्दारते मकता मावा सबोय पोल्लोनुंग वेळिचितिगा तोहानुर अनि लोकुरा मन्दे मकस मन्ता ओद सबोय उद्देश्य तोहानुर पजा वरोर वरोर बदाम बुतो कितुर अदेना अनुसार सबोय लोकुरकुन परमेस्वरनिकेडाल प्रशंसा पुटार। 6 हे बायि-दादालोरक, नना पोलुस इव सबोय पोल्लोंग नना अनि अपलुसना उन्दि उदाहरण बनेकिस मिया फायदा साटि वेहिलातोना। पवित्र पुस्तकतिगाडाल नना वळकता पोल्लो निमाट मानेमान्तोरिट ते बोरे वरोर मानेयना पक्ष पयस दुसरो मानयेना विरोद हजोरपण केमाकिर। 7 इन्जोर दुसरोताल नना हजोर मन्तोना इदाम विचार कियान साटि निया हेरे विशेषाल बाताल मन्ता? ओद सबोय निकुन परमेस्वरनिकेडाल पुटता मन्ता। सबोय निकुन परमेस्वरनिकेडाल पुटतु ते पजा निमा नावा इद सबोय पोल्लोंग ननाय कमेहकितोना इदाम लेहका वळकस निमा आपुनतुन बाक्या हजोर किन्तोन? 8 निमा परमेस्वरना योजना अनि विचारतुन समजेमायान साटि जरुरि मन्ता ओद सबोय पोल्लोंग मुनेटाले करियतान इदाम विचार किन्तोन बहे! अनि निमा प्रबुनिगा लावदे विस्वास कियाला आतोन इन्जोर सबोय रितिता आत्मिक वरदानता बाताले कमि हिले इदाम निमा गलति रितिते समजेमातोन बहे! इन्जोर निमा आपुनतुन पकाय हजोर किस राजान लेहका मावा सिवायि राज कियाला आतोन! निमाट इदाम नाळेह कियाकिट ते पकाय सोबाय आयार! निमाट खरोय राजाह बनेमातिट ते माक वने मियासंग राज किया परान्तोरोम। 9 माक दुनियातोर लोकुरा मुने अनि स्वरगदूतकना मुने अनि सबोयि लोकुरा मुने माक तमाशा लेहका बनेमातोम इन्जोर माक येसुना खास चेला लोकुरकुन सबोयता आकरि जागातिगा इरस परमेस्वर हायाना दन्ड पुटता लोकुरासंगे मन्तोरक लेहका इरस मन्ता इन्जोर नाकुन लागान्ता। 10 मसिना कारण माकुन बुद्धि हिले इदाम लोकुरक समजेमान्तोरक। मति मसि मिकुन पकाय बुद्धिवाले बनेहकिन्तोर इदाम निमाट विचार किन्तोरिट! अनि माकुन बाताले लाव हिले इदाम लोकुरक मावा बारेते विचार किन्तोरक। मति माक लाववाले मन्तोरोम इदाम निमाट विचार किन्तोरिट! माकुन बाताले मान पुटो इदाम लोकुरक लेहका मजाक किन्तोरक, मति मिकुन ते दुसरोनिकेडाल मान आन्ता! 11 अनि माक येसुना खास चेला लोकुरक इद बेरा वनाह करवसता मन्तोरोम अनि पकाय एर उन्डा वसता मन्तोरोम अनि हरतांग-मारतांग सन्दरांग पोन्डस अनि मार तिन्तोरोम अनि माकुन मन्दान साटि लोन वने हिले इदाम माक वलियान्तोरोम। 12 अनि माक आपुनाय कयदे इद जिवातुन मेहनत किन्तोरोम। लोकुरक खराब इन्तोरक ते माक ओरकुन आशिरवाद हिसोर मन्तोरोम। ओर माकुन सतेह किन्तोरक मति माक सहन किसोर मन्तोरोम। ओर मावा बदनाम कियाना बेरा माक ओरासंग मयाते पोल्लोंग वळकसोर मन्तोरोम। 13 नेन्डवनाह माक इद दुनियाता लोकुरा वियार पेटि लेहका अनि माक लोकुरकनिगा बाताले किमत हिले ओद माच लेहका आतोरोम। 14 नना मिकुन लज्जा कियान साटि आयो मति आपुनोर प्रिय बालक लेहका मिकुन समजेह कियान साटि इव पोल्लोंग कोटान्तोना। 15 बाक्याकि मिकुन मसिना बारेते करिहवालोरक दाहा हजार मास्तर लोकुरक मन्दानुरक ते वने नना वरोरे मिकुन बाबो लेहका मन्तोना। बाक्याकि ननाय मिकुन मुने येसु मसिना सोबाता पोल्लो वेहवाल अनि मिकुन मसिनिगा विस्वास कियान साटि मदत केवाल मतोना। 16 इन्जोर निमाट नावा लेहका चाल चलन किम्ट इदाम नना मिकुन विनन्ति किन्तोना। 17 इन्जोर प्रबुनिगा सोबाय विस्वास केवाल अनि इमान्दारि मन्तोर नावोर मरि लेहका नना मया किन्तोना ओर तिमुथियुसिन मिया हेरे लोहतोना। अनि नना बोद बोद जागातिगा दान्तोना ओद सबोय जागाता सबोय मसिलोकुरा सभातिगा नना करहितोना लेहका मसिसंग उन्दि आयानाते नाकुन पुटता पुनाल जिवनतिगा नना पोलुस बदाम ताकिला आतोना ओद पोल्लो ओर मिकुन आलहिच हियानुर इन्जोर ओनागा नावा विस्वास मन्ता। 18 माक बोद बुतो कियाला आतोरोम अदेना बारेते पुच्चेमायान साटि नना इदेक मिया हेरे वायोन इन्जोर विचार किस निमाट कुरिन्थुस सहेरता विस्वासि लोकुरकनिगाडाल हुचुलोर लोकुरक मुहजोर मन्तोर। 19 प्रबुना इच्चा आयार ते नना सान्डेय मिया हेरे वास ओर मुहजोर लोकुरा वळकाना खोटाल मन्ता या ओरकुन प्रबुना बुतो कियान साटि खरोय परमेस्वरना लाव मन्ता या हिले इदाम नना हुळका। 20 परमेस्वर मावा जिवनते राज कियान बेरा परमेस्वरना बारेते माक केवल वळकनाय आयो मति माक परमेस्वरना लावते मावा विचार अनि चाल चलनतुन बदलेकिस लोकुरकुन तोहिर। 21 इन्जोर बाताल नना बळगा पयस दन्ड हियान साटि मिया हेरे वायका या मयातासंग आपुनतुन हुडलोर किस वायका, इद रन्डास पोल्लोताल निमाट बोद पोल्लोता इच्चा किन्तोरिट? |
© (Active) Wycliffe Bible Translators, Inc. All rights reserved.
Wycliffe Bible Translators, Inc.