१ कुरिन्थुस 2 - Muria Far Westernयेसु मसि मावा पापताल पिसहान्तोर 1 हे बायि-दादालोरक, मुनेटोर लोकुरकुन परमेस्वर मकिस इरस मता परमेस्वरना योजना मिकुन वेहान साटि नना मिया हेरे वास मतोना असके नना पकाय हजोर हजोर पोल्लो या ग्यानता पोल्लो वळकोन। 2 मियासंग मन्दान बेरा येसु मसिना बारेते अनि ओना कुरुस पोरो हायानातुन तासिस दुसरो बोदे पोल्लोतुन दुसरो बोदे पोल्लोंग पुन्दाना इच्चा केवोन। 3 नना कमजोरिते अनि वरेते कसिंगसोर मियासंग मतान। 4-5 मिया विस्वास मानेयना ग्यानते आयो मति परमेस्वरना लाव पोरो मजबुत मनि इन्जोर नना मिकुन करिहतान अनि वेहतान ओद पोल्लो केन्जान साटि सोबाय मन्ता मानेयना ग्यानता पोल्लो आयो मति परमेस्वरना आत्माता लावते तोहता मन्तांग। पवित्र आत्मा माकुन ग्यान हिन्तोर 6 नना वेहान बेरा मानेयना ग्यानता अनुसार वळकोन ते वने मसिना विस्वासते पका आतोरा नडुम माक ग्यानता पोल्लोंग केन्जान्तोरोम। मति इद दुनियाता ग्यान अनि नाश कळियवालोर इद दुनियाता अदिकारि लोकुरा ग्यानता पोल्लोंग आयो। 7 परमेस्वर दुनिया बनेकियाना मुनेय मावा हजोरपण साटि ठहरे कितोर अनि मुनेटोर लोकुरनिकेडाल मकस मता परमेस्वरना ग्यानता पोल्लो आन्दु माक वेहान्तोरोम। 8 अनि इद ग्यानतुन दुनियाता अदिकारिलोरक बोरे मानेमायोरक; ओरक अदेन पुन्ज मनेर ते सबोयताल हजोर प्रबुन कुरुस पोरो हव्कोर आस मनेर। 9 परमेस्वरना पवित्र पुस्तकतिगा कोटता लेहका “परमेस्वर आपुना पोरो मया केवालोरक साटि बाताल बाताल बनेहकितोर ओव पोल्लोनुंग बोरे आपुना कोन्डाते हुळोर अनि कविंगने केन्जोर अनि मन्दे विचार केवोर।” 10 मति परमेस्वर ते ओव पोल्लोनुंग आपुना आत्माते माकुन तोहतुर; पवित्र आत्मा सबोय पोल्लोनुंग अनि परमेस्वरना मकता पोल्लोनुंग वने पळकान्तोर। 11 वरोर मानेयना मन्दा पोल्लो ओना लोपा मन्वाल केवल ओना आत्मा पुन्ता। मति दुसरो बोरे मानेय पुनोर ओद परमेस्वरना पोल्लोंग परमेस्वरना आत्माय पुन्तोर, दुसरो बोरे पुनोर। 12 परमेस्वर माकुन फुकोटते हिता ओव सबोय पोल्लोंग पुन्दान साटि माकुन दुनियाता आत्मा आयो मति परमेस्वरनिकेडाल ओना आत्मा पुटता। 13 इन्जोर परमेस्वर माक हिता इव पोल्लोंग दुसरोन वेहान बेरा मानयेना ग्यानते करियता पोल्लोते माक वळकोम, मति परमेस्वरना आत्मा करियता पोल्लोते माक वळकस परमेस्वरना पोरो खरोय विस्वास केवालोरकुन करहान साटि ओना आत्माते पुटतांग पोल्लोते बुतो किन्तोरोम। 14 मति परमेस्वरना आत्मा हिलेर मानेय परमेस्वरना आत्मा तोहतुर अव पोल्लोंग मानेमायोर; बाक्याकि ओव पोल्लोंग ओना साटि बेकार मन्ता। ओद आत्मिक रितिते समजेमायिला पहाजे इन्जोर ओर ओव पोल्लोनुंग समजेमायिला परोर। 15 पवित्र आत्माता अनुसार ताकवाल मानेय सबोय पोल्लोनुंग तपासे किन्तोर मति बोरे ओना तपास किया परोर। 16 परमेस्वरना पवित्र पुस्तकतिगा कोटता मन्ता, “प्रबुना मन्दुन पुन्जुन बोर ओन करिहला परान्तोरक?” मति माकुन मसिना मन मन्ता इन्जोर माक इव पोल्लोंग समजेमान्तांग। |
© (Active) Wycliffe Bible Translators, Inc. All rights reserved.
Wycliffe Bible Translators, Inc.