१ कुरिन्थुस 16 - Muria Far Westernदान जमा कियाना बारेते पोलुसना आग्या 1 हे नावोर बायि-दादालोरक, इदेक नना मिकुन येरुसलेमता विस्वासि लोकुरक साटि दान जमा कियानाता बारेते गलातिया प्रदेशता मसिलोकुरा सभातुन नना आग्या हितोना, अदामे निमाट वने किम्ट। 2 अनि हपताता पहले दिया मन्जे इतवार दिया निमाट सबोय लोकुरक मिया रोजिताल हुचुक डबुंग अलग इराट। निमाट इदाम कियाकिट ते नना वायका असके मिकुन असा डबुंग जमा कियाना जरुरि मनो आयार। 3 अनि ओव डबुंग येरुसलेम सहेरतिगा ओयान साटि इच्चा किन्तोरिट हुचुलोर लोकुरकुन मियागडाल आचाट। नना वायका असके ओरा कयदिगा निमाट जमा किता डबुंग हिस नना ओरकुन येरुसलेम सहेरतिगा लोहका। अनि ओरा कयदिगा पत्र वने कोटस हियाका अनि निमाट ओर लोकुरकुन आचतोरिट इदाम ओद पत्रतिगा कोटता मन्दार। 4 अनि नना वने अगा हन्दाना सोबाय मन्ता ते ओरक वने नावासंग वायिला हिम। पोलुसना हन्दाना योजना 5 अनि नना मकिदुनियातिगाडाल दाका असके मिया हेरे वायका; बाक्याकि नाकुन मकिदुनिया प्रदेशताल हन्दानाय मन्ता। 6 अनि मियासंग हुचुक दियांग मनका मति आयार ते पुरा पिनिता दियांग नना मियासंग मनका। बाक्याकि अदेना पजा नना दुसरो जागा हन्दान साटि निमाट नाकुन बाताले मदत कियापरकिट। 7 अनि केवल मिकुन मिलेमास सान्डेय हन्दानाता नावा इच्चा हिले मति प्रबुना इच्चा मन्दार ते हुचुक दियांगवनाह मियासंग मनका। 8 मति पिन्तिकुस्त हनुमवनाह नना इफिसुस सहेरतिगा मनका। 9 बाक्याकि अगा सोबाय सेवा कियान साटि इदेक पकाय सन्दि पुटतु ते वने विरोद केवालोरक वने पकाय मन्तोरक। 10 तिमुथियुस मिया हेरे वायनुर असके निमाट ओना सोबाय स्वागत किम्ट, निमाट इदाम सोबाय वेवहार कियाकिट ते ओर बिना वरेते मियासंग मन्दिला परानुर। बाक्याकि नना मन्तोना अदामे ओर वने प्रबुना सेवा केवाल मन्तोर। 11 इन्जोर बोरे ओन तुच्च समजेमायमाकिर। नावा हेरे वायान साटि निमाट ओना हन्दानातिगा सबोय मदत किम्ट। ओर दुसरो तमोलोरासंग नावा हेरे वायनुर इन्जोर ओना साटि हर हुळिला आतोना। 12 अनि दुसरो तमोलोरासंग मिया हेरे हनिर इन्जोर मावोर तमो अपुल्लोसतुन नना पकाय विनन्ति कितान। मति इदेक मिया हेरे वायान साटि ओना इच्चाय हिले। ओन सन्दि पुटार असके ओर मिया हेरे वायनुर। पोलुसना आकरि अभिवादन 13 हे नावोर बायि-दादालोरक, निमाट हुशारते मन्ट, अनि विस्वासते स्थिर मन्ट अनि हिमतवाले बनेमाम्ट। अनि विस्वासतिगा लाव वाले बनेमाम्ट। 14 अनि निमाट बाताले किन्तोरिट ते ओद मयाते किम्ट। 15 अनि स्तिफानुसना तमोना लोतोर आखया प्रदेशतोर पहले विस्वासि मन्तोरक अनि परमेस्वरना लोकुरा सेवाकियान साटि ओरक दरोज तयार मन्तोरक इन्जोर निमाट पुन्तोरिट। 16 इन्जोर निमाट इदाम लोकुरकुन अनि ओरासंग पकाय मेहनत किन्तोरक ओरा वने अधिनते मन्ट इन्जोर नना विनन्ति किन्तोना। 17 अनि मियागडाल स्तिफानुस, फोरत्तुनात्तुस अनि अखायिकुस येर तमो लोकुरक नाकुन मिलेमायान साटि वातुरक इन्जोर नाकुन पकाय गिरदा आतु। बाक्याकि निमाट नावासंग हिलविट इन्जोर नाकुन किया परविट मिया मदत ओरक नाकुन कितोरक। 18 ओरक मिकुन गिरदा कितुरक अदामे नाकुन वने गिरदा कितुरक इन्जोर इदाम लोकुरकुन निमाट मानेमाम्ट। 19 आसिया प्रदेशतोर सबोय विस्वासि लोकुरक वने मिकुन नमस्कार किन्तोरक। अक्विला तमो अनि ओना मुत्ते प्रिसका मिकुन नमस्कार किन्तोर अनि ओरा लोतिगा मिलेमायवालोरक मसिलोकुरा सभातोर लोकुरक वने मिकुन प्रबुना पोरोयते नमस्कार किन्तोरक। 20 अनि सबोय विस्वासि बायि-दादालोरक वने मिकुन नमस्कार किन्तोरक अनि निमाट वने वरोन दुसरोन पवित्र चुमाते नमस्कार किम्ट। 21 इदेक नना पोलुस आपुना कयदे कोटस निमाट सबोय लोकुरकुन नमस्कार किन्तोना। 22 अनि बोरे प्रबुनिगा मया केवोर ते ओर सरापता योग्य मन्तोर। मावोर प्रबु वायवाल मन्तोर। 23 मावोर प्रबु येसु मसि मिया सबोय लोकुरकुन दया केविर। 24 येसु मसिना पोरोयते नना मिया सबोय लोकुरकुन मया किन्तोना। आमिन। |
© (Active) Wycliffe Bible Translators, Inc. All rights reserved.
Wycliffe Bible Translators, Inc.