१ कुरिन्थुस 15 - Muria Far Western

मसिना असा जिवेमायानाता बारेते

¹ हे नावोर बायि-दादालोरक, निमाट मानेमास मजबुते स्थिर मन्तोरिट ओद सोबाता पोल्लो नना बदाम मिकुन मुने वेहतोना इन्जोर नना मिकुन असा आलहिच हियाना कोसिस किन्तोना।

² अनि ओद सोबाता पोल्लोतिगा निमाट मजबुतते विस्वास किस स्थिर मन्तोरिट ते परमेस्वर मिकुन पिसहान्तोर, आयोते मिया विस्वास कियाना बेकार आस मनवार।

³ बाक्याकि नना येसु मसिनिगाडाल येचुन मिकुन इन्ज मता ओद सोबाता पोल्लोता सबोयताल महत्वता पोल्लो इद मन्ता: पवित्र पुस्तकतिगा कोटता लेहका मसि माकुन पापता दन्डताल पिसान साटि हातुर,

⁴ अनि ओन मिसतुर अनि परमेस्वरना पोल्लोता अनुसार तिसरो दिया ओर असा जिवेमातुर।

⁵ अनि पजा ओर पतरसिन दिसतुर अनि ओना पजा पिसतोर येसुना खास चेला लोकुरकुन वने दिसतुर।

⁶ अदेना पजा उन्दिय बेरा सयुंग नुहक लोकुरकताल पकाय विस्वासि लोकुरकुन दिसतुर। अनि ओर लोकुरकनिकेडाल पकाय लोकुरक इदेक वने जिवित मन्तोर मति हुचुलोर लोकुरक हातोरक।

⁷ इदेना पजा ओर याकुबतुन दिसतुर अनि येसुना सबोयि खास चेला लोकुरकुन वने दिसतुर।

⁸ अनि सबोयना पजा महिनांग पुरा आयानाता मुनेय जनमा आन्तोर नोनाल लेहका मन्ता नाकुन वने ओर दिसतुर।

⁹ बाक्याकि नना येसुना सबोय खास चेलानिगाडाल नाकुन बाताले महत्व हिले अनि नना परमेस्वरना सभातुन पकाय तकलिप हिस मतोना इन्जोर नना येसुना खास चेला इन्दानता योग्य वने हिलेन।

¹⁰ अनि इदेक नना येसुना खास चेला मन्तोना, ओद परमेस्वरना दयाता कारणते मन्तोना अनि परमेस्वर नावागा किता ओद दया बेकार आयो बाक्याकि येसुना दुसरो सबोय खास चेला लोकुरताल नना पकाय मेहनत कितान। खरोय इनका ते नना ओद आपुनास मेहनत केवोन मति नावागा दया किस परमेस्वर ओद मेहनत कितोर।

¹¹ इन्जोर सोबाता पोल्लोतुन वेहवाल नना मनका या येसुना बोरे दुसरो खास चेला मनिर माक सबोय लोकुरक उन्दिय सोबाता पोल्लोतुन प्रचार कितोरोम। अनि ओद सोबाता पोल्लोतिगा निमाट विस्वास वने कितोरिट।

येसु मसिनिगा विस्वास किस हातोर लोकुरक असा जिवेमायनुरक

¹² माक मसि हातोरिगाडाल असा जिवेमातोर इन्जोर सोबाता पोल्लोतुन वेहान्तोरोम ते मियागडाल हुचुलोर लोकुरक हातोर लोकुरक असा जिवेमायोर इदाम बदाम वळकिन्तोर?

¹³ हातोर मानेय असा जिवेमायोर ते मसि वने असा जिवेमास तेदोर।

¹⁴ अनि मसि असा जिवे मायोर ते माक वेहता सोबाता पोल्लो अनि मिया विस्वास कियाना सबोय बेकार मन्ता।

¹⁵ इचोने आयो, माक परमेस्वर साटि खोटाल गवाहि वळकावालोर वने बनेमायकोम। बाक्याकि परमेस्वर मसिन हातोरिगाडाल असा जिवेहकितोर इन्जोर माक गवाहि वळकिन्तोरोम। मति हातोर लोकुरकुन परमेस्वर असा जिवेह केवोर आयनुर ते येसु मसिन वने हातोरिगाडाल असा जिवेकेवोर इन्जोर माक परमेस्वरना विरुद खोटाल गवाहि वेहवालोर आयकोम।

¹⁶ अनि हातोर लोकुरक असा जिवेहमायोर ते मसि वने जिवेहमायोर इन्जोर नना असा इन्तोना।

¹⁷ अनि मसिन हायानाताल असा जिवेह केवोर ते मिया विस्वासता बाताले फायदा हिले; अनि निमाट इदेक वने पापतेय मन्तोरिट।

¹⁸ अनि मसिनिगा विस्वास किस हातोरक ओर सबोय लोकुरा नाश आतु!

¹⁹ अनि केवल इद दुनियाता जिवन साटि माक मसिनिगा विस्वास किन्तोरोम ते माक सबोय मानेयताल पकाय दयनिय मन्तोरोम।

²⁰ मति खरोय मसिन हातोरिगाडाल असा जिवेहकितोर। अनि हातोरिगाडाल असा जिवेमायवाल निगाडाल ओर मुनेटा पन्डता काया मन्तोर। येसु मसिना हातोर विस्वासि लोकुरकुन वने असा जिवेहकियानुर इन्जोर ओर ठहरे कितोर।

²¹ बाक्याकि वरोर मानेयना द्वारा दुनियातिगा हायाना आता। अदामे वरोर मानेयना कारण हायानाताल असा जिवेमायाना आता।

²² अनि आदमना पापतिगा सहभागि आस माक सबोय लोकुरक हान्तोरोम अदामे बोर मसिनासंग संबन्द जोळेमाता ओरकुन वने उन्दि दिया जिवेहकियानुर।

²³ मति सबोय लोकुरक साटि उन्दि उन्दि बेरा मन्ता: सबोयता मुने मसिन मुनेटा काया लेहका जिवेहकितुर। अनि मसि मलस वायनुर असके मसिना लोकुरकुन वने असा जिवेहकियानुर।

²⁴ इदेना पजा इद दुनियाता अन्त आयाना बेरा वायार। असके दुनियातिगा राज केवालोर सबोय मुक्याह अनि अदिकारि लोकुरा खराब लावतुन मसि नाश किस इद दुनिया परमेस्वर बाबोना कयदे सोपे कियानुर।

²⁵ बाक्याकि आपुना सबोय दुश्मनतुन हारेह किस आपुना काल्क अडिय कियानावनाह मसि राज कियाना जरुरि मन्ता।

²⁶ अनि सबोयता आकरि दुश्मनिन नाश कियानुर, ओद दुश्मन हायाना मन्ता।

²⁷ बाक्याकि “परमेस्वर सबोय ओना अदिकारते कितोर” इन्जोर परमेस्वरना पवित्र पोल्लोतिगा कोटता मन्ता। “सबोय येसु मसिना अदिकारते हिता मन्ता” मन्जे परमेस्वरे सबोयि पोल्लोतुन येसुना अदिकारता अडिय कितोर इन्जोर केवल ओर परमेस्वरे येसुना अदिकारते मनोर इदाम स्पष्ट मन्ता।

²⁸ अनि सबोय आयि परमेस्वर आपुनोर मरि येसु मसिना अदिकारते कितुर ते मरि वने आपुनतुन परमेस्वरना अदिकारते कियानुर बाक्याकि परमेस्वरे सबोयतिगा राज केवाल आयिर।

²⁹ अनि परमेस्वर हातोर लोकुरकुन खरोय जिवेहकियानुर। इव पोल्लोंगतिगा विस्वास केविट ते हातोर लोकुरक साटि मियागडाल लोकुरक बपतिस्मा येतान्तोर ओर बोद आशाते येतान्तोरक?

³⁰ अनि परमेस्वर हातोर लोकुरकुन जिवेकेवोर आयनुर ते माक दरोज मावा जिवनतुन बाक्या दोखाते इरान्तोरिट।

³¹ हे नावोर बायि-दादालोरक, मावोर प्रबु येसु मसिनिगा मिया साटि नावा हजोरपण इदे मन्ता: नना दरोज हायानाता दोखाताल दान्तोना

³² अनि इफिसुस सहेरतोर लोकुरक केळाता जानवर लेहका नावासंग लळेमातुरक। ओद लळायि कियाना केवल इद सन्सारता पोल्लोंग साटि मन्ता ते इदाम कियाना द्वारा नाकुन बोदे फायदा हिले आसि। अनि हातोर लोकुरकुन असा जिवेह केवोर आयनुर ते “दटु माक सोबाय तिन्काट उन्काट बाक्याकि नाळ माकुन हायानाय मन्ता।”

³³ इदाम इन्तोरक लोकुरकुन केन्जुन निमाट दोखा तिनमाट बाक्याकि “खराब लोकुरा संगत सोबाय आदततुन बिगळे किन्ता।”

³⁴ इन्जोर खरोय रितिते विचार किस निमाट होसते मन्ट अनि पाप कियाना तासिम्ट, बाक्याकि मियागडाल हुचुलोर लोकुरक परमेस्वरना बारेते पुनोरक, इन्जोर मिकुन लज्जा आयि इन्जोर नना इदाम इन्तोना।

माक असा जिवेमायकोम।

³⁵ ते हातोर लोकुरकुन बदाम जिवेहकियानुर? अनि ओरक बोद मेन्दुलतासंग जिवेमायनुर? इन्जोर हुचुलोर लोकुरक पुच्चेमाय परान्तोरक।

³⁶ हे निरबुद्धि लोकुरक! निमाट विजा वीतान्तोरिट असके ओद बिजा जागाता अडिय हन्ज कळियो आयार ते पजा ओद मोळयो आयार इन्जोर नना मिकुन इन्तोना।

³⁷ अनि निमाट गोहक या बोदे दुसरो विजा वीतान्तोरिट असके निमाट रोपातुन उरसविट मति केवल विजा वीतान्तोरिट।

³⁸ मति परमेस्वर आपुना इच्चाता अनुसार ओद विजातुन मेन्दुल हिन्तोर। मन्जे सबोय विजातुन आपुना आपुना मेन्दुल हिन्तोर।

³⁹ अनि सबोय जिवित जानवरकना मेन्दुल उन्दि लेहकाय आयो। मानेयना मेन्दुल अलग मन्ता अनि जानवरकना मेन्दुल अलग मन्ता अदामे पिटेंगना मेन्दुल अलग मन्ता अनि मीनकना वने मेन्दुल अलग मन्ता।

⁴⁰ अदामे आबारतिगा मनवांग पोळद, नलेन्ज अनि हुकोंग दुनियाता जिवा अनि जिवा हिले इदाम सबोय चिजक अलग अलग मन्ता बाक्याकि आबारतिगा मन्तांग अवेहना मान्जाना अनि आकार दुनियातिगा मन्वालोराताल अलग मन्ता। अनि आबारतिगा मनवांगना मान्जाना वने अलग अलग मन्ता।

⁴¹ पोळदता मान्जाना अलग मन्ता अनि नलेन्जता मान्जाना अलग मन्ता अदामे हुकोंगना मान्जाना वने अलग अलग मन्ता। बाक्याकि उन्दि हुकोता मान्जाना दुसरो हुकोता मान्जानाताल वने अलग मन्ता।

⁴² अनि हातोर लोकुरा जिवेमायाना वने इदाम आयार। विजातुन वितानपा ओद जागा अडिय हन्ज कळियान्ता अदामे मानेय हातपा इद सन्सारता मेन्दुलतुन मिसान्तोरक अनि ओद वने कळियान्ता, मति परमेस्वर असा जिवेहकिन्तोर ओद मेन्दुल बसकेय नाश आयो आयार।

⁴³ अनि इद सन्सारिक मेन्दुलतुन मन्जे दुनियातिगा मन्दाना योग्य मन्ता इद मेन्दुलतुन मिसान्तोरक असके ओद सन्सारता मानेयना मेन्दुलतुन बोदे लाव मनो आन्ता। मति परमेस्वर असा जिवेहकियानुर ओद मेन्दुल लावदे परिपूर्ण मन्दार।

⁴⁴ अनि हातोर मानयेना मेन्दुल मिसान्तोरक ओद मेन्दुल इद दुनियातिगा मन्दाना योग्य मेन्दुल आन्ता। मति परमेस्वर ओन असा जिवेहकियानुर असके ओद मेन्दुल आत्मिक मेन्दुल आन्ता मन्जे स्वरगतिगा मन्दाना योग्य मेन्दुल आन्ता। बाक्याकि मानेयना सन्सारिक मेन्दुल मन्जे इद दुनियातिगा मन्दाना योग्य मेन्दुल मन्ता ते आत्मिक मेन्दुल स्वरगतिगा मन्दानायोग्य मेन्दुल वने मन्ता।

⁴⁵ इन्जोर “पुरकातोर मानेय आदम जिवित मानेय आतुर” इन्जोर परमेस्वरना पवित्र पुस्तकतिगा कोटता मन्ता। अनि आकरि आदम मन्जे येसु मसि ओद आत्मिक मेन्दुलतुन मन्जे स्वरगतिगा मन्दाना योग्य मेन्दुल हेवाल आतुर।

⁴⁶ मति माकुन मुने हितोर ओद सन्सारिक मेन्दुल मन्जे इद दुनियातिगा मन्दाना योग्य मेन्दुल मन्ता। अदेना पजा माकुन आत्मिक मेन्दुल मन्जे स्वरगतिगा मन्दाना योग्य मेन्दुल हियानुर।

⁴⁷ अनि पुरकातोर मानेय आदमतुन दरतिता तोळियते बनेकितोर अनि दुसरो मानेय येसु मसि स्वरगताल वातोर।

⁴⁸ अनि पुरकातोर मानेय तोळियतोर मन्तोर अदामे दुनियातोर सबोय लोकुरक वने ओना लेहकाय मन्तोरक। मति दुसरो मानेय स्वरगताल मन्तोर इन्जोर स्वरगतिगा मन्वालोरक ओर सबोय लोकुरक वने ओना लेहकाय मन्तोरक।

⁴⁹ अनि आदमतुन तोळियते बनेकितुर अदामे मावा वने रुप इदेक ओना लेहकाय मन्ता। अदामे दुसरो मानेय स्वरगताल वातुर इन्जोर मावा वने उन्दि दिया ओनाय लेहका स्वरगतिगा मन्दाना योग्य मेन्दुल पुटार।

बसकेय नाश आयो आयार पुनाल मेन्दुल परमेस्वर माकुन हियानुर

⁵⁰ हे नावोर बायि-दादालोरक, इद हवि अनि नतुरते बनेमाता मावा मेन्दुलतुन पयस माक स्वरगतिगा मन्दिला परोम इन्जोर नना मिकुन इन्तोना। कळियान्ता इद मेन्दुलसंग बसकेय कळियो ओद स्वरगता वारिस आय परो।

⁵¹ केन्जाट, नना मिकुन परमेस्वरना उन्दि रहस्यता पोल्लो वेहका: मावागाडाल सबोय लोकुरक हायोर आयनुरक मति माक सबोय लोकुरा मेन्दुल बदलेमायार।

⁵² अनि दुनियाता अन्त आयाना बेरा आकरि पिपारितुन नेकाहनुर असके हुरहायने मन्जे कोन्डांग मिलि मुच्चाना तेरयाना इचोन सान्डे हातोर लोकुरक बसकेय नाश आयो ओद मेन्दुलतासंग जिवेमास तेदानुरक, अनि जिवत मन्तोर माक सबोय लोकुरा मेन्दुल बदलेमायार।

⁵³ बाक्याकि मावा दुनियातिगा मन्दाना योग्य मन्ता, इद कळियवाल मेन्दुल पयस माक स्वरगतिगा हन्दिला परोम इन्जोर स्वरगतिगा हन्दान साटि मावा इद कळियवाल मेन्दुल स्वरगतिगा मन्दाना योग्य मन्ता कळियवो ओद मेन्दुल आस बदलेकियाना जरुरि मन्ता।

⁵⁴ अनि इद कळियवाल मेन्दुल कळियवो ओद मेन्दुल आस बदलेमायार असके “हायानातुन दरोज साटि नाश किस विजयि पुटता” इदाम परमेस्वरना पवित्र पोल्लोतिगा कोटता मन्ता ओद पोल्लो पुरा आयार।

⁵⁵ इन्जोर “हे हायाना निया विजय बगा हतु? अनि निया कोडयाना बगा मन्ता?”

⁵⁶ हायानता कोडयाना पाप मन्ता। माक पाप किन्तोरोम इन्जोर हायानातुन लाव पुटिन्ता अनि माक हान्तोरोम इदाम माक मूसाना नियमताल पुन्दोम।

⁵⁷ मति मावोर प्रबु येसु मसिना कारण पाप अनि हायानाताल परमेस्वर माकुन विजय किन्तोर इन्जोर माक परमेस्वरतुन धन्यवाद कियाला पहाजे।

⁵⁸ इन्जोर हे नावोर प्रिय बायि-दादालोरक, निमाट विस्वासते मजबुत मन्ट अनि बोदे कारणते निमाट विस्वासताल लक हन्माट। अनि प्रबुन साटि निमाट किन्तोरिट ओद मेहनत बेकार हिले इदाम समजेमास निमाट प्रबुना बुतो पकाय लावदे मुने किसोर मन्ट।