१ कुरिन्थुस 14 - Muria Far Western

परमेस्वरना पोल्लो वेहाना अनि अन्जान बोलिंग वळकानाता बारेते पोलुसना सल्ला

¹ मया सबोयताल हजोर पोल्लो मन्ता इन्जोर निमाट दरोज वरोन दुसरोनसंग मया किसोर मन्ट! अनि पवित्र आत्माता द्वारा हिता सबोय वरदानतुन पुटहान साटि विशेषाल परमेस्वरना पोल्लो वेहानाता वरदान पुटि इदाम निमाट पकाय इच्चा किसोर मन्ट।

² अन्जान बोलि वळकान्तोर ओर मानेयसंग आयो मति परमेस्वरनासंग वळकान्तोर इन्जोर ओर बाताल वळकान्तोर ओद बोने समजेमायो। ओर पवित्र आत्माता लावदे रहस्यता पोल्लोंग वळकान्तोर।

³ मति परमेस्वरना पोल्लो वेहवाल मानेय मसिलोकुरा सभातुन हिमत अनि शान्ति हिस ओरा विस्वासते मजबुत कियान साटि ओरकुन परमेस्वरना पोल्लो वेहान्तोर।

⁴ अनि अन्जान बोलि वळकवाल मानेय ओरक केवल आपुनतुनेय विस्वासते मजबुत किन्तोर। मति परमेस्वरना पोल्लो वेहान्तोर ओर मसिलोकुरा सबोय सभातुन विस्वासते मजबुत किन्तोर।

⁵ निमाट सबोय लोकुरक अन्जान बोलिंग वळकाट इन्जोर नावा इच्चा मन्ता। मति इदेनताल निमाट परमेस्वरना पोल्लो वेहाट इदाम नावा पकाय इच्चा मन्ता। बाक्याकि मसिलोकुरा सभातुन विस्वासते मजबुत बनेकियान साटि अन्जान बोलितांग अर्थ समजेमास वेहवाल बोरे मसिलोकुरा सभातिगा हिलेर ते अन्जान बोलिंग वळकवालताल परमेस्वरना पोल्लो वेहवाल मसिलोकुरा सभातुन पकाय मदत किन्तोर।

⁶ हे नावोर बायि-दादालोरक, नना मिया हेरे वास अन्जान बोलिंग वळकिका ओद बोलि मिकुन समजेमायो ते मिया बाताले फायदा आयो आयार। मति परमेस्वर तोहतोर खरोय पोल्लो या परमेस्वरना बारेता ग्यानता पोल्लो या परमेस्वरना पोल्लो वेहाना या मसि उपदेशता करिहनाते नना मिकुन हियाका ते मिया फायदा आयार।

⁷ अनि हुलुळ या वीणा लेहका जिवा हिले चिजता उदाहरण हुळाट ओव अलग अलग लेंग टन्डोंग ते हुलुळ नेहकिहला आतोर या वीणा नेकिहला आतोर इन्जोर लोकुरक बदाम पुन्दानुरक।

⁸ अनि लळायितिगा हन्दान साटि पिपारि नेकाहन्तोर ओद पिपारि स्पष्ट नेकिहवोर आयनुर ते बोरे लळायितिगा हन्दान साटि तयारि केवोर आयनुर।

⁹ अदामे निमाट वने दुसरोन समजेमायो बोलिते वळकिकिट ते निमाट बाताल वळकिला आतोरिट इदाम लोकुरक बदाम पुन्दानुरक? असके मिया पोल्लोंग फुकोट आयनुंग।

¹⁰ दुनियातिगा पकाय अन्जान बोलिंग मन्तांग अनि सबोय बोलितांग अर्थ वने मन्ता इन्जोर खरोय मन्ता।

¹¹ इन्जोर नाकुन बोदे बोलिता अर्थ समजेमायो ते ओद बोलि वळकवाल बाताल इन्दिला आतोर इद नाकुन समजेमायो आयार। अनि नना बाताल वळकान्तोना ओद वने ओन समजेमायो आयार।

¹² पवित्र आत्मा हिता वरदानकुन पुटहान साटि मिया पकाय इच्चा मन्ता इन्जोर येसुना दलतुन विस्वासते मजबुत किन्तांग ओव वरदानतुने पुटहान साटि निमाट पकाय कोसिस किम्ट।

¹³ इन्जोर अन्जान बोलिंग वळकान्तोरक ओद बोलिता अर्थवने वेहिला परका इदाम ओरक प्रार्थना केविर।

¹⁴ नना अन्जान बोलिंगते प्रार्थना कियान बेरा नावा बुद्धि बुतो केवो मति खरोय नावा आत्मा प्रार्थना किन्ता।

¹⁵ इन्जोर नना बाताल कियाला पहाजे? नना पवित्र आत्माता मदतते अन्जान बोलिंगते प्रार्थना कियाका अनि नना बुद्धिते समजेमान्तोना ओदे बोलिते नना प्रार्थना कियाका; अनि नना पवित्र आत्माता मदतते अन्जान बोलिंगते पाटांग ओयका अनि नना बुद्धिते समजेमान्तोना ओदे बोलिते वने पाटांग ओयका।

¹⁶ निमा पवित्र आत्माता मदतते दुसरो लोकुरक पुनोरक ओद बोलिते धन्यावादता प्रार्थना कियाकि ते अगा उदितोर लोकुरक निमा बाताल प्रार्थना किति अदेन समजेमायोर इन्जोर ओर लोकुरक बदाम “आमिन” इन्दानुरक?

¹⁷ निया धन्यवादता प्रार्थना सोबाय मन्ता मति इद दुसरो लोकुरकुन विस्वासते मजबुत कियान साटि बाताले फायदाता हिले।

¹⁸ नना मिया सबोयताल अन्जान बोलिंगते वळकिला परान्तोना इन्जोर नना परमेस्वरना धन्यवाद किन्तोना।

¹⁹ मति मसिलोकुरा सभातिगा विस्वासि लोकुरा नडुम अन्जान बोलिंगते दहा हजार पोल्लोंग वेहानाताल दुसरो लोकुरकुन करहान साटि लोकुरक समजेमान्तोरक ओद बोलिते सयुंगे पोल्लोंग वेहाना नाकुन सोबाय मन्ता।

²⁰ हे नावोर बायि-दादालोरक, निमाट बालक लेहका विचार केमाट मति हजोर मानेयना लेहका बुद्धिमान बनेमाम्ट। मति बदाम बालकलोरक खराब कियानाता विचार केवोर अदामे निमाट वने ओरा लेहका बनेमाम्ट।

²¹ परमेस्वरना पोल्लोतिगा इदाम कोटता मन्ता, “दुसरो देशतोर लोकुरा अनि अन्जान बोलिंग वळकान्तोर ओर लोकुरा द्वारा नना नावा लोकुरकुन वळकिका ते वने ओरक नावा केन्जोर आयनुरक इन्जोर प्रबु इन्तोर।”

²² इन्जोर अन्जान बोलिंगते वळकाना विस्वासि लोकुरक साटि आयो मति मसिनिगा विस्वास केवोर लोकुरा मन्दुन परमेस्वरना हेरे तताना साटि उन्दि सिना मन्ता। मति परमेस्वरना पोल्लो वेहाना अविस्वासि लोकुरक साटि आयो मति विस्वासि लोकुरकुन विस्वासते मजबुत बनेकियाना साटि मन्ता।

²³ इन्जोर मसिलोकुरा सभा उन्दि जागा मिलेमास सबोय लोकुरक उन्दि बेरा अन्जान बोलिंगते वळकिर ते अन्जान बोलितांग बारेते पुनोर येसुनिगा विस्वास केवोर केवल आपुनाय बोलि पुन्तोरक लोकुरक अगा वास हुळानुर ते येर लोकुरक बाताल इन्दानुरक? येर लोकुरक बयहाल आतोरक इदाम इनोर आयनुर बहे?

²⁴ मति निमाट सबोय लोकुरक परमेस्वरना पोल्लो वेहचोर मनकिट असके येसुनिगा विस्वास केवोर केवल आपुना बोलि पुन्तोर मानेय मिया नडुम वायनुर ते परमेस्वरना पोल्लो केन्जुन ओना मन्दिगा बोदायि पाप मकता मन्ता ओद दिसार अनि नना पापि मन्तोना इन्जोर ओर आपुनतुन पुन्दानुर।

²⁵ असके ओर परमेस्वरना काल्क अरस, “खरोय परमेस्वर मिया नडुम मन्तोर” इदाम आरादना किस ओरक आपुना पापताल पस्तेमायाना कारण आयार।

परमेस्वरना आरादना क्रमानुसार कियानाता बारेते सल्ला

²⁶ इन्जोर हे बायि-दादालोरक, निमाट परमेस्वरना आरादना कियान साटि मिलेमान्तोरिट असके बोदायि निमाट किन्तोरिट ओद सबोय लोकुरा आत्मिक फायदा साटि आयिला पहाजे। मन्जे मियागडाल बोरे वरोर मानेय पाटा ओन्तोर बोरे करहान्तोर अनि दुसरो बोरे परमेस्वरताल विशेषाल पोल्लोंग तोहान्तोर, दुसरो बोरे अन्जान बोलिंग वळकान्तोरक अनि दुसरो बोरे बोलिता अर्थ समजेकिस वेहान्तोर मति इव सबोय पोल्लोंग सबोय लोकुरा फायदा साटि आयिला पहाजे इदाम नना मिकुन इन्तोना।

²⁷ अनि मियागडाल बोरे अन्जान बोलिंगते वळकान्तोरक ते ओरक इवुर या मुवुर लोकुरकताल पकाय मनमाकिर। अनि वरोना परके वरोर इदाम वळकिला पहाजे अनि ओद बोलिता अर्थ वरोर मानेय समजेहकिस वेहिला पहाजे।

²⁸ मति अन्जान बोलितांग अर्थ समजेहकिस वेहवाल बोरे हिलेर ते अन्जान बोलिलिंग वळकवाल लोकुरक कमेक मन आपुना मन्देय अन्जान बोलिंगते परमेस्वरनासंग वळकिर।

²⁹ अदामे इवुर या मुवुर लोकुरे परमेस्वरना पोल्लो वेहिर अनि पिसतोर लोकुरकुन परमेस्वरना ओद पोल्लोता बारेते पिसतोर लोकुरक ध्यानते विचार केविर।

³⁰ दुसरो बोरे परमेस्वरना पोल्लो वेहिला आतोर असके अगा उदितोर लोकुरकुन वळकान साटि बोरे दुसरो मानेयतुन परमेस्वर बाताले तोहतुर ते ओर वळकिला पहाजे। असके मुने बोर वळकसोर मतोर ओन कमेक आयिला पहाजे।

³¹ इद रितिते निमाट सबोय लोकुरक करियान साटि अनि निमाट सबोय लोकुरकुन प्रोत्साहन साटि निमाट वरोना परके वरोर इदाम परमेस्वरना पोल्लो वेहिला परान्तोरिट।

³² परमेस्वरना पोल्लो वेहान्तोर ओर आपुना आत्मातुन काबुते इरिला परान्तोर। ओर आपुना वळकाना रोमिस दुसरो लोकुरकुन वने वळकान साटि सन्दि हिया परान्तोर।

³³ बाक्याकि मावोर परमेस्वर सबोय क्रमानुसार केवाल मन्तोर। मति सबोय आयि सोबाय रितिते शान्तिते आयिला हेवाल मन्तोर।

³⁴ अदामे मसिलोकुरा सभातिगा आरादना कियाना बेरा आसक कमेक मनिंग अनि उन्दि आळ दुसरो आळदासंग पुसपुस वळकमाकि। मति मूसाना नियमतिगा कोटता लेहका ओद अधिनताते मन्दिला पहाजे।

³⁵ अनि अदेन बाताले पुन्दाना मन्ता ते आरादनाता पजा ओद लोन हन्जुन आपुना मुजोन पुच्चेमायि बाक्याकि मसिलोकुरा सभातिगा आरादनाता बेरा आसक आपसते वळकाना पकाय लज्जाता पोल्लो मन्ता।

³⁶ हे बायि-दादालोरक, बाताल परमेस्वरना पोल्लो मियागडाल सुरु आता बहे? अनि ओद केवल मिया साटि अवता बहे? इदाम नना मिकुन पुच्चेमान्तोना।

³⁷ बोरे मानेय आपुनतुन परमेस्वरना पोल्लो वेहवाल या पवित्र आत्माता वरदान पुटिहतोर मानेय इदाम समजेमान्तोरक ते नना बाताल आयि मिकुन कोटिला आतोना इद सबोय पोल्लो प्रबुना आग्या मन्ता इदाम ओरक पुनिरक।

³⁸ मति बोरे नना बाताल इन्तोना अदेन ध्यान हेवोर ते निमाट वने ओनागा ध्यान हेमाट।

³⁹ इन्जोर हे बायि-दादालोरक, निमाट परमेस्वरना पोल्लो वेहानाता पकाय इच्चा इराट अनि अन्जान बोलिंग वळकवालोरकुन होंग केमा।

⁴⁰ मति परमेस्वरना आरादनाता बेरा सबोय पोल्लोंग उचित रितिते अनि क्रमानुसार आयिला पहाजे।