१ कुरिन्थुस 13 - Muria Far Western

मया सबोयताल हजोर वरदान मन्ता

¹ नना मानेयकना अनि स्वरगदूतकना वने बोलिंग वळकिला परान्तोना मति नना दुसरोन मया केवोन ते नावा वळकाना केवल उन्दि नेकान्ता पितळिता हजोर दळिया या मन्जरिता लेंग लेहका मन्ता।

² अनि नाकुन परमेस्वरना पोल्लो वेहाना वर्दान पुटस नावागा परमेस्वरना मकिस इरस मता सबोय योजनातुन समजेमायाना लाव अनि सबोयि ग्यान मन्ता अनि मटातुन गुचाहाना लेहका हजोर विस्वास नावागा मन्ता मति नना दुसरोन मया केवोन ते नना बाताले हिलेन।

³ अनि नना नावा सबोय धन गरिब लोकुरकुन दान कियाका अनि नना आपुनतुन पोतहान साटि सोपे कियाका मति नना दुसरोनासंग मया केवोन ते नाकुन बाताले फायदा हिले।

⁴ दुसरोन मया किन्तोर ओर मानेय सबोय पोल्लोतुन सहन किन्तोर अनि ओर दुसरोन दया किन्तोर, ओर बोनाय हेवा केवोर अनि ओर आपुना हजोरपण किस बेहरांग बेहरांग पोल्लोंग वेहोर।

⁵ ओर दुसरोनसंग खराब रितिते वेवहार केवोर, अनि आपुनाय फायदा साटि इच्चा केवोर अनि ओर सान्डेय होंग केवोर, अनि खराब बुतो केवालोरा हिसाब इरोर।

⁶ ओर खराब बुतोतिगा गिरदा केवोर मति खरोय पोल्लोतिगा गिरदा किन्तोर।

⁷ ओर आपुना जिवनतिगा सबोय सहेन किन्तोर अनि दरोज परमेस्वरनिगा विस्वास इरान्तोर। अनि ओर सबोय पोल्लोतिगा परमेस्वरनिगा आशा इरान्तोर अनि सबोय पोल्लोतिगा पोसोरिंग सहेन किस मन्तोर।

⁸ मया कियाना बसकेय कमि आयो आयार। मति परमेस्वरना पोल्लो वेहाना अनि अन्जान बोलिंगते वळकाना बन्द आयार अनि सबोय समजेमायाना लाव अनि बुद्धि मनो आयार

⁹ बाक्याकि माकुन पुटता समजेमायाना ग्यान अनि परमेस्वरना पोल्लो वेहानाता वरदान परिपूर्ण हिलेंग मति अपुर्ण मन्ता।

¹⁰ मति परिपूर्ण मन्ता ओद पोल्लो वायार असके अपुर्ण मन्ता ओव पोल्लोता जरुरि मनो आयार।

¹¹ मिकुन उन्दि पोल्लो वेहान्तोना, नना हुडलोर मतोना असके हुडलोर नोनाल लेहका वळकिन्दान अनि हुडलोर नोनाल लेहकाय विचार किन्दान। अनि हुडलोर नोनाल लेहका नावा बुद्धि मता, नना हजोर आतान असके हुडलापनता सबोय पोल्लोंग नना तासितान।

¹² इदेक आरसातिगा माक जारवा लेहका दिसान्ता अदामे इदेक माक बाताले सोबाय हुळिला परोम मति उन्दि दिया माक सबोय सोबाय नावा मुने हुळकोम। अनि इदेक माक हुडन्साय पुन्तोरोम। मति परिपूर्ण मन्ता ओद पोल्लो वायार असके बदाम परमेस्वर मावा बारेते सबोय पुन्तोर अदामे माक वने परिपूर्ण पुन्काट।

¹³ इन्जोर विस्वास कियाना, आशा कियाना अनि मया कियाना इव मुन्डास पोल्लोंग दरोज मन्दार। इव मुन्डास पोल्लोतिगाडाल उन्दि पोल्लो सबोयताल हजोर मन्ता ओद पोल्लो मया कियाना मन्ता।