१ कुरिन्थुस 12 - Muria Far Western

पवित्र आत्मानिकेडाल पुटतांग अलग अलग वरदान

¹ हे नावोर बायि-दादालोरक, पवित्र आत्मानिकेडाल पुटतांग अलग अलग वरदानता बारेते निमाट मिया पत्र ते कोटस नाकुन पुच्चेमाता ओद पोल्लोता बारेते नावा उत्तर इद मन्ता: पवित्र आत्मा हिता सबोय वरदानता बारेते निमाट पुन्ट इदाम नावा इच्चा मन्ता।

² अनि निमाट परमेस्वरतुन मानेमायो आन्दिट असके अलग अलग रितिते निमाट बसकेय वळक परो ओद मूरतिता परके लेसक बदाम जिवेमान्दिट इन्जोर निमाट पुन्तोरिट।

³ इन्जोर बोरायि परमेस्वरना आत्माता द्वारा इन्तोर ओर बसकेय “येसु सरापित मन्तोर” इदाम इनोरक अनि पवित्र आत्माता शिवाय बोरे “येसुये प्रबु आन्दुर” इदाम बसकेय वळकिला परोर इन्जोर नना मिकुन इन्तोना।

⁴ परमेस्वर आपुना बुतो कियान साटि माकुन अलग अलग वरदान हिन्तोर मति पवित्र आत्मा इव सबोय वरदान हिन्तोर।

⁵ अनि परमेस्वरना अलग अलग सेवा मन्ता मति माक वरोरे प्रबुन सेवा किन्तोरोम।

⁶ अदामे माक परमेस्वरना अलग अलग बुतो किन्तोरोम मति माक सबोयि लोकुरकनिगा बुतो केवाल वरोरे परमेस्वर मन्तोर।

⁷ अनि सबोय लोकुरा फायदा आयान साटि सबोय लोकुरकुन पवित्र आत्माता उन्दि उन्दि वरदान हिता मन्ता।

⁸ मन्जे हुचुलोर लोकुरकुन पवित्र आत्माताल ग्यानते वळकानाता वरदान पुटान्ता अनि दुसरो हुचुलोर लोकुरकुन ओदे आत्माताल पकाय पोल्लोंग समजेमायाना बुद्धिता वरदान पुटान्ता,

⁹ अदामे ओदे आत्माताल हुचुलोर लोकुरकुन विस्वास इरानाता वरदान पुटान्ता अनि दुसरो हुचुलोर लोकुरकुन ओदे आत्माताल बिमारितुन सुदरे कियाना वरदान पुटान्ता।

¹⁰ अदामे हुचुलोर लोकुरकुन चमत्कारता बुतो कियाना वरदान अनि हुचुलोर लोकुरकुन परमेस्वरना पोल्लो वेहानाता वरदान अनि दुसरो हुचुलोर लोकुरकुन आत्मानुंग पुन्दानाता वरदान अनि दुसरो हुचुलोर लोकुरकुन अन्जान बोलि वळकानाता वरदान अनि हुचुलोर लोकुरकुन अन्जान बोलिता अर्थतुन लोकुरकुन समजेकिस वेहानाता वरदान पुटान्ता।

¹¹ अनि इद सबोय बुतो पवित्र आत्माता द्वारा आन्ता। अनि वरोर वरोन मानेयतुन पवित्र आत्मा आपुना इच्चाता अनुसार इव वरदान हिन्तोर।

सबोय वरदान सारकोय मन्तांग

¹² मानेयना मेन्दुल उन्दिय मन्ता मति ओद मेन्दुलता अलग अलग भाग मन्तांग। अनि ओव भाग अलग अलग मन्ज वने सबोय मिलेमास उन्दि मेन्दुल आता। इन्जोर मसिना मेन्दुल वने, मन्जे मसिलोकुरा सभा वने अदामे मन्तोर।

¹³ बाक्याकि माक यहुदिलोकुरक या यहुदि आयोर लोकुरक या गुलाम या स्वतन्त्र मन्तोरक मति माक सबोय लोकुरक उन्दिय मेन्दुल आयान साटि वरोरे पवित्र आत्माताल बपतिस्मा आता। अनि उन्दि कटोराते उताप लेहका माक सबोय लोकुरक परमेस्वरताल उन्दिय पवित्र आत्मातुन पुटतोम।

¹⁴ हुळाट उन्दि मेन्दुलतिगा केवल उन्दिय भाग मनो मति पकाय भाग मन्तांग।

¹⁵ “नना कय आयोन इन्जोर नना मेन्दुलता भाग आयोन” इदाम काल इन्दार ते इद कारणते बाताल ओद काल मेन्दुलता भाग आयो बहे? इंगो! ओद काल मेन्दुलताय भाग मन्ता।

¹⁶ अदामे “नना कोन्डा आयोन इन्जोर नना मेन्दुलता भाग आयोन” इदाम कवि इन्दार ते इद कारणते बाताल ओद कवि मेन्दुलता भाग आयो बहे? इंगो! ओद कवि मेन्दुलताय भाग मन्ता।

¹⁷ मावा सबोय मेन्दुल कोन्डांग मनवार ते माक बदाम केन्ज परकोम? अदामे मावा सबोय मेन्दुल कवि मनवारते माक बदाम मुसक मनेरोम?

^18-19 अनि मेन्दुलता सबोय कविंग मन्वारते अदेन माक बदाम मेन्दुल इन्ज मनेराट बहे? आयो! इन्ज मनेराट। इन्जोर परमेस्वर आपुना इच्चाता अनुसार मावा मेन्दुलतिगा सबोय भागतुन जोळेकिस इरतोर।

²⁰ इन्जोर मेन्दुलतुन पकाय भाग मन्ज वने ओद सबोय उन्दिय मेन्दुल मन्ता।

²¹ इन्जोर कोन्डा कयदुन “नाकुन निया जरुरि हिले” इदाम इन्दिला परो। अदामे तला कालकुन “नाकुन मिया जरुरि हिले” इदाम इन्दिला परो।

²² मति मावा मेन्दुलता बोद भाग दुसरोताल कमजोर मन्तांग इदाम समजेमान्तोरोम ओद भाग पकाय जरुरि मन्ता।

²³ इचोने आयो मति दुसरो लोकुरकुन तोहान साटि योग्य हिले ओदे भागतुन माक सन्दरा मुच सोबाय इरान्तोरोम।

²⁴ मति दुसरोन तोहान साटि योग्य मन्ता ओद भागतुन माक अदाम कियान जरुरि हिले। मति ओद महत्व हिले भागतुन वने माक पकाय आदर किस सोबाय इरान्तोरोम,

²⁵ बाक्याकि मेन्दुलता सबोय भाग उन्दि आस सोबाय बुतो केवि अनि उन्दि भाग दुसरो भागतुन मदत केवि इन्जोर परमेस्वर मावा मेन्दुलता सबोय भाग जोळेकिस बनेकितोर।

²⁶ अनि मेन्दुलता उन्दि भागतुन तकलिप आन्ता ते ओद तकलिपतासंग मेन्दुलता सबोय भागतुन वने तकलिप आन्ता, अदामे मेन्दुलता उन्दि भागतुन आदर पुटान्ता ते सबोय भागतुन वने अदेनासंग गिरदा आन्ता।

²⁷ नावा इन्दानाता अर्थ इदाम मन्ता: इदेक निमाट सबोय विस्वासि लोकुरक मसिहना मेन्दुल आन्दिट अनि मसिलोकुरा सभाता सबोय लोकुरक ओना मेन्दुलता उन्दि उन्दि भाग मन्तोरिट।

²⁸ अनि मसिलोकुरा सभातिगा परमेस्वर पहले हुचुलोर लोकुरकुन येसुना खास चेलाना रुपते ठहरे कितुर अनि दुसरो हुचुलोर लोकुरकुन परमेस्वरना पोल्लो वेहवालना रुपते ठहरे कितुर अनि तिसरो हुचुलोर लोकुरकुन आपुना पोल्लो करहिवालना रुपते ठहरे कितुर। अदेना पजा चमत्कार केवालोरकुन, बिमारिताल सुदरे केवालोरकुन, दुसरोन मदत केवालोरकुन, मुक्यालना बुतो केवालोरकुन अनि अन्जान बोलि वळकवालोरकुन ठहरे कितुर।

²⁹ इन्जोर सबोय लोकुरक येसुना खास चेला हिलेर, अनि सबोय लोकुरक परमेस्वरना पोल्लो वेहवालोर हिलेर, अदामे सबोय लोकुरक परमेस्वरना पोल्लो करिहवाल हिलेर अनि सबोय लोकुरक चमत्कार केवालोरक हिलेर।

³⁰ अदामे सबोय लोकुरकुन बिमारितुन सुदरेकियाना वरदान हिले, सबोय लोकुरकुन अन्जान बोलि वळकानाता वरदान हिले। अनि सबोय लोकुरकुन अन्जान बोलिता अर्थतुन वेहानाता वरदान हिले।

³¹ इन्जोर पवित्र आत्माता द्वारा हिता सबोयताल हजोर वरदान पुटहान साटि निमाट पकाय कोसिस किसोर मन्ट। मति इदेक नना मिकुन सबोयताल महत्वता ओद पोल्लोता बारेते वेहका।