१ कुरिन्थुस 11 - Muria Far Western

¹ नना आपुना जिवनते बदाम येसु मसिना लेहका जिवेमान्तोना अदाम निमाट वने जिवेमाम्ट।

प्रार्थना कियान बेरा तला पोरो सन्दरा मुचानाता बारेते उपदेश।

² हे बायि-दादालोरक, निमाट सबोय पोल्लोतिगा नाकुन आल्हान्तोरिट अनि बाताले नना मिकुन करिहतान अदेन मानेमास मन्तोरिट इन्जोर नना मिया प्रशंसा किन्तोना।

³ इन्जोर सबोय मुतेहना तला अदेनोर मुजो मन्तोर अनि सबोय मुजोनोर तला मसि मन्तोर अदामे मसिहनोर तला परमेस्वर मन्तोर इन्जोर इव पोल्लोनुंग निमाट समजेमाम्ट इदाम नावा इच्चा मन्ता।

⁴ अनि निमाट प्रार्थना कियानपा बोरे मानेय तला मुचुन प्रार्थना किन्तोर या परमेस्वरना पोल्लो वेहान्तोर ते ओर आपुना तला मन्जे मसिना अपमान किन्तोर।

⁵ अदामे निमाट प्रार्थना कियानपा बोदे आळ आपुना तलातुन मुचवाय प्रार्थना किन्ता या परमेस्वरना पोल्लो वेहिन्ता ते ओद वने आपुना तला मन्जे आपुना मुजोना अपमान किन्ता। बाक्याकि ओद आळ आपुना तलातुन चाटि किता लेहका मन्ता।

⁶ अनि बोदे आळ आपुना तलातुन मुचो ते ओद आपुना तलातुन चाटि कियाला पहाजे। आपुना तलातुन चाटि कियाना बोदे आळ साटि लज्जाता पोल्लो मन्ता ते ओद आपुना तलातुन मुचिला पहाजे।

⁷ मति परमेस्वर आपुनाय लेहका मानेयतुन बनेकितोर अनि ओना कारण परमेस्वरतुन पकाय आदर पुटान्ता इन्जोर मानेय आपुना तलातुन मुचमाकिर। मति आळ आपुना तलातुन मुचिला पहाजे बाक्याकि तला मुचानाता कारण अदेना मुजोन पकाय आदर पुटान्ता।

⁸ मानेय आळदाल आयो मति मानेयताल आळदुन बनेकितुर।

⁹ अनि मानेयतुन आळ साटि बनेकेवोर मति आळदुन मानेय साटि बनेहकितुर।

¹⁰ इन्जोर आळदुन आपुना तला मुचिला पहाजे बाक्याकि स्वरगदूत वने माकुन हुळिला आतोर। अनि आळ आपुना तलातुन मुचानाता कारण आळ आपुना मानेयना अदिकारते मन्ता इन्जोर तोहान्ता।

¹¹ ते वने प्रबुना संगततिगा आळ मानेयना शिवाय बाताले हिले अनि मानेय वने आळदा सिवायि बाताले हिलेर।

¹² बाक्याकि आळदुन मानेयताल बनेकितोर अदामे मानेय वने आळदाल जनम आतोर अनि सबोय बनेकेवाल परमेस्वरे मन्तोर।

¹³ उन्दि आळ आपुना तलातुन मुचवाय प्रार्थना कियाना अदेन सोबाय मन्ता बहे इन्जोर निमाट विचार किम्ट।

¹⁴ अनि मानेय लाटिह कल्क इरान्तोर ते इद ओना साटि लज्जाता पोल्लो मन्ता इन्जोर निमाट पुन्तोरिट।

¹⁵ मति उन्दि आळ लाटिह कल्क इरान्ता ते इद अदेन साटि सोबाय मन्ता बाक्याकि अदेना तला मुचान साटि परमेस्वर अदेन कल्क हितोर।

¹⁶ मति नना वेहता इद सबोय पोल्लोता बारेते बोरे वाद-विवाद कियानुर ते नना बोद पोल्लो वेहतोना अदेना सिवायि माक परमेस्वरना आरादना कियानाता दुसरो बोदे रिति हिले इन्जोर नना ओरकुन इन्तोना। अनि परमेस्वरना दुसरो सबोय सभातिगा वने इदे रिति मन्ता।

प्रबु जेवनता बारेता उपदेश

¹⁷ मति इदेक नना मिकुन वेहान्तोना ओद पोल्लोतिगा नना मिया कवतिक केवोन बाक्याकि निमाट प्रार्थना साटि उन्दि जागा मिलेमान्तोरिट असके ओद मिया फायदा साटि आयो मति मिया नुकसान साटि सन्दि आतोरिट।

¹⁸ मिकुन सबोयता मुने नना इद पोल्लो इन्दाना विचार मन्ता: प्रार्थना साटि मसिलोकुरा सभा मिलेमान्तोरिट असके मिया नडुम फुट आन्ता इन्जोर नना केन्जतान। इद पोल्लो हुचुक हुचुक खरोय मन्ता इन्जोर नना विस्वास किन्तोना।

¹⁹ ओहो! ते निमाट सोबाय कियाला आतोरिट! इन्जोर इदाम किसोर मन्ट, आयोते मिया नडुम सोबाय विस्वासि बोर मन्तोर या हिलेर इन्जोर बदाम पुन्दानुरक।

²⁰ अनि निमाट प्रबु जेवन साटि उन्दि जागा मिलेमान्तोरिट असके निमाट खरोय प्रबु जेवन आयो तिन्तोरिट।

²¹ बाक्याकि निमाट हुचुलोर लोकुरक जेवन तिन्दाना बेरा वरोन दुसरोना हर हुळवाय मुने हन्जुन आपुना जेवन पोटा पन्जनाहका तिन्तोरक इन्जोर हुचुर लोकुरक आकरिते करवस्ताय मन्तोरक अनि दुसरो लोकुरक पकाय तिन्जोर उन्डोर मन्तोरक।

²² बाताल तिन्दान उन्डान साटि मिकुन लोन हिले बहे? आयो ते निमाट केवल आपुना बारेते विचार किस बाताल परमेस्वरना आचतोर लोकुरकुन तुच्च मानेमान्तोरिट बहे? अनि बाताले हिले ओर गरिब विस्वासि लोकुरकुन निमाट लज्जा केविट बहे? अदेना बारेते नना बाताल इन्का? इदेन साटि नना मिया कवतिक कियाका बहे? बसकेय आयो! इदेन साटि नना मिया कवतिक केवोन।

प्रबु जेवन

²³ बाक्याकि नाकुन प्रबुनिकेडाल पुटता ओदे करहाना नना मिकुन सोपेकिन्तोना ओद पोल्लो इदाम मन्ता: प्रबु येसुन हव्कान साटि पयपिहतुर ओद नरका येसु रोटि येतितुर,

²⁴ अनि परमेस्वरतुन धन्यवाद किस अदेन किळहिस: “इद नावा मेन्दुल आन्दु; नाकुन आल्हान साटि निमाट इदाम किसोर मन्ट” इन्जोर इतुर।

²⁵ अदामे रोटि तितपा ओर अंगुर जोमाता कटोरातुन येतस: “इद अंगुरता जोमा नावा नतुर आन्दु अनि नावा नतुरता कारण परमेस्वर पकाय लोकुरा साटि उन्दि पुनाल करार कितुर। निमाट बसकेय प्रबु जेवनता अंगुरता जोमा उन्डकिट ते नाकुन आल्हान साटि किम्ट।”

²⁶ इदाम प्रबु येसुना मलस वायानावनाह निमाट इद रोटितुन तिन्तोरिट अनि अंगुरता जोमा उन्डतोरिट ओद सबोय बेरा निमाट प्रबुना हायानाता बारेते दुसरो लोकुरकुन वेहान्तोरिट इन्जोर नना पोलुस मिकुन इन्तोनान।

²⁷ इन्जोर बोरायि खरोय रितिते इद प्रबु जेवनता रोटि तिनोरक अनि अंगुरता जोमा उनोरक ओरकुन प्रबुना मेन्दुलता अनि नतुरता विरोद दोषि ठहरे कियानुर।

²⁸ इन्जोर निमाट मुने आप आपुनतुन सोबाय परिक्षा किस प्रबु जेवनता रोटि तिन्ट अनि कटोरातिगाडाल अंगुरता जोमा उन्ट।

²⁹ बाक्याकि प्रबुना मेन्दुल मसिलोकुरा सभा मन्ता अनि नना प्रबुना ओद सभाता भाग मन्तोना इद पोल्लोतुन समजेमायोर प्रबु जेवनता रोटि तिन्तोर अनि अंगुरता जोमा उन्तोर ओर मानेय ओद तिन्दाना उन्डानाते ओर आपुनानिगा परमेस्वरना दन्ड येतान्तोर।

³⁰ अनि निमाट लोकुरकनिकेडाल पकाय लोकुरक अदाम समजेमायोर आस प्रबु जेवन येतितुरक इन्जोर ओरक कमजोर अनि बिमार आतुरक अनि पकाय लोकुरक वने हातोरक।

³¹ मति माक आप आपुनतुन सोबाय रितिते परिक्षा किस मनेराट ते आपुनिगा परमेस्वरना दन्ड आयो आस मनवार।

³² अनि इदाम प्रबुना मेन्दुलता बारेते पुनोर आस माक प्रबु जेवन तिन्तोरोम इन्जोर प्रबु मावा न्याय किस माकुन दन्ड हिन्तोर असके माक पकाय पोल्लोंग करियान्तोरोम। बाक्याकि माक दुनियाता आकरिते परमेस्वरतुन पुनोर दुनियाता लोकुरासंग दन्ड पुटमाकि इन्जोर मन्ता।

³³ इन्जोर हे नावोर बायि-दादालोरक, निमाट प्रबु जेवन साटि मिलेमान्तोरिट असके तिन्दान साटि वरोर दुसरोना हर हुळाट।

³⁴ अनि खरोय बोरे करवस्ता मन्तोर ते ओर आपुना लोताले तिन्जवायिर। बाक्याकि निमाट सोबाय रितिते प्रबु जेवन साटि मिलेमाय परान्तोरिट असके परमेस्वर मिया न्याय किस मिकुन दन्ड हेवोर आयनुर। अनि नना पोलुस मलस वायका असके पिसतांग पोल्लोता बारेते मिकुन वेहका।