१ कुरिन्थुस 10 - Muria Far Western

मूरति पुजाता विरोद चेतावनि।

¹ हे बायि-दादालोरक, निमाट इद पोल्लो जरुर पुन्ट इन्जोर नावा इच्चा मन्ता: मावोर सबोय बाबो दादिलोरक मूसाना परके ताकसोर ताकसोर रेंगाल समुद्रतिगाडाल हतोरक अनि आबार ओरा पोरो ओरासंग मन्ज ओत।

² इद ओरा साटि बपतिस्मा लेहका मन्ता। इदाम ओरक सबोय लोकुरकुन आबारता अडिय अनि समुद्रता नडुम हन्ज मूसाना चेलाना रुपते बपतिस्मा येतितुर।

³ अनि परमेस्वर हिसोर वास मतोर ओद विशेषाल जेवनतुन सबोय लोकुरक तिन्दुरक।

⁴ अनि ओरा साटि उन्दि आदितिगाडाल परमेस्वर चमत्कार किस एर टन्तुर। ओरक सबोय लोकुरक ओद एर उतुरक। ओरा संग हन्दुर ओद दिव्य आदिताल ओर सबोयि लोकुरक उतुरक अनि ओद आदि मसिये मतोर।

⁵ मति परमेस्वर ओरागडाल पकाय लोकुराताल गिरदा आयोर इन्जोर ओरकुन केळातिगा नाश कितोर ओरा मुरदाहकुन हिके होके किसितुर।

⁶ ओरक लालुच कितुरक अदाम माक खराब चिजता लालुच केमाट इन्जोर इव पोल्लोंग मावा साटि उदाहरण आतुंग।

⁷ ओर लोकुरकनिगाडाल हुचुलोर लोकुरक मूरति पुजा केवालोर बनेमातुरक अदाम निमाट वने मूरति पुजा केवाल बनेमायमाट। बाक्याकि “लोकुरक तिन्दिला उन्डिला उदितुरक अनि येन्चोर गिरदा कियाला तेदितुरक” इन्जोर पवित्र पुस्तकतिगा कोटता मन्ता।

⁸ अनि ओर लोकुरकनिगा पकायि लोकुरक व्यभिचार किस उन्दि दियाते तेविस हजार लोकुरक हातुरक, इन्जोर माक वने बसकेय व्यभिचार केमाट।

⁹ अनि ओर लोकुरकनिगा हुचुलोर लोकुरक प्रबुन परिक्षा कितुरक अनि तरास कसकुन ओरकुन हव्कतु, इन्जोर माक वने प्रबुना परिक्षा केमाट।

¹⁰ ओर लोकुरकनिगा बळबळेमान्दुर हुचुलोर लोकुरकुन नाश केवाल स्वरगदूत नाश कितुर, इन्जोर ओरा लेहका निमाट बळबळे मायमाट।

¹¹ माक इद दुनियातिगा आकरि बेरातिगा मनवाल मन्तोरोम इन्जोर माक हुशयारिते मन्दान साटि उन्दि चेतावनि लेहका इद पोल्लो कोटतोर।

¹² इन्जोर मियागडाल बोरे मानेय विस्वास मजबुत मन्ता इदाम विचार किन्तोर ते ओर पकाय हुशयारिते मन्दिला पहाजे बाक्याकि केळातिगा नाश आतोरक ओर लोकुरा लेहका निमा वने नाश आयकि।

¹³ मानेय सहेकिया परोर इदाम बोदे परिक्षा मियागा इदेक वने वायो। अनि परमेस्वर विस्वास योग्य मन्तोर। ओर मिकुन सहेन किया परो अचोन परिक्षा मिया पोरो वायाना परवांगि हेवोर। अनि निमाट परिक्षाते अरानपा ओद परिक्षाताल बाहरो पसियान साटि हरि वने ओर तोहान्तोर।

निमाट मूरति पुजा केमाट

¹⁴ इन्जोर हे नावोर प्रिय गोतियालोरक, निमाट मूरति पुजाताल लक मन्ट इदाम नना इन्तोना।

¹⁵ निमाट समाजदार मन्तोरिट इन्जोर नना मिकुन इन्तोना; नना इन्तोना ओद पोल्लो खरोय मन्ता या खोटाल मन्ता इद निमाट विचार किम्ट।

¹⁶ अनि प्रबु जेवनता बेरा माक परमेस्वरतुन धन्यवाद किस अंगुरता जोमा उन्तोरोम असके मसिना नतुरता संगत बनेमान्तोरोम। अदाम माक रोटि किळहिच तिन्तोरोम असके माक मसिना मेन्दुलता संगत बनेमान्तोरोम।

¹⁷ रोटि उन्दि मन्ता। माक उन्दि रोटितुन किळिहिच तिन्तोरोम इन्जोर माक पकाय लोकुरक मन्ज वने माक उन्दिय मेन्दुल बनेमान्तोरोम।

¹⁸ इस्रायेल जातिता लोकुरा रिवाजतुन हुळाट: वेदितिगा बोदायि बलि हिन्तोर असके ओर अदेन तिन्तोरक अनि अदेनिगा संगत बनेमान्तोरक।

¹⁹ ओव मूरतिंग परमेस्वरे आयोंग अनि अवेहकुन बलि हिता जेवनता वने बाताले महत्व हिले इदाम नावा इन्दाना अर्थ मन्ता।

²⁰ अनि मूरतिता मुने यहुदि आयोरक लोकुरक बलि हिन्तोर ओद बलि ओरक परमेस्वरतुन हेवोर मति दुष्टात्मातुन हिन्तोर इन्जोर निमाट वने दुष्टात्माता पुजातिगा संगत आयमाट इदाम नावा इच्चा मन्ता।

²¹ निमाट उन्दि बेरा प्रबु जेवनतिगा वने उन्डाना अनि दुष्टात्मातुन हिता जेवनतिगाडाल वने उन्डा परविट। अनि निमाट प्रबु जेवनतिगा वने तिन्दाना अनि मूरतितुन हिता जेवनतिगाडाल वने तिन्ज दुष्टात्माता संगत किया परविट।

²² माक इदाम किन्तोरोम ते माक परमेस्वरतुन पकाय होंग वानाहका किन्तोरोम असके माक ओना दन्डताल पिसिला परोम बाक्याकि माक परमेस्वरताल पकाय लाव हिले।

माक आपुना जिवन्ते दरोज परमेस्वरिन मानेमासोर मनिट

²³ “माकुन सबोय पोल्लो कियान साटि लेहचितुर” इन्जोर मियागडाल हुचुलोर लोकुरक इन्तोरक। मति विस्वासतिगा मजबुत कियान साटि सबोय पोल्लोंग बाताले फायिदाता अनि मदतता हिलेंग।

²⁴ इन्जोर मियागडाल बोरे मानेय केवल आपुनाय फायदाता बारेते विचार केमाकिर मति दुसरोना फायदा साटि वने विचार किम्ट।

²⁵ इन्जोर हविंग हाटुमताल बाताले हविंग असकुन निमाट तिन्दिला परान्तोरिट। अनि अव हविंग ओरा मूरतितुन बलि हिता हविंग आन्दु इदाम मिया मन्दिगा विचार केमाट।

²⁶ बाक्याकि “दरति अनि अदेनिगा बाताल आयि मन्ता ओद सबोय प्रबुनाय आन्दु” इन्जोर पवित्र पुस्तकतिगा कोटता मन्ता।

²⁷ अनि बोरे मसि विस्वासि आयोर मानेय मिकुन जेवन साटि आपुना लोन केयान्तोर ते मिया इच्चा मन्ता ते निमाट हन्ट। अनि मिकुन तिन्दिला हियानुर ओद सबोय चिज मन्दे बाराय तळमळे मायवाय तिन्ट।

^28-29 मति “इद जेवन मूरतितुन बलि हिता मन्ता इन्जोर तिनमा” इदाम दुसरो बोरे निकुन वेहिन्तोर ते ओना मन्दा विचारता कारण ओद जेवन तिनमा। इदेनते निकुन बाताले तकलिप वायार इन्जोर आयो मति दुसरोन इदेनते तकलिप आयार इन्जोर निमा तिनमा।

³⁰ “नावा स्वतन्त्र दुसरोना मन्दा विचारता कारण बाताल बन्द कियाला पाहाजे बहे?” “नना परमेस्वरना धन्यवाद किस तिन्तोना अदेना बारेते दुसरोन बदाम दोष लावेकिया परान्तोना?” अदाम निमा विचार किन्तोन।

³¹ इन्जोर निमा बातालाय तिन या उन्ड या बाताले किम ते ओद परमेस्वरना महिमासाटि किम।

³² यहुदिलोकुरक साटि अनि यहुदि आयोर लोकुरक साटि अनि मसिलोकुरा सभातुन साटि बोदे दोखाता कारण निमाट बनेमायमाट।

³³ नना आपुना फायदा आयो मति सबोय लोकुरक पापताल पिसिहला पहाजे इन्जोर दुसरो लोकुरा फायदा साटि सबोय लोकुरकुन सबोय पोल्लोतिगा गिरदा कियाना कोसिस किन्तोना।