१ कुरिन्थुस 1 - Muria Far Western

पोलुसना अभिवादन

¹ येसु मसिनोर खास चेला आस परमेस्वर आपुना इच्चाते आचतोर नना पोलुस, अनि नावा संगे मन्तोर मावोर तमो सोस्तनेस वने कुरिन्थुस सहेरतिगा मनवालोरक मसिलोकुरा सभा साटि,

² येसु मसिना द्वारा पवित्र किहितुर अनि सबोय लोकुरकनिगा मावोर अनि ओरा प्रबु येसु मसिना आरादना केवालोर सबोय लोकुरासंग परमेस्वरना पवित्र लोकुरक आयान साटि केयतोर निमाट लोकुरकुनेय इद पत्र कोटान्तोरोम;

³ मावोर बाबो परमेस्वरनिकेडाल अनि प्रबु येसु मसिनिकेडाल मिकुन दया अनि शान्ति पुटसोर मनि।

आत्मिक वरदान साटि पोलुस परमेस्वरना धन्यवाद किन्तोर

⁴ निमाट येसु मसिना लोकुरक आन्तोरिट इन्जोर परमेस्वर मियागा पकाय दया कितोर अदेनते नना मिया साटि परमेस्वरतुन दरोज धन्यवाद किन्तोना।

^5-6 निमाट मसिनासंग उन्दि आतिट अदेनते परमेस्वरना आत्मा मिकुन तोहता परमेस्वरना पोल्लो वेहान साटि परमेस्वर पकाय लाव अनि परमेस्वरना पोल्लोंग समजेमायान साटि ओर पकाय ग्यान हिस आत्मिक जिवनते सबोय रितिते परमेस्वर मिकुन संपन्न कितुर। इद रितिते माक मिकुन मसिना बारेते वेहता गवाहि खरोय किस पका आत।

⁷ अदेनते पवित्र आत्मा परमेस्वरना बुतो कियान साटि विस्वासि लोकुरकुन हियाना बोदे वरदानतिगा बाताले कमि मिकुन हिले आस निमाट मावोर प्रबु येसु मसिना असा मलस वायाना पकाय ध्यान किस हर हुळिला आतोरिट।

⁸ मावोर प्रबु येसु मसि न्याय कियान साटि असा मलस वायाना दिया निमाट निरदोष मनकिट इन्जोर परमेस्वर मिकुन आकरिवनाह मजबुत इरानुर।

⁹ आपुनोर मरि अनि मावोर प्रबु येसु मसिना संगते मन्दान साटि मिकुन केयतोर परमेस्वर विस्वास योग्य मन्तोर।

मसिलोकुरकनिगा फुट

¹⁰ हे बायि-दादालोरक, निमाट सबोय आपसते उन्दिय जिवा आस मिया नडुम बोदे फुट आयमाकि अनि उन्दिय मन अनि उन्दिय विचारते मिलेमास मन्दिला पहाजे इन्जोर मावोर प्रबु येसु मसिना अदिकारते नना मिकुन विनन्ति किन्तोना।

¹¹ हे नावोर बायि-दादालोरक, निमाट होंग आन्तोरिट इन्जोर खरोय हेलाळना लोतोर लोकुरक नाकुन मिया बारेते वेहतोरक।

¹² मिया नडुम हुचुलोर लोकुरक: “नना पोलुसना दलतोर आन्दोम” अनि दुसरो लोकुरक “माक अपलुसना दलतोर आन्दोम” अनि दुसरो लोकुरक “माक पतरसना दलतोर आन्दोम” अनि दुसरो लोकुरक “माक मसिना दलतोर आन्दोम” इदाम इन्तोरक।

¹³ बाताल मसिहा तुकळेंग आतोर बहे? नना पोलुस मिया साटि कुरुस पोरो हातान बहे? या बाताल निमाट पोलुसना पोरोयते बपतिस्मा येतितिट बहे?

^14-15 पोलुस नाकुन ओना चेला आयान साटि आपुना पोरोयते बपतिस्मा हितोर इदाम बोरे इन्दिला परोरइन्जोर क्रिसपुस अनि गयुसतुन तासिस नना मियागडाल बोने बपतिस्मा हेवोन इन्जोर नना परमेस्वरना धन्यवाद किन्तोना।

¹⁶ (इंगो, नना स्तिफनासना लोतोर लोकुरकुन वने बपतिस्मा हितान। येरकुन तासिस बोरे दुसरो लोकुरकुन नना बपतिस्मा हितान इन्जोर नना पुनोन।)

¹⁷ बपतिस्मा हियान साटि आयो मति येसु मसिना सोबाता पोल्लो वेहान साटि मसि नाकुन लोहतोर; नना येसु मसिना सोबाता पोल्लो मानेयना बुद्धिता पोल्लोता अनुसार वळकोन बाक्याकि नना बुद्धिता अनुसार वळकस मनेना ते मसिना क्रुस पोरो हायानाता पोल्लो लोकुरा मन्दे बुतो केवो आस मनवार।

मसि परमेस्वरना लाव अनि ग्यान मन्तोर।

¹⁸ मसि कुरुस पोरो हायानाता बारेता पोल्लो नाश आयवालोरकुन बेकार पोल्लो मन्ता मति पिसिहचोरे मन्तोर माकुन ते ओद पोल्लो परमेस्वरना लाव मन्ता।

¹⁹ बाक्याकि “नना ग्यानि मानेयना ग्यानतुन नाश किहिका अनि बुद्धिमान मानेयना बुद्धितुन बेकार कियाका” इन्जोर पवित्र पुस्तकतिगा कोटता मन्ता।

²⁰ इदाम मन्ता ते ग्यानि लोकुरा या मूसाना नियमतुन करिहवालोर लोकुरक या इद दुनियाता पकाय बुद्धिते वाद-विवाद केवाल लोकुरा बारेते इदेक माक बाताल वळकिकाट? परमेस्वर इद दुनियाता ग्यानतुन बोदे बुतोता हिले इदाम बेकार बनेकितुर।

²¹ परमेस्वर खरोय ग्यानि मन्तोर। ओर परमेस्वर लोकुरक बचोने ग्यानि मनिरक ते वने ओरक आपुना ग्यानते ओन पुन्दिला परोर इदाम ओरकुन पुनपरवाहका कितुर। इदेना बदला परमेस्वरतुन पुनोर लोकुरक बेकार इन्तोर माक वळकिन्तोरोम मसिना बारेते ओद सोबाता पोल्लोतिगा विस्वास केवालोरकुन पिसहाना परमेस्वरतुन सोबाय लाकतु।

²² यहुदिलोकुरक इद सोबाता पोल्लोतुन बेकार मन्ता इदाम विचार किस इद सोबाता पोल्लोतुन खरोय मन्ता इदाम विस्वास कियान साटि आबारता उन्दि चिन्हा तलकान्तोरक। अनि युनानि लोकुरक ते ग्यानता पोल्लो केन्जाना इच्चा किन्तोरक।

²³ मति माक ते लोकुरकुन पापताल पिसहान साटि कुरुस पोरो हातुर ओर येसु मसिना बारेता सोबाता पोल्लोतुन वेहिन्तोरोम। इदेनते पकाय यहुदिलोकुरक मावा विरोद कियाना कारण मन्ता अनि यहुदि आयोर लोकुरक इद सोबाता पोल्लो उन्दि बेकार पोल्लो मन्ता इदाम समजेमान्तोरक ते वने,

²⁴ यहुदि मनिर या युनानि मनिर परमेस्वर आचतोर सबोय लोकुरक साटि मसि परमेस्वरना लाव अनि परमेस्वरना ग्यान मन्तोर ओर मसिन माक वळकिन्तोरोम।

²⁵ बाक्याकि परमेस्वरना बेकार लेहका लागान्ता पोल्लो मानेयना ग्यानताल वने पकायि हजोर ग्यान मन्ता। परमेस्वरना कमजोरे लेहका लागान्ता पोल्लो मानेयना लावताल वने पकाय लाव मन्ता।

²⁶ हे बायि-दादालोरक परमेस्वर मिकुन आचतोर असके निमाट बदाम मन्जोर मतोरिट अदेना बारेते विचार किम्ट। मानेयना हुळानाते मियागडाल पकाय लोकुरक ग्यानि या पकाय लाववाले या हजोर हजोर लोतोर वने हिलेर।

²⁷ मति बोरे मानेय परमेस्वरना मुने घमन्ड केमाकिर इन्जोर परमेस्वर ग्यानि लोकुरकुन लज्जाकियान साटि दुनियाता बेकार लोकुरकुन आचतुर। अनि लाववालेकुन लज्जा कियान साटि परमेस्वर दुनियाता कमजोर मानेयतुन आचतुर।

²⁸ अनि माक हजोर मन्ता इन्तोरोम ओद पोल्लोतुन बाताले हिले इदाम बनेकियान साटि दुनियाता निच अनि बाताले हिले लोकुरकुन अनि बोदे विशेषाल हिले लोकुरकुन परमेस्वर आचतुर।

²⁹ बोरे मानेय परमेस्वरना मुने हजोरपण किया परमाकिर इन्जोर परमेस्वर इदाम कितुर।

³⁰ परमेस्वरे मिकुन येसु मसिनसंग मिलेह कितुर अनि परमेस्वर मसिन मावोर ग्यान बनेकितुर। मसि माकुन परमेस्वरना मुने येताना योग्य अनि परमेस्वरना पवित्र लोकुरक बनेकिस माकुन पापता सबोय बन्दनताल लेहच हितुर।

³¹ पवित्र पुस्तकतिगा कोटता लेहका “बोरे हजोरपणते वळकाना इच्चा किन्तोर ते ओर प्रबु बाताल किस मतोर अदेना बारेते हजोरपण कियालागार।”