Zakariya 13 - Kifuliiru

Rurema agasivya abaleevi beꞌbibeesha

¹ «Ku yikyo kyanya, ishyoko igatondeera ukuhinga, gira iyeruuse ibyaha bya beene Dahudi, neꞌbyaꞌbatuulaga beꞌYerusaleemu.»

² Nahano woꞌbushobozi bwoshi, adetaga kwokuno: «Ku kirya kyanya, ngashaaza imigisi mu Bahisiraheeri. Kiri naꞌmaziina gaayo, gagayibagirwa lwoshi-lwoshi. «Ngazimiiza abaleevi beꞌbibeesha, kiri neꞌmizimu íri mu bakoleesa.

³ Iri umundu angashubi tanga ubuleevi bweꞌbibeesha, emwe! Yishe bo na nyina boonyene, bagamúbwira: “Si ufitiirwi ukubeesha kwiꞌziina lya Nahano. Aahago! Ukufwa, ugaafwa!” Neꞌkyanya agaaba aki gweti agaadeta ubuleevi bweꞌbibeesha, lyo balya babusi boonyene, bagayami múyita neꞌngooti.

⁴ «Ku yikyo kyanya, umundu ukutanga ubuleevi bweꞌbibeesha, kugamúteeza ishoni. Batagaki yambala imirondo íyahangwa mu bwoya, mbu batebe abandu kwo balyagagi baleevi.

⁵ Si ngiisi muguma, agakizi deta, ti: “Niehe ndalyagagi muleevi, nanga! Si ndi mulimi naaho. Nyamiri ndi mulimi ukulyokera mu busore bwani!”

⁶ Neꞌri umundu angamúbuuzagya, ti: “Yizi nguma íziri mu boneka ku magala gaawe, ziri za bikagi?”, anashuvye, ti: “Nꞌgakomerekera imwa mwira wani!”»

Ibibuzi byashaabuka

⁷ Nahano woꞌbushobozi bwoshi, adeta kwokuno: «E ngooti, uvyukage, gira uteere uwitu. Ee ma! Uyitage umungere, halinde ibibuzi biyami shaabuka. Kiri na naani, ngateera ibyanabuzi.»

⁸ Nahano anashubi detaga kwokuno: «Mu bandu ba mu kino kihugo, ibimaanye bibiri byaꞌkashatu, bigaminikwa. Kihande kiguma naaho, kyo kigasigala mwo.

⁹ Yabo ábagaaba bakoli sigiiri, ngabaleeza mu muliro, halinde banayeruuke. Ikyanya ngabayeruusa mu muliro, kugaaba nga kuyeruusa inooro neꞌharija. Ikyanya bagaaba bakola beeru, bagandabaaza, naani na mbashuvye. Ngaadeta, ti: “Bandu baani, yaba!” Nabo, ti: “Nahano, ye Rurema witu!”»