Zaburi 99 - Kifuliiru

Nahano ali mwami

¹ Nahano, ye mwami, anabwatiiri ha kati ka bamakerubi. Kwokwo, abandu beꞌmilala yoshi bakizi juguma. Bakizi lenga mwoꞌmusisi hooshi mu kihugo.

² Mu kaaya keꞌSayuni, Nahano ye mukulu. Kiri na mu mahanga, ye sumbiri bweneene abandi booshi.

³ E Nahano, yabo booshi bakizi yivuga iziina lyawe. Mukuba, liri likulu, linali lya kahebuuza, linali lyeru bweneene.

⁴ E mwami, uli mu ba kihagange, unakuuziri ukuli. Mu Bahisiraheeri, we keera ukasikamya íbikwaniini, unagweti ugaagira íbikwaniini mu kati koꞌkuli.

⁵ Rurema Nahamwitu, ali mweru bweneene. Kwokwo, mukizi fukama imbere lyage, iri munamúhuuza.

⁶ Musa na Harooni, bâli riiri mu bagingi baage. Samweri naye, âli mu bandu ábâli kizi mútabaaza. Neꞌkyanya Abahisiraheeri bâli kizi mútabaaza ku malira, anakizi bashuvya.

⁷ Âli kizi baganuuza mu nguliro yeꞌkibungu. Neꞌkyanya akabaheereza imaaja, banakizi zikulikira.

⁸ E Rurema, Nahamwitu, ikyanya abandu baawe bâli kizi kutabaaza, wanakizi bashuvya, wanakizi bakoga. Haliko, ikyanya bâli kizi gira amabi, wanakizi bahana.

⁹ Mukizi huuza Rurema Nahamwitu. Ee! Mukizi múyikumba ku mugazi gwage mutaluule. Mukuba, Rurema Nahamwitu ali mweru bweneene.