Zaburi 98 - Kifuliiru

Mukizi yimbira Nahano

1 Izaburi.

¹ Izaburi. Mukizi yimbira Nahano ulwimbo luhyahya. Mukuba, ayamiri ali noꞌbushobozi, anali mweru. Ali mu gira ibya kahebuuza, iri anahimana ku njira yeꞌkitangaaza.

² Nahano, keera akayerekana kwo ali muhimi bweneene. Anayerekana kwo ali woꞌkuli, kiri na mu bandu baꞌmahanga gooshi.

³ Akalagaania Abahisiraheeri kwo agakizi bakunda, anakengiiri umuhango gwage, anakizi bayereka kwakundi kwo ali mwemeera. Abandu baꞌmahanga gooshi keera bakabona ngiisi kwo ali mu kiza.

⁴ Mwe bandu baꞌmahanga gooshi, mukizi bandira Nahano akabuuli. Mukizi na múhuuza, iri munayimba ku bushambaale.

⁵ Ee! Mukizi yimbira Nahano, iri munalasa inzeeze ku njira ísimisiizi.

⁶ Mukizi dihiriza ibibuga. Mukizi lasa naꞌmahembe. Nahano ye mwami witu. Mukizi múbandira akabuuli.

⁷ Inyaaja na íbigiri mwo byoshi, bikizi múbandira utubuuli. Ikihugo na íbikiri mwo byoshi, nabyo bikizi múbandira two.

⁸ Inyiiji zikizi koma amagasha ku busiime. Neꞌmigazi ikizi yimba ku bushambaale.

⁹ Ee! Yibyo byoshi bikizi yimbira Nahano, bwo agayiji twa imaaja za ábali mu kihugo. Yizo maaja, agakizi zitwira ábali mu kihugo nga kwo bibakwaniini, mu kati koꞌkuli.