Zaburi 95 - Kifuliiru

Tukizi yimbira Nahano ku bushambaale

¹ Muyije, tukizi yimbira Nahano ku bushambaale. Tukizi múbandira akabuuli, awi yiyi yiyi! Mukuba, Nahano ye Lwala lwo tuli mu kizibwa mwo.

² Kwokwo, tukizi yija imbere lyage, tugweti tugatanga kongwa, iri tunamúyimbira inyimbo zoꞌbwivuge.

³ Nahano, ye Rurema yenyene, anali mukulu bweneene. Ye mwami úkuliiri bweneene abandi ábali mu yikumbwa booshi.

⁴ I kuzimu, iri yeꞌmwage. Kiri naꞌmarango ku migazi, gali geꞌmwage.

⁵ Inyaaja ziri zeꞌmwage, bwo ye kazibumba. Kiri noꞌbulambo, akabubumba yenyene.

⁶ Aaho! Bwo Nahano ye katubumba, muyijage, tuyiname imbere lyage, mu kumúyikumba, tukizi múfukamira.

⁷ Mukuba, ali Rurema witu, ye nali mu tuhahalira. Tuli bibuzi byage, anagweti agatulanga bwija. Bwangabiiri bwija, mukizi yuvwiriza izu lyage zeene.

⁸ Mukuba, Nahano adetaga kwokuno: «Mutashubi yumuusa imitima yinyu, nga kwo bashokuluza biinyu bakagira i Meriba, na nga kwo bakagira mwiꞌshamba lyeꞌMasa.

⁹ Kundu bâli kizi bona ibitangaaza byo nâli kizi bagirira, haliko bâli kizi ngeza-ngeza naaho, iri banambigiiriza.

¹⁰ Kyanatuma yikyo kibusi, ngaahisa imyaka makumi gana ngirakariiri. Nanadeta: “Yaba bandu, imitima yabo iyamiri igweti igahabuka. Ikyanya ndi mu bayereka ngiisi byo ndi mu gira, batali mu ndwaza.”

¹¹ Kyo kitumiri nꞌgashiikiza ku buraakari bwani kwokuno: “Yabo bandu batâye yingire mu buluhuukiro bwani.”»