Zaburi 82 - Kifuliiru

Rurema ye mutwi weꞌmaaja zaꞌba mu kihugo

1 Izaburi ya Hasafu.

¹ Izaburi ya Hasafu. Rurema ye yimangiiri umuhumaanano gwa mwiꞌgulu, ye nali mu twa imaaja zeꞌbindi íbiri mu yikumbwa, ti:

² «Si muli mu kundirira banangora-mabi! Aaho! Mugakizi babulanira halinde mangoki?

³ Mugirage mukizi bulanira ifuuvi, na banakahuku, kuguma naꞌbakeni na ábagoozirwi.

⁴ Ee! Abakeni na ábatashobwiri babe bo mugaakiza, mu kubaguluula mu maboko ga banangora-mabi.

⁵ «Mwe banangora-mabi, si ndaakyo muyiji, mutanali mu sobanukirwa. Ku kyanya indaliro zooshi zeꞌkihugo zigweti zigashaganibwa, muli mu kizi genda mugamamaata mu kihulu.

⁶ Nꞌgadeta kwokuno: “Mweshi, mulyagagi bamungu! Ee! Muli baana ba Rurema úli hiꞌgulu lya byoshi.”

⁷ Kundu kwokwo, mugaafwa nyene, ngaꞌbandi bandu booshi. Ee ma! Narufu amùgweti, kuguma naꞌbandi batwali booshi.»

⁸ E Rurema, uyimukage, maashi! Ukizi twa imaaja za booshi ba mu kihugo. Si abandu baꞌmahanga gooshi bali beꞌmwawe!