Zaburi 8 - Kifuliiru

Iziina lyawe liri mwoꞌbulangashane

¹ Imwoꞌmwimangizi waꞌbimbi. Izaburi ya Dahudi. Luli mu yimbwa ngeꞌnyimbo za beene Gaati.

² E Nahano, Nahamwitu, iziina lyawe liri mwoꞌbulangashane mu mahanga gooshi. Ubulangashane bwawe buhisiri kiri na mwiꞌgulu.

³ Keera ukayigiriza abaana ngiisi kwo bagakizi kuhuuza, kiri na boꞌtulenge. Kwokwo, lyaꞌbagoma baawe bagaaziba utunwa twabo, kuguma na ábagweti bagaagira mbu bakuhangirire.

⁴ Byoshi íbiri kwiꞌgulu, we kabibumba naꞌmaboko gaawe. We kabiika umwezi neꞌndonde ahandu haabyo. Yibyo byoshi, ikyanya ngweti ngabiyitoneesa kwo, ndi mu yibuuza:

⁵ Umundu ali nga nyandi, halinde uki múkengiiri, unakizi múhahalira?

⁶ Ukamúgira abe mwiꞌdako lyawe hiniini. Wanamúyambika ulushembe, halinde anagingikwa mu kati koꞌbulangashane.

⁷ Ibindu byoshi, ikyanya ukabibumba, wanabiika umundu akizi bitwala. Yibyo byoshi, ukabibiika mwiꞌdako lyaꞌmagulu gaage:

⁸ ibibuzi neꞌngaavu, neꞌnyamiishwa zooshi za mu kishuka,

⁹ noꞌtunyuni twa mu kyanyaanya, neꞌfwi mu nyaaja, kiri neꞌbindi byoshi íbiri mu yoleka-yoleka mwo.

¹⁰ E Nahano, Nahamwitu! Iziina lyawe, liri mwoꞌbulangashane mu mahanga gooshi.