Zaburi 79 - Kifuliiru

Uyijage duba, utubonere ulukogo

1 Izaburi ya Hasafu.

¹ Izaburi ya Hasafu. E Rurema, ibinyamahanga keera bikateera ikihugo kyawe, byanayulubaza kiri neꞌnyumba yawe ndaluule. Akaaya kooshi keꞌYerusaleemu, kakoli ba mushaka.

² Ibirunda byaꞌbakozi baawe, bikola mu jojomolwa noꞌtunyuni, binakola mu liibwa na barumungu.

³ Na bwo ndaaye woꞌkubaziika, bakola mu bolera i bulambo. Umuko gwaꞌbandu gwâli kizi golomba mu Yerusaleemu nga nyiiji.

⁴ Buno, yibyo binyamahanga, bikiri mu tuhonyoleza, wa honyo. Bikiri mu tuhonyoleza, iri binatushekeereza.

⁵ E Nahano, ka ugayama uturakariiri halinde imyaka neꞌmyakuula? Uluugi lwawe lugagenderera ukuyaka halinde mangoki?

⁶ Yubwo buraakari bwawe, ubuyonerage ku binyamahanga. Si boohe, batagweti bagakutwaza. Yago maami ágatasimbahiri iziina lyawe, gabe go ugakizi rakarira.

⁷ Mukuba, keera bakamirangusa abandu baawe Abahisiraheeri, banashereeza neꞌkihugo kyabo.

⁸ Bashokuluza biitu, bâli kizi yifunda mu byaha. Kundu kwokwo, tutali twe tukwaniini ukuhanwa. Yoho wee! Si tukoli vunisiri imitima. Aaho! Uyijage duba, utubonere ulukogo.

⁹ E Rurema, Lukiza witu, ututabaale, we kongwa, halinde wenyene ukizi gingikwa. Utukoge ibyaha biitu, unatuguluule, halinde iziina lyawe likizi yivugwa.

¹⁰ E Rurema, ibinyamahanga keera byayona umuko gwaꞌbakozi baawe. Aahago! Kituma kiki wangaki leka kwo bikizi tuhonyoleza ti: «Rurema winyu alyagagi hayi?» E Rurema, utuyereke ngiisi kwo ugayihoola ibinyamahanga.

¹¹ Ukizi yuvwiriza amalira gaꞌbashweke. Ee! Yabo bashweke, kundu bakatwirwa ulubaaja lwoꞌkuyitwa, haliko ubakizagye ku bukalage bwawe buhamu.

¹² E Nahano, yibyo binyamahanga kwo bituzungulusiri, ikyanya biri mu kizi kutuka, ubihaniirize ubugira kalinda.

¹³ Twe bandu baawe, tuli bibuzi bya mu ndagiriro yawe. Tugakizi kuyivuga imyaka neꞌmyakuula, halinde ku bibusi byoshi.