Zaburi 75 - Kifuliiru

Rurema naaho ye mutwi weꞌmaaja

¹ Imwoꞌmwimangizi waꞌbimbi. Izaburi ya Hasafu. Ulwimbo. Luli mu yimbwa ngoꞌlwimbo «Utakizi shereeza.»

² E Rurema, tugweti tugakutangira kongwa, tunali mu menyeesania hiꞌgulu lyeꞌbitangaaza byawe. Mukuba, uli mu kizi tubeera hoofi-hoofi.

³ Rurema adetaga kwokuno: «Ngola ngaatwa imaaja. Nganazitwa ku kyanya íkikwaniini, na ku njira yoꞌkuli.

⁴ Ikihugo na íbiri mwo byoshi, kundu bigalenga mwoꞌmusisi, haliko niehe ndi mu sikamya indaliro zaakyo.

⁵ Keera nꞌgabwira abanabwihemye kwokuno: “Muleke ukuyikangaata.” Nanabwira na banangora-mabi: “Mutakizi yiheemya.

⁶ E maashi! Mutakizi gira mbu muyidundulike imbere lyani, mutanakizi ba mindagabika.”»

⁷ Ndaaye mundu úwangatwa ulubaaja lwoꞌwabo, aba alyoka uluhande lweꞌmuga, kandi iri lweꞌsheere, kandi iri wa mu mbande ziꞌshamba.

⁸ Si Rurema naaho, ye yamiri ali mutwi weꞌmaaja. Ee ma! Ye mu kuza muguma, anatindimaze ugundi.

⁹ Nahano afumbiiti urukuzo úluyijwiri mwoꞌburaakari bwage, anali mu bunywesa banangora-mabi booshi. Bagweti bagabugotomera, batanasige kiri neꞌndooni.

¹⁰ Haliko niehe, ngakizi yimba inyimbo zoꞌkuyivuga Rurema wa Yakobo, na ngizi múshambaalira imyaka neꞌmyakuula.

¹¹ Rurema adetaga kwokuno: «Imisi ya banangora-mabi booshi, ngagivuna. Haliko, ngiisi ábali mu ngulikira, boohe, ngabasikamya.»