Zaburi 67 - Kifuliiru

Abandu beꞌmilala yoshi bakizi yivuga Rurema

¹ Imwoꞌmwimangizi waꞌbimbi. Luli mu yimbwa neꞌnanga. Ulwimbo.

² E Rurema, ukizi tubonera ulukogo, unakizi tugashaanira. Amalanga gaawe gakizi tutanguulira.

³ Kwokwo, lyeꞌnjira zaawe zigamenyeekana mu kihugo, halinde abandu baꞌmahanga gooshi banamenye ngiisi kwo ugweti ugakizi kiza.

⁴ E Rurema, abandu beꞌmilala yoshi bakizi kuyivuga. Ukizi yivugwa mu bandu baꞌmahanga gooshi.

⁵ Yabo booshi, bakizi kushagalukira, iri banayimba ku bushambaale. Mukuba, ubatwaziri ku njira yoꞌkuli, unali mu rongoora abandu booshi.

⁶ E Rurema, abandu beꞌmilala yoshi bakizi kuyivuga. Ukizi yivugwa mu bandu baꞌmahanga gooshi.

⁷ Kwokwo, lyeꞌkihugo kigayera, na Rurema anakizi tugashaanira.

⁸ Ee! Agakizi tugashaanira, gira lyaꞌbandu booshi bakizi músimbaha, halinde heꞌkihugo kihekiiri.