Zaburi 63 - Kifuliiru

Ikyanya ngiri noꞌmuuka, ngakizi kuyivuga

¹ Izaburi ya Dahudi. Ikayandikwa ku kyanya âli riiri mwiꞌshamba lyeꞌBuyuda.

² E Rurema, wehe we Rurema wani. Nguloziizi bweneene. Umutima gwani gunyotiirwi hiꞌgulu lyawe. Kiri naꞌmagala gaani gakoli yumiri, ngiꞌdaho íryabula amiiji.

³ Keera nꞌgakubona mu nyumba yawe, nanaloleekeza ubushobozi bwawe, noꞌbulangashane bwawe.

⁴ Urukundo lwawe, lwo luli naꞌkamaro ukuhima ubugumaana. Kyo kitumiri ngakizi kuyivuga.

⁵ Ikyanya ngiri noꞌmuuka, ngakizi kuyivuga, na ngizi golola amaboko hiꞌgulu, mu kuhuuna kwiꞌziina lyawe.

⁶ Ngoli siimiri bweneene, ukuhima umundu úwalya íbiheshiri. Kwokwo, ngakizi kuyivuga, mu kukuyimbira.

⁷ Ikyanya ndi mu ba ngwejiiri, ndi mu kukengeera. Ubushigi bwoshi, ndi mu kizi yitoneesa hiꞌgulu lyawe.

⁸ Bwo ugweti ugakizi ndabaala, ndi mu kizi yimba mu kimbehwa kyeꞌbyubi byawe.

⁹ Na bwoꞌkuboko kwawe kuli mu kizi njuutira, ngakizi beera hoofi lyawe.

¹⁰ Kundu abandu bangaba baloziizi ukunyita, haliko bagashereezibwa naaho, banalindimulirwe i nakwere.

¹¹ Bagayitwa ku ngooti. Neꞌbirunda byabo, binaliibwe na banyambwe.

¹² Haliko, mwami agashambaalira Rurema. Ee! Ngiisi ábali mu biika Rurema kwoꞌmulangaaliro, bagakizi múyivuga. Si abanabibeesha, boohe, bagahulisibwa.