Zaburi 61 - Kifuliiru

Ndoziizi kwo ngizi tuula mu nyumba yawe ndaluule

¹ Izaburi ya Dahudi, imwoꞌmwimangizi waꞌbimbi. Iri mu yimbwa kwiꞌzu lyoꞌlulanga.

² E Rurema, uyuvwirize ngiisi kwo ngweti ngakulirira. Bwo ngweti ngakuhuuna, undege amatwiri.

³ Ukulyokera heꞌkihugo kihekiiri, ngweti ngakuhamagala. Si umutima gwani gukoli shengusiri. Kwokwo, undongoore halinde ku lwala úlushuumiri.

⁴ Ikyanya abagoma bâli kizi gira mbu bandeere, we wâli kizi njuutira. Ee ma! We Luzitiro lwani.

⁵ Ndoziizi kwo ngizi tuula mu nyumba yawe ndaluule, ngizi langwa mu byubi byawe.

⁶ E Rurema, keera ukayuvwa ngiisi kwo nꞌgakulagaania. Keera wanambeereza ubuhyane mu bakusimbahiri.

⁷ E Rurema, ubulamu bwa mwami, ubuyushuulage kweꞌsiku nyingi. Imyaka yage ihike ku bibusi bingi.

⁸ Leka mwami akizi twala imbere lyawe, halinde imyaka neꞌmyakuula. Ukizi múlanga mu kuyemeerana, na mu kukundana.

⁹ E Rurema, ngakizi yama ngweti ngayimbira iziina lyawe. Na ngiisi byo nꞌgakulagaania, ngakizi bikwiza ngiisi lusiku.