Zaburi 58 - Kifuliiru

Rurema ye mutwi weꞌmaaja

¹ Imwoꞌmwimangizi waꞌbimbi. Izaburi ya Dahudi. Luli mu yimbwa ngoꞌlwimbo «Utakizi shereeza.»

² E batwali, ka muli mu deta ukuli? Nanga, maashi! Si mugweti mugatwira abandu imaaja ku njira za kundi-kundi!

³ Mu mitima yinyu, mushungisiri íbitali nga byo. Munagweti mugakizi shereeza hooshi mu kihugo.

⁴ Banangora-mabi bali mu butwa bali bihabusiri mu mabi gaabo. Bakoli teeresiri, banali mu deta-deta ibibeesha naaho.

⁵ Amagambo gaabo gagweti gagakizi yitana nga manjoka-njoka. Banali banduuvwa, nga hinakirindi.

⁶ Ee ma! Kundu abafumu bagweti bagaalasa inyimbo nyija bweneene, hitaziyuvwiti.

⁷ E Nahano Rurema, yabo bandu, ubakuulage amiino. Ee! Bweꞌmihenga yabo iri nga yeꞌndare, ugihoohole.

⁸ Imyambi yabo ikizi vunika-vunika. Bakizi nyerera, nga miiji ágali mu lenga mu mushenyu.

⁹ Ee! Banyerere nga kweꞌkishongo kiri mu nyerera mwiꞌzuuba. Banabe ngiꞌbunda íryashalamuka, buzira kubona izuuba.

¹⁰ Rurema agayami baminika duba-duba, ukuhima kweꞌnyungu ziri mu longa ukuduuta ku muliro gweꞌshaali.

¹¹ Balya banangora-mabi, ikyanya bagaahanwa, lyaꞌbandu boꞌkuli bagashambaala, iri banakizi fina mu muko gwabo.

¹² Kwokwo, abandu banadete: Rurema agweti agatwira abandu ulubaaja ku njira íkwaniini, halinde abandu biija bakizi longa ukuhembwa.