Zaburi 57 - Kifuliiru

Ngweti ngatakira Rurema

¹ Imwoꞌmwimangizi waꞌbimbi. Izaburi ya Dahudi, ku kyanya akapuumuka Sahuli halinde mu lwala. Luli mu yimbwa ngoꞌlwimbo «Utakizi shereeza».

² E Rurema, si ngola mu libuuka bweneene! Aaho! Unyuvwirwe indengeerwa. Buno ngweti ngatibitira imwawe, mu kimbehwa kyeꞌbyubi byawe, halinde yago malibu gatee lenga.

³ Ngweti ngatakira Rurema, bwo ali hiꞌgulu lya byoshi. Ee ma! Ngiisi byo ashungisiri, agabingirira.

⁴ Agweti agandabaala ukulyoka mwiꞌgulu, anangize. Ali mu ba anguuziri, mu kuyemeerana. Si abagoma baani boohe, ikyanya bagweti bagandambiriza, Rurema ali mu kizi bayogogoza.

⁵ Yabo bagoma bagweti baganzokanana nga ndare, gira balonge ukunjanganula. Amiino gaabo galyagagi muugi, nga matumu, na ngeꞌmyambi. Ikyanya bali mu deta, amagambo gaabo gali mu tumitana nga ngooti.

⁶ E Rurema, ukizi huuzibwa áhali hiꞌgulu lya mwiꞌgulu. Ubulangashane bwawe bukizi tanguula mu kihugo kyoshi.

⁷ Balya bagoma bakoli yinisiri imibashu, mbu lyo bangwasa. Kyo kitumiri ngoli shengusiri bweneene. Banali mu humba ubuhya, gira nyiji butibukira mwo. Kundu kwokwo, bulya buhya, bali mu buyihongoleka mwo boonyene.

⁸ E Rurema, umutima gwani gusikamiri. Ee! Gukoli sikamiri ngana-ngana. Kwokwo, ngakizi kuyimbira, mu kukuyivuga.

⁹ E mutima gwani, uvyukage! Kiri neꞌnzeeze neꞌnanga, muvyuke. Ngavyula umukyo noꞌlwimbo lwani.

¹⁰ E Nahano, ngakizi kuyivuga imbere lyaꞌbandu booshi. Na ngizi kuyimbira inyimbo zoꞌkukuhuuza mu binyamahanga.

¹¹ Mukuba, urukundo lwawe luhisiri halinde mwiꞌgulu. Noꞌbwemeera bwawe buhisiri mu bibungu.

¹² E Rurema, ukizi huuzibwa mwiꞌgulu. Ubulangashane bwawe, bukwirage hooshi mu kihugo.