Zaburi 43 - Kifuliiru

Ndi mu tibitira Rurema

¹ E Rurema, yaba bandu batakutwaziizi. Ku yukwo, umbulanire imbere lyabo, halinde ndonge ukuli kwani. Ee! Ungize mu banabibeesha, na mu banangora-mabi.

² E Rurema, we ndi mu tibitira. Aahago! Kituma kiki wanyibagira? Na kituma kiki wandekeerera ngizagi genda ngaalira? Si abagoma bagweti bagandibuza bweneene!

³ E Rurema, undumire umulengeerwe gwawe noꞌkuli kwawe, bibe byo bigakizi ndongoora. Binandwale ku mugazi gwawe mweru, halya handu ho utuuziri wenyene.

⁴ Haaho, na ngende ha katanda kaawe. Mukuba, we ngweti ngashambaalira, unali we busiime bwani. E Rurema wani, ngakizi kuyivuga, mu kukizi lasa inzeeze.

⁵ E mutima gwani, kituma kikagi ukoli jengiirwi, unakoli shengusiri? Ubiikage umulangaaliro gwawe imwa Rurema. Ye mu ngiza, ye na Rurema wani. Ee ma! Ngaki shubi múyivuga.