Zaburi 29 - Kifuliiru

Rurema akizi haabwa ubulangashane

1 Izaburi ya Dahudi.

¹ Izaburi ya Dahudi. E baganda ba mwiꞌgulu, mweshi mukizi huuza Nahano! Mukizi múhuuza hiꞌgulu lyoꞌbulangashane bwage noꞌbushobozi bwage.

² Mukizi huuza Nahano, bwiꞌziina lyage likwaniini ukulonga ubulangashane. Munakizi múhuuza, bwo ali mweru bweneene.

³ Izu lya Nahano Rurema, liri mu yuvwikana ku miiji. Na bwo ali mwoꞌbulangashane, ali mu kizi kungula. Ee! Ali mu kizi kungula hiꞌgulu lyeꞌnyaaja.

⁴ Yiryo izu lyage, liri noꞌbushobozi bweneene, linali lya kahebuuza.

⁵ Izu lya Nahano liri mu koona ibiti byeꞌmyerezi. Irya munda i Lebanooni, agweti agabijajagula-jajagula.

⁶ Agweti agasimbusa-simbusa imigazi yeꞌLebanooni, nga nyana iri mu ganga. Agweti agasimbusa-simbusa umugazi Herimooni nga mwana weꞌmbogo.

⁷ Yiryo izu lya Nahano, ligweti ligalavya bweneene,

⁸ linali mu juguuvya ishamba. Ee! Agweti agajuguuvya ishamba lyeꞌKadeeshi.

⁹ Yiryo izu lya Nahano, ligweti ligarandura ibiti byeꞌmikamba. Liri mu shooshola ibiti byoshi mu lubako. Booshi mu nyumba yage bagweti bagaadeta kwokuno: «Rurema akizi haabwa ubulangashane!»

¹⁰ Nahano atwaziri hiꞌgulu lyoꞌmwijulire. Yenyene alyagagi mwami, anatwaziri imyaka neꞌmyakuula.

¹¹ Nahano agweti agatabaala abandu baage, gira babe bihagarusi. Anali mu bagashaanira mu kati koꞌmutuula!