Zaburi 24 - Kifuliiru

Rurema ali mu nyumba yage

1 Izaburi ya Dahudi.

¹ Izaburi ya Dahudi. Ikihugo, na byoshi íbikiri mwo, biri bya Nahano. Amahanga gali geꞌmwage, kuguma na booshi ábagatuuziri mwo.

² Kino kihugo, akakitereka áhali amiiji mingi. Haaho, ho akakisikamya.

³ Aaho! Nyandi úwangateramira ku mugazi gwa Nahano, mbu agendi yimanga mu nyumba yage ndaluule?

⁴ Ábahangwirwi ukugenda yo naaho, babe bandu baꞌmaboko gaabo gali shululu, neꞌmitima yabo, inabe iyeruusiri. Batagweti bagayikumba imigisi, batanali mu biika indahiro zeꞌbibeesha.

⁵ Baabo, bo Nahano agaadeta kwo batungiini. Bo na Rurema, Lukiza wabo agakizi gashaanira.

⁶ E Rurema wa Yakobo, abandu mwene yabo, bo bangakuyijira, banayiji kuyikumba.

⁷ E nyiivi zaꞌkaaya, mwe muyamiri ho, muyiguke. Muyigukage, gira mwami woꞌbulangashane ayingire.

⁸ Uyo mwami woꞌbulangashane, ali nyandi? Ali Nahano woꞌbushobozi bwoshi, ulya kihagarusi. Ee! Ye mu ba kihagarusi mwiꞌzibo.

⁹ E nyiivi zaꞌkaaya, mwe muyamiri ho, muyiguke! Muyigukage, gira mwami woꞌbulangashane ayingire.

¹⁰ Uyo mwami woꞌbulangashane, ali nyandagi? Ali Nahano woꞌbushobozi bwoshi. Yoyo, ye mwami woꞌbulangashane.