Zaburi 20 - Kifuliiru

Ikyanya ugalonga amakuba, Nahano akizi kutabaala

¹ Imwoꞌmwimangizi waꞌbimbi. Izaburi ya Dahudi.

² Ikyanya ugalonga amakuba, Nahano akizi kutabaala. Ee! Iziina lya Rurema wa Yakobo, likizi kulanga.

³ Akizi kutumira ubutabaazi, ukulyoka mu nyumba yage nyeeru. Akizi na kusikamya ukulyoka ku mugazi Sayuni.

⁴ Amatuulo gooshi go watanga, akizi gakengeera, kiri naꞌmatuulo gaawe goꞌkusiriiza.

⁵ Ikyanya ugakizi yifwija igambo mu mutima gwawe, akizi kuheereza lyo. Ishungi zaawe zooshi, akizi zigenduusa.

⁶ Ikyanya ugaahima, tugakizi banda utubuuli ku busiime, awi yiyi yiyi! Tunashonie niꞌrembera, hiꞌgulu liꞌziina lya Rurema witu. Ngiisi byo ugakizi huuna Nahano, akizi kuheereza byo.

⁷ Bwo Nahano keera akatoolaga umwami, anamúshiiga amavuta, nyiji kwo aganamúkiza. Ee ma! Agamúshuvya ukulyoka mwiꞌgulu, Ahandu Heeru. Na mu kumúkiza, agakoleesa ubushobozi bwage.

⁸ Bandu baguma, bakoli biisiri umulangaaliro ku magaare giꞌzibo. Abandi, bali mu gubiika ku fwarasi. Haliko twehe, tuli mu gubiika imwa Rurema Nahamwitu.

⁹ Yabo bandi, bagasiitara ngana, banayibumbulike haashi. Haliko twehe, tugayimuka, tunabe tuki sikamiri.

¹⁰ E Nahano, ukizi gashaanira mwami, halinde ahime. Ikyanya tugakizi kutabaaza, ukizi tushuvya.