Zaburi 16 - Kifuliiru

Ndi mu shambaalira ukubeera imbere lya Rurema

1 Izaburi ya Dahudi.

¹ Izaburi ya Dahudi. E Rurema, we mbiisiri kwoꞌmulangaaliro. Aaho! Ukizi ndanga.

² Ndi mu bwira Rurema, ti: «We Nahamwitu, ngiisi biija byo ndi mu longa, bilyosiri imwawe naaho.»

³ Abemeera baawe, kwo batuuziri mu kihugo, bo bali mu gingikwa. Baabo, bo banali mu nzimiisa.

⁴ Ngiisi ábali mu yifunda mu byeꞌmizimu, bali mu yiyushuulira umwizingeerwe. Si niehe, ikyanya bagagendi gitangira amatuulo, ndâye bayibiike kwo. Amaziina gaayo, kiri noꞌkugadeta, gatâye huluke mu kanwa kaani.

⁵ E Nahamwitu, keera ukambiikira ubuhyane bwani. Na byoshi byo ukambiikira, wanabisikamya.

⁶ Ngiisi ho kambiika kwo nduule, emwe, imbibi zaaho zisimisiizi bweneene. Yubwo buhyane bwo nꞌgahaabwa, ku kasiisa, bugweti buganjambaaza ngana-ngana.

⁷ Nahano ayamiri ali mu mbanuula. Ku yukwo, ngakizi múyivuga. Kiri na bushigi, umutima gwani gugweti guganyigiriza.

⁸ Nyamiri ndi mu biika Nahano imbere lyani. Na bwo ali uluhande lwani lweꞌlulyo, ndaabyo íbyangaki njagania.

⁹ Ku yukwo, umutima gwani gushagalusiri, na ngoli shambiiri. Kiri naꞌmagala gaani, gagatuula gakingiirwi.

¹⁰ Bwo ndi mutaluule wawe, utagandekera i kuzimu, utagayemeera kwaꞌmagala gaani gabolere yo.

¹¹ Uganyereka ngiisi kwo nangatuula bwija. Unanjambaaze imbere lyawe, halinde ngizi beera uluhande lwawe lweꞌlulyo, na mbe njagalusiri, halinde imyaka neꞌmyakuula.