Zaburi 149 - Kifuliiru

Mukizi yimbira Nahano ulwimbo luhyahya

¹ Tukizi huuza Nahano! Mukizi yimbira Nahano ulwimbo luhyahya. Mukizi múhuuza mu muhumaanano gwaꞌbandu baage.

² E Bahisiraheeri, keera akamùbumba. Kwokwo, mukizi múshambaalira. Abandu beꞌSayuni, bakizi shagalukira umwami wabo.

³ Mukizi yivuga iziina lyage mu kukizi likinira. Mukizi lihuuza mu kulasa ingoma, kiri neꞌnzeeze.

⁴ Nahano asiimiri abandu baage. Ngiisi ábali batuudu, ali mu bakiza, anabagingike.

⁵ Kwokwo, abandu baage bakizi shambaala mu kumúgingika. Kiri neꞌkyanya bali ku ngingo zaabo, bakizi múyimbira ku bushambaale.

⁶ Bakizi yivuga Rurema noꞌtunwa twabo. Banabe bafumbiiti ingooti zaꞌmuugi gabiri,

⁷ gira bakizi yihoola ibinyamahanga, mu kubahaniiriza.

⁸ Bakoneereze abaami baabo neꞌminyororo, banashweke naꞌbatwali baabo noꞌtubangira.

⁹ Kwokwo, lyo bagaahana ibinyamahanga, nga kwo Rurema akayandika. Kwokwo, kwaꞌbandu baage bagakizi longa ubulangashane. Tukizi huuza Nahano!