Zaburi 146 - Kifuliiru

Ngakizi huuza Rurema

¹ Tukizi huuza Nahano! Ngakizi huuza Nahano ku mutima gwani gwoshi,

² kiri na mu burambe bwani bwoshi. Ku kyanya ngaaba ngiri ho, ngakizi yimbira Rurema wani inyimbo zoꞌbwivuge.

³ Mutakizi biika umulangaaliro ku batwali. Si boohe, bali ba kufwa naaho, batanâye kize!

⁴ Ikyanya bali mu fwagaga, bali mu yami galukira mu luvu. Ku lwolwo lusiku, ngiisi byo batáshungisiri, binayami fwa ubusha.

⁵ Ahiriirwi ngiisi úgweti úgakizi longa ubutabaazi imwa Rurema wa Yakobo, anabe amúbiisiri kwoꞌmulangaaliro. Yoyo, ye Rurema Nahamwabo.

⁶ Nahano akabumba igulu, neꞌkihugo, neꞌnyaaja, na byoshi íbibiri mwo. Anayamiri ali mwemeera, halinde imyaka neꞌmyakuula.

⁷ Ngiisi ábakandamiirwi, ali mu kizi baheereza íbibakwaniini. Na ngiisi ábashalisiri, ali mu baheereza ibyokulya. Na ábashwesirwi mu mbohe, ali mu bashwekuula.

⁸ Na ábahumiri, ali mu bahumuula. Na ábayinamiri, ali mu bayinamula. Ngiisi ábakwaniini imbere lyage, ali mu ba abakuuziri.

⁹ Nahano ali mu kizi tanduula ábalyosiri i mahanga. Anali mu tabaala neꞌfuuvi, na banamufwiri. Si abandu babi boohe, kundu bashungisiri amabi, ali mu bahangirira.

¹⁰ E bandu beꞌSayuni, Rurema Nahamwinyu ayamiri atwaziri imyaka neꞌmyakuula, halinde mu bibusi byoshi. Tukizi huuza Nahano!