Zaburi 142 - Kifuliiru

Dahudi atabaaza Nahano

¹ Izaburi ya Dahudi, ku kyanya âli bishamiri mu lwala, anatabaaza Rurema.

² Ngweti ngalirira Nahano kwiꞌzu lihamu, gira anyuvwirwe indengeerwa.

³ Na ndi mu múyereka amalibu gaani, ngiisi kwo ngoli goozirwi.

⁴ Ngiisi ho ndi mu lenga, abagoma bali mu gwanwa bambiikira heꞌmitego. Kundu kwokwo, ikyanya ngoli yihebwiri, wenyene uyiji injira yo ngwaniini ukufuuka mwo.

⁵ Ngweti ngalooza woꞌkuyiji ndabaala, haliko, ndaaye úndwaziizi. Ndaanaye úli mu mbahala, ndaanaho nangatibitira.

⁶ E Nahano, we kongwa, ngweti ngakulirira kwokuno: «Wehe we butibitiro bwani. Ikyanya ngiri mugumaana, wehe naaho, we ndoziizi.»

⁷ Buno, keera najagabuka. Aaho! Ukizi yuvwa ngiisi kwo ndi mu lira. Balya bagoma baani, bakoli mbimiri imisi. E maashi! Ubangize mwo.

⁸ Undyose mwiꞌno nyumba yeꞌmbohe, lyo ndonga ukukizi huuza iziina lyawe. Haaho ngiisi ábakwaniini, bagaaba banzokaniini, mu kubona amiija mingi go wangirira.