Zaburi 141 - Kifuliiru

E Nahano, ukizi ndanga naꞌkanwa

1 Izaburi ya Dahudi.

¹ Izaburi ya Dahudi. E Nahano, ngweti ngakuhamagala. Aaho! Uvwaruke, we kongwa, uyiji ndabaala. Ikyanya ndi mu kutabaaza, ukizi yuvwiriza izu lyani.

² Yaga mahuuno gaani, ukizi gayuvwa nga mubadu úguli mu tuuma ikyusi imbere lyawe. Ikyanya ndi mu lengeza amaboko gaani mu kukuhuuna, kukizi ba ngiꞌtuulo lyaꞌkabigingwe.

³ E Nahano, ukizi langa akanwa kaani. Unakizi kashweka, ndayiji kengeera nadeta buligo.

⁴ Ukizi langa noꞌmutima gwani, gutahemukire amabi. Utalekage kwo ngizi yibiika ku bali mu kizi gira ibihigo. Na kundu ibyokulya byabo byangaba biheshiri ngana, haliko, utaleke mbu ngizi birya kwo.

⁵ Bwangaba bwija, umundu woꞌkuli anganukire. Kiri noꞌkuhimbula, angambimbula. Ikyanya agiraga kwokwo, iri angira bwija. Kwangabiiri nga mavuta go anyonera mwiꞌtwe. Ee! Itwe lyani, litangalahira. Ngakizi huuna Rurema, kwo ahangirire banangora-mabi ku mabi gaabo.

⁶ Banahamwabo, ikyanya baganyanyagwa ku nyaala, lyo bagayemeera kwaꞌmagambo gaani gali goꞌkuli.

⁷ Bagaadeta: «Nga kwaꞌmabuye gali mu zuulwa neꞌfuka, kwo naꞌmavuha giitu keera gakashaabulwa hiꞌheero.»

⁸ E Nahano woꞌbushobozi bwoshi, wehe, we mbiisiri kwoꞌmulangaaliro. We na ngweti ngatibitira. Kwokwo, utandekere ho nangasiga itwe lyani.

⁹ Yabo bandu, si balyagagi banangora-mabi! Aahago! Ikyanya bali mu ba bandeziri imitego, ukizi ndanga.

¹⁰ Iyo mitego yabo, bagiyiduudike mwo boonyene. Haliko niehe, ndonge ukukizi gibambala.