Zaburi 137 - Kifuliiru

Ikimombo mu kihugo kyeꞌmahanga

¹ Ikyanya twâli bwatiiri ku ngombe zeꞌnyiiji zeꞌBabeeri, twanakengeera akaaya keꞌSayuni, twanatondeera ukulira.

² Ee! Ku kirya kyanya, tukatee manika inzeeze ziitu ku biti byazo.

³ Balya ábakatutwala i mahanga, banakizi looza kwo tubayimbire inyimbo zeꞌYerusaleemu. Ee! Yabo ábâli kizi tushundeeza, bâli loziizi kwo tubashambaaze, banakizi tuhidika, ti: «Mu zirya nyimbo zeꞌSayuni, mutee tuyimbiraga luguma.»

⁴ Aahago! Twe tuhungiiri mu kihugo kyeꞌmahanga, kutagi kwo twangaki yimba mweꞌnyimbo za Nahano?

⁵ E kaaya keꞌYerusaleemu, iri nangakuyibagira, ukuboko kwani kweꞌlulyo kunahangalale.

⁶ Iri nangaleka ukukizi kukengeera, na mbe ndaki bwini kwo we tumiri tushambiiri, ululimi lwani lunagobwe.

⁷ E Nahano, i Yerusaleemu, ulusiku abagoma bakagigwata imbohe, ukengeere ngiisi kwaꞌBahedoomu bâli kizi honyoleza, ti: «Yako kaaya, mukahongole. Ee! Mukunyule kiri neꞌndaliro zaako.»

⁸ E maashi, bandu beꞌBabeeri, si mwenyene mukolaga mugaminikwa! Galya mabi go mwâli kizi tukolera, bahiriirwi, ngiisi ábagamùgalulira go.

⁹ Bahiriirwi, ngiisi ábagayiji gwata abaana biinyu, banakizi bashangula ku maala.