Zaburi 130 - Kifuliiru

Ngweti ngalindirira Nahano

1 Luli mu yimbwa na ábali mu zamuukira i Yerusaleemu.

¹ Luli mu yimbwa na ábali mu zamuukira i Yerusaleemu. E Nahano, ngola mu longa amakuba mahamu bweneene. Kyo kitumiri ngweti ngakutabaaza.

² Kwokwo, unyuvwirwe indengeerwa. Unandegage amatwiri, uyuvwe ngiisi kwo ndi mu deta.

³ E Nahano, iri wangakulikiriza ibyaha biitu, nyandagi úwangaki yimanga imbere lyawe?

⁴ Kundu kwokwo, ukiri mu kogana. Ku yukwo, ukwaniini ukizi simbahwa.

⁵ Ngi lindiriiri Nahano, gira andabaale. Ee! Umutima gwani gugweti gugamúlindirira. MwiꞌGambo lyage, mwo mbiisiri umulangaaliro.

⁶ Umutima gwani guli mu lindirira Nahano, ukuhima kwoꞌmulaliizi ali mu lindirira kwo bukye. Ee! Ukuhima kwoꞌmulaliizi ali mu lindirira kwo bukye.

⁷ E Bahisiraheeri, mukizi biika umulangaaliro imwa Nahano. Mukuba, ye mu kizi kundana, ye na shobwiri ukukiza abandu.

⁸ Yehe yenyene, agaguluula Abahisiraheeri kulyoka mu mabi gaabo gooshi.