Zaburi 13 - Kifuliiru

E Rurema, si ukoli mbinduliiri ingoto!

¹ Imwoꞌmwimangizi waꞌbimbi. Izaburi ya Dahudi.

² E Nahano, ugakizi nyibagira halinde mangoki? Ka halinde imyaka neꞌmyakuula? Si ukoli mbinduliiri ingoto!

³ Abagoma baani bagweti bagambima. Aahago! Ngashenguka mu kati koꞌmwizingeerwe, halinde mangoki?

⁴ E Rurema Nahamwitu, undole kwo, unanjuvye, maashi! Umulengeerwe gushubi kizi moleka mu masu gaani. Buzira kwokwo, Narufu agandwala ngana.

⁵ Utaleke abagoma baani bayihaye, mbu: «Keera twamúhima!» Batanashambaale, mbu bambima.

⁶ Ngweti ngalangaalira ku rukundo lwawe. Ee ma! Bwo we mu ngiza, umutima gwani guki shambiiri. E Nahano, bwo we kiri mu ngirira amiija, ngakizi kuyimbira.