Zaburi 120 - Kifuliiru

Nꞌgatabaaza Nahano, ananjuvya

1 Luli mu yimbwa na ábali mu zamuukira i Yerusaleemu.

¹ Luli mu yimbwa na ábali mu zamuukira i Yerusaleemu. Ikyanya nâli kizi libuuka, nꞌgatabaaza Nahano, ananjuvya.

² E Nahano, buno kandi, abandu bagweti bagambeeshera, banali mu teberezania. Aahago! Ungizagye, maashi!

³ E batebesi, kuti kwo Rurema agamùgira, halinde muhanirizibwe lwoshi-lwoshi?

⁴ Si mugakizi tumitwa neꞌmyambi myugi-myugi, munagendi singoolerwa mwiꞌbengesheeshe lyoꞌmuliro!

⁵ Yayewe imwani! Si nduuziragi mu banakuhambwa beꞌMesheki, na mu maheema geꞌKedaari!

⁶ Balya bandu, bashombiri umutuula bweneene. Na bwo keera nahisa isiku nyingi, ngoli batuuziri mwo, ngoli luhiri bweneene.

⁷ Niehe nienyene, kundu ngweti ngalooza umutuula, si boohe, bali mu looza naaho kwo bagendi gira izibo.