Zaburi 113 - Kifuliiru

Tukizi huuza Nahano

¹ Tukizi huuza Nahano! E bakozi ba Nahano, mukizi múhuuza. Mukizi huuza iziina lyage.

² Ee! Iziina lyage likizi huuzibwa, ukulyokera buno, halinde imyaka neꞌmyakuula.

³ Likizi huuzibwa imunda izuuba liri mu huluka, halinde ukuhisa imunda liri mu sookera.

⁴ Nahano ali mu ba akuziibwi hiꞌgulu lyaꞌbandu booshi. Ubulangashane bwage, buhisiri halinde mwiꞌgulu.

⁵ Rurema Nahamwitu, twangamúshushirania na nyandi? Si abwatiiri ku kitumbi kyoꞌbwami mwiꞌgulu!

⁶ Haaho mwiꞌgulu, ali mu yinama, mu kulangiiza hiꞌfwo mu kyanyaanya, kiri na hano haashi mu kihugo.

⁷ Nahano ali mu lyosa banakahuku mu luvu, anabakuze. Ee! Ali mu kizi bayinamula, bashaage mwiꞌjolera.

⁸ Yabo bakeni, ali mu kizi babwataza kuguma naꞌbaluzi, gira bakizi twala abandu baage kuguma.

⁹ Umukazi, kundu angaba agumbiri, haliko Rurema ali mu múshambaaza mu nyumba yage, anamúheereze abaana. Tukizi huuza Nahano!