Zaburi 112 - Kifuliiru

Bahiriirwi ngiisi ábasimbahiri Nahano

¹ Tukizi huuza Nahano! Bahiriirwi ngiisi ábasimbahiri Nahano, banasimbahiri neꞌmaaja zaage.

² Abaana baabo bagakizi ba bikalage mu kihugo, banabe bagashaniirwi.

³ Imikolezi yabo miija, igakizi genderera, halinde imyaka neꞌmyakuula. Neꞌnyumba zaabo, zigakizi lundwa mwaꞌkanyabungaka keꞌbindu.

⁴ Yabo bandu boꞌkuli, kundu bangaba bakola mu kihulu, haliko, umulengeerwe gugakizi batanguulira. Bagweti bagakizi tabaalana, banali mu gashanirana, banali mu yuvwiranwa indengeerwa.

⁵ Ee! Yabo bandu, bali mu shagaluka, banali mu kaabana, buzira kuhuuna ubunguke. Bali mu ba bakulikiriziizi ukuli. Kyo kitumiri bagakizi gashaanirwa.

⁶ Ku kasiisa, abandu boꞌkuli batâye kakazibwe. Si bayamiri bakengiirwi imyaka neꞌmyakuula!

⁷ Yabo bandu batayobohiri, mbu bangayiji kangwa neꞌmyazi mibi. Si imitima yabo isikamiri, inabiisiri Nahano kwoꞌmulangaaliro.

⁸ Ee! Bweꞌmitima yabo isikamiri, batayobohiri. Na hagaatama, bagaabona ngiisi kwaꞌbagoma baabo bagaahimwa.

⁹ Yabo bandu, bali mu kizi tabaala abakeni ku mutima úgushenguusiri, banayamiri bakulikiiri íbikwaniini, halinde imyaka neꞌmyakuula. Kinatume bagagingikwa bweneene.

¹⁰ Si balya banangora-mabi, ikyanya bagaabona kwokwo, bagayagalwa, banakizi shya amiino ku bute, bakabuli nyerera. Ee! Yabo banangora-mabi, ngiisi byo bagweti bagayifwija, batâye bilonge.