Zaburi 101 - Kifuliiru

Mwami alagaania

1 Izaburi ya Dahudi.

¹ Izaburi ya Dahudi. E Nahano, ngakizi kuyimbira inyimbo zoꞌbwivuge, na ngizi menyeesania ngiisi kwo uli mu kundana, na ngiisi kwo ukwaniini.

² Na nviitirwe ukutuula buzira kashembo. Aaho! Ugayiji ndabaala mangoki? Mu nyumba yani, ngatuula ku njira íkwaniini.

³ Ndâye bande amasu ku bitali nga byo. Ikyanya abandu bagakuhinduliraga ingoto, ngaabona buligo. Naꞌbandu mwene yabo, ndagabayegeera.

⁴ Yabo bandu, ikyanya bagayitoneesa ku mabi, ndagabatwaza, si ngakizi babona buligo, na nyisumbure hala bweneene.

⁵ Ikyanya abandu bagakizi gamba abatuulani baabo, ngakizi yami bahulisa. Neꞌkyanya bagakizi yikangaata, banabe bali mu kyokolana, ndagabalekeerera.

⁶ Ikyanya ngaleeza amasu mu kihugo, ngakizi lola naaho ku bemeera. Boohe naaho, bo tugakizi kombeeranwa. Ee! Ngiisi ábagakizi ngolera naaho, bali baabalya bazira kashembo.

⁷ Si abanabibeesha boohe, ndagahanguula kwo bakizi ngolera. Ndaanaye munabibeesha úgahanguulwa kwo anyegeere.

⁸ Balya banangora-mabi booshi, ngiisi lusiku ngakizi bashaaza mu kihugo. Ndagabalekeerera, mbu bakizi libuza abandu mu kaaya ka Nahano.