Zaburi 1 - Kifuliiru

Umuteeko gwa mbere ( Zaburi 1–41 ) Injira zibiri zoꞌkulama

¹ Ahiriirwi, umundu útali mu twaza banangora-mabi, anabe atabakombiiri. Ikyanya bagweti bagashekeereza ibya Rurema, atali mu bayibiika kwo.

² Si yehe ayamiri akuuziri imaaja za Nahano, anali mu kizi ziyitoneesa kwo, ubushigi niꞌzuuba.

³ Uyo mundu ali mu ba nga kiti kibyale ha butambi lyoꞌlwiji, kinali mu kizi tongeka ku kyanya kyakyo. Ibyasi byakyo, bitâye bogame. Na ngiisi byo ali mu gira, biri mu múgenduukira.

⁴ Si balya banangora-mabi, nanga! Boohe, bali mu saazibwa ngana, nga biguhulu íbiri mu yehuulwa neꞌmbuusi.

⁵ Ku yukwo, ikyanya bagatwirwa ulubaaja, batagalegama. Mukuba, ndaaye munabyaha, úgalegama mu bakwaniini.

⁶ Amasu ga Nahano, gayamiri gali mu tanduula ábakwaniini. Si banangora-mabi boohe, injira zaabo ziri mu bahabura.