Nahumu 1 - Kifuliiru

¹ Ino ndumwa, iyerekiini amabone goꞌmuleevi Nahumu, wa mu kaaya keꞌHerikoshi, inadesiri hiꞌgulu lyaꞌkaaya keꞌNinaawi.

Nahano arakarira i Ninaawi

² Nahano Rurema alyagagi munaluugi, anagweti agayihoola. Ikyanya abagoma bagweti bagahagana naye, ali mu bahaniiriza ku buraakari bwage. E ma! Balya bagoma, ayamiri abarakariiri, anagweti agabayihoola.

³ Nahano, kundu ayamiri agweti agayigenderera, halikago ali mwene ubushobozi. Atali mu lekeerera banangora-mabi, si agweti agabahana. Ikyanya agweti agagenda, hali mu boneka imibangami neꞌbihuhuuta. Ishando zaage, ikyanya ziri mu tumuula ulukungu, luli mu boneka nga bibungu.

⁴ Ikyanya ali mu kyula, inyaaja neꞌnyiiji zinayami kama. Kiri neꞌndagiriro nyija zeꞌBashaani, na zeꞌmigazi yeꞌKarimeeri zinagubuuke. Noꞌtwaso tweꞌLebanooni, tunaholoke.

⁵ Hiꞌgulu lya Rurema, imigazi iri mu shagala, noꞌtugangazi tunajongoloke, tunanyerere. Ikihugo kiri mu jugumbana imbere lyage, kuguma na booshi ábatuuziri mwo.

⁶ Ikyanya Nahano ali mu shavura, nyandagi úwangaki labuka imbere lyage? Uburaakari bwage, ikyanya buli mu ba bukoli yasiri, nyandi úwangaki sigala? Uburaakari bwage, buli mu siriiza ngana-ngana. Kiri naꞌmaala, gagweti gagabereka imbere lyage.

⁷ Nahano ali mwija. Ikyanya abandu bali mu libuuka, bakwaniini batibitire imwage. Ikyanya bali mu múbiika kwoꞌmulangaaliro, ali mu kizi bahahala.

⁸ Haliko abagoma boohe, agweti agabalandiriza, halinde anabaminike. Ali mu yami bakumbulula nga mwijulire, halinde banaherere mu kihulu, lwoshi-lwoshi.

⁹ Abandu, ikyanya bagweti bagaagira igambi hiꞌgulu lya Nahano, ali mu yami basivya. Atagaaba niꞌgoorwa mbu ashubi bashulika ubwa kabiri!

¹⁰ Yabo bagoma bagaaba nga ábakoli lalusiri, banakizi bambaajira, banajigimbe nga kishungu-shungu kyumu kyeꞌmigenge, banasiriire lwoshi-lwoshi.

¹¹ E Ninaawi! Si mwami winyu agweti agayiji gira igambi libi hiꞌgulu lya Nahano! Ikyanya agweti agahanuulana, ali mu ba ashungisiri amabi naaho.

¹² Kundu kwokwo, Nahano adetaga kwokuno: «Kundu Abahasuriya bakoli luguusiri, si bagaahera, batanaki shubi boneka. E Bayuda! Kundu nâli kizi mùlibuza, leero ngamùleka.

¹³ Na kundu mwâli shwesirwi neꞌminyororo yabo, ngagitwisa, batanâye ki mùvindagaze.»

¹⁴ E Ninaawi! Keera Nahano akyula hiꞌgulu lyawe: «Mutâye ki bute abandi abaana, mbu banashubi yinikwa amaziina giinyu. Si mu ndaaro zeꞌmizimu yinyu, ngashaaza imigisi yoshi-yoshi. Bwo mukoli bihuusiri bweneene, ngweti ngamúhumbira ishinda.»