ALuka 1 - Firan NT Portions

Atumuŋghi

¹ Banet gbaraŋ karaŋ aton nkyɛŋ ko nnam shwak atak yit,

² kuse chik aneŋko baya ko ba tsa ba ti di tik tɔŋghɛna, mbam yes bafe kutɔŋ kukah kulejel.

³ Arɔneŋgha meŋ fɛl koyaŋ kyɛŋ ijel kuneh kutsami meŋ ne nde di kutijam maŋ nda karaŋghi aneŋko ba karaŋ nku, nwun agbaŋ anet meŋ aTiyofolos,

⁴ arɔko nwun tiren ya koyaŋ kyɛŋ ko nwun foss yes chini.

Batɔŋ kuwut aYohana ko anye ibatisma

⁵ Izen ko aHiridus ku yes agwom mben iJudiya, yir afiris kun ti se ko ba tu be aZakariya ko ane ikazumuŋ bafiris aAbijah. Abiniŋ aZakariya, aLizabet aku ne ichwaŋ aHaruna.

⁶ Mbam kusaŋ rok KUNOM chik, basaŋ rok gbik ntsii ko Adagbik nɔk chik.

⁷ Kɔn mbam kun ti be nanon wɔgh izaneŋko aLizabet ku yes amakuruk mbam ka bu kob.

⁸ Yir kunomi aZakariya kusaŋ nye kutomoŋ ngu kufe afiris atak karikunom,

⁹ ba ku tu kasa ikakyalam aneŋko kutomoŋ bafiris ku se, ati wɔrɔŋ ntsiŋ lejel atak karikunom Adagbik.

¹⁰ Izen kuwɔrɔŋ ntsiŋ lejela, banet gbaraŋ tak tusuŋ atasa basaŋ nassaŋ.

¹¹ Ajel ko ane arɔ Adagbik atak tɔl, ayeseŋ tsik ifam kubɔk nkyɔm kakyenye ku wɔrɔŋ ntsiŋ lejela.

¹² Seko aZakariya tu di, ate yebet, afossoŋ nyim.

¹³ Ne ajelli nye ngu yah, “Kɔn ti fok nyim wɔgh, aZakariya, KUNOM shan kunassaŋ nwuna. Abiniŋ nwun aLizabet bah wut arenn, nwun ban tu nɔk yɛrɛŋ aYohana.

¹⁴ Ngum bah yes kafahkakan nwun, aso kumenkafah nwun, banet gbaraŋ bah maŋ be kafahkakan arɔ kuwut ngu,

¹⁵ arɔko ngum bah yes agbanaŋ anushon Adagbik. Kɔn ngum ban ti sɔh nchi inabi wɔgh, ko yit kyɛŋ ko se nzɔkɔkɔk wɔgh. Ikabik Wɛsɛk ban tu hywɛn kuneh ikuwut ngu.

¹⁶ Ngum ban ti borokghi banet Iserela gbaraŋ arɔ Adagbik, KUNOM mba.

¹⁷ Ngum bah tseŋ anushon Adagbik atak ikabik aso kugyigyak ako aILiya, ngum ban ti tirik nafah badah arɔ nanon mba ngum ka tirik bafe chwe kugyigyak ba taŋ tass chik. Ngum bah te banet ti nywaŋ kusot mba arɔ kubɛh Adagbik.”

¹⁸ AZakariya rib ajel yah, “Nzi te anene iren yah kukoŋ bah te? Meŋ ba ku tsereŋ, nayɛh abiniŋ meŋ ne te maŋ fɛt.”

¹⁹ Ajel nye ngu yah “Meŋ nyes aGɛbrel. Meŋ nye kutomoŋ anushon KUNOM, ba ne ti tom arɔ nwun yah nda tɔŋ kukah kulejel.

²⁰ Arɔ kusaŋ nɔkchin nwuna, nwun siren kufɛh wɔgh, ideŋ kyɛŋ ban tak shwak shon nwun turuŋ tiren kufɛh.”

²¹ Seko banet saŋ tot aZakariya ya, ba nɔ kusab aton ikyɛt ko te ati rɔn atak karikunoma.

²² Seko ngum wuruk, atiren kufɛrɛŋ mba wɔgh. Mbam fuk yah KUNOM tu tɔl kubobos atak karikunoma. Arɔko akusaŋ taba nye has, atiren kufɛh wɔgh.

²³ Seko anghasaŋ kutomoŋ ngu ya asha ngu.

²⁴ Amintiriŋ azeŋgha aLizabet shan kafah, asot ari mpɛn toon.

²⁵ ALizabet nye yah “Adagbik ti fik nda shan kafah nnom nnaŋgha, inɔkkunom ti tun ntsim ate banet.”

Batɔŋ kuwut aYeso

²⁶ Atak kufɛn titat ikushan kafah aLizabetrha, KUNOM tom ajel ko yɛrɛŋ ngu yes aGɛbrel ati nɔk kutom arɔ kanamaŋ kajijeb ikuwɔb iNazaret atak iGalili,

²⁷ kanamaŋ kajijeb ko nkam kusaŋ shim aYusufu afe chwaŋ aDoda, ko yɛrɛŋ nka yes aMeri.

²⁸ Ajel kun ti tu karɔ nka anye nka yah, “Nda kilisi, nwun yes afe aweŋ! Adagbik se nwun.”

²⁹ AMeri sob kusab nkirit aton ikyɛt ko ajel tu tɔŋgha, atass aton kubik kukilimi.

³⁰ Ajel nye ngu yah, “AMeri, kɔn te fossoŋ nyim wɔgh, nwun sɛh kuroyɔm arɔ KUNOM.

³¹ Tesem ideŋ kyɛŋ! Nwun bah shan kafah, nwun te wut arenn, nwun ban tu nɔk yɛrɛŋ aYeso.

³² Abah yes agbanaŋ, ba kasaŋ tu yes aRenn Adarai KUNOM. KUNOM Adagbik bah tu nɔk igwom adah ngu aDoda,

³³ ngu yu bah ya igwom aton kari aYakubu ayɛyɛ. Igwom ngu bah se wallaŋ kugyeŋ.”

³⁴ AMeri rib ajel yah, “Kukoŋ bah te ne, ko meŋ ren ametek wɔgh ya?”

³⁵ Ajel nye aMeri ya yi ku ba se ane, “Ikabik Wɛsɛk se bɛh aton nwun, Ichwe Adarai bah ta hywɛn ako ywiywil. Kangon ka wɛsɛk ko nwun sak wutrha bah ban taŋgha tak be aRenn KUNOM.

³⁶ Agwa nwun aLizabet shan kafah atak kukob ngu, ngu ko banet tu be amakurukgha, abah ku bɛh kafah mpɛn titat.

³⁷ Wallaŋ ikyɛŋ ko KUNOM na ryat ku nye.”

³⁸ AMeri borokghi anye yah, “Meŋ nyes akwɔ Adagbik.” “Ɛi ku ti te aneŋko nwun tɔŋgha.” Ajel mu sot aburuk.

AMeri ti kili aLizabet

³⁹ Izen yama ya aMeri ti te hwarat atseŋ ati wɔt ikuwɔb arɔ ka hyweneŋ kunyi aJudiya, arɔ ko aZakariya aso aLizabet ti sot.

⁴⁰ Ati nɔ ari aZakariya ya akili aLizabetrha.

⁴¹ Seko aLizabet shan kukili aMeri ya, kangon ko ka se atak afah aLizabetrha tak kebek, Ikabik Wɛsɛk kun ti se aLizabetrha.

⁴² Izɔlɔs igbanaŋ anye yah, “Nwun yes afe aweŋ atak babiniŋ, aso kangon ko nwun bah wutrha.

⁴³ Ne ikyɛdi te meŋ nde sɛh aweŋ yoŋgha ko anyiniŋ Adagbik na bɛh ati ye ti nɔk kukili ya?

⁴⁴ Izen ko meŋ shan kukili nwuna, kangon atak afah meŋ tak kebek arɔ kafahkakan!

⁴⁵ Afe aweŋghu aya ko anɔkchin yah kufɛk ko Adagbik tu tɔŋ kusak shwak.”

Abom aMeri

⁴⁶ AMeri nye yah, Kafah meŋ nesek Adagbik igbanaŋ,

⁴⁷ ikabik meŋ mbe kafahkakan arɔ KUNOM, afekuhywet meŋ.

⁴⁸ Arɔko ngum ti gaŋ kafah imeŋ arohywe akwɔ ngu. Koyaŋ zam bah saŋ ti yes afe aweŋ,

⁴⁹ arɔko agbaŋ KUNOM ti nye nkyɛŋ lejel gbom, yɛrɛŋ ngu yes wɛsɛk.

⁵⁰ Kutossyɔm ngu se aton baya ko ba be nyim ngu, koyaŋ zam.

⁵¹ Ngum tɔl kugyigyak ngu nkyɛŋ ko anye nna, ngum roh baya ko ba nyinɛsɛ chwe atak kutass nafah mba.

⁵² Ngum tun igwom bagwom ngum ne nɔk baya ko ba meni ichwe mba.

⁵³ Ngum nɔk baya ko ba se kpyak nkyɛŋ lejel ngum ne roh baferyat tata.

⁵⁴ Nkum fik akwɔ nku Iserela, ati raba kutossyɔm

⁵⁵ aton aIbrahim aso nanon ngu ayɛyɛ, ako aneŋko aku tɔŋ badah yitrha.

⁵⁶ AMeri sot chichɛk mpɛn tat ari aLizabetrha aruŋ shangu.

ALizabet wut aYohana

⁵⁷ Seko izen ko aLizabet se wut nye, ngum wut arenn.

⁵⁸ Badah ngu aso bagwa ngu foss yah Adagbik tu tɔl agbaŋ kutossyɔm, mbam tu fikghi kafahkakani.

⁵⁹ Ikunom afe nkara mbam bɛh ku nywaŋ kangoni, mbam busaŋ wɔ tak nɔk yɛrɛŋ atek nka aZakariya,

⁶⁰ ne anyiniŋ ngoni fɛrɛŋ anye yah, “Kwa! Ba se nye nka aYohana.”

⁶¹ Ba nye ngu yah “Wallaŋ aya ko abe idama yɛrɛŋ atak bagwa nwuna.”

⁶² Mbam mu te atek has, arɔko mbam kusaŋ shim kuren yɛrɛŋ ko ashim ana nɔk kangoni.

⁶³ AZakariya rib kubɛbɛt, arɔŋ te zirit arɔko akaraŋ “Iyɛrɛŋ nka yes aYohana”

⁶⁴ Azuzukghi ngum tsa kufɛh, asaŋ toroŋ KUNOM.

⁶⁵ Badah ngu gbik te nyim. Koyaŋ ngumi ahyweneŋ aJudiya saŋ fɛh aton gbik nnaŋ nkyɛŋgha.

⁶⁶ Gbik anet ko afoss kukoŋ kukah ya asaŋ atass afah ngu atoni, asaŋ risim, “Ikyɛdi kakaŋ kangon bah te nka?” Arɔko kubɔk Adagbik ku se aton nka.

Abom aZakariya

⁶⁷ Atek nka aZakariya kun ti hywa Ikabik Wɛsɛk amu tɔŋ idɔk,

⁶⁸ “Yit te toroŋghɛn Adagbik, KUNOM Iserela arɔko nkum bɛh ku ta sheseŋ banet nku.

⁶⁹ Ku tighi nɔkghɛn afekuhywet atak chwaŋ akwɔ nku aDoda.

⁷⁰ Ako aneŋko badidɔk ku wɛsɛk ku tɔŋ kuneh akak ayɛyɛ ya,

⁷¹ kuhywet arɔ bafefub yit aso baya ko ba tik shimɛn wɔgh

⁷² ase tossyɔm badah yit aka ti raba kutakshimmi ku wɛsɛk,

⁷³ kurob ko aku anye adah yit aIbrahim mi,

⁷⁴ yah asik hywetrhɛn atak kubɔk bafefub yit, arɔko yit su yan mben wallaŋ nyim

⁷⁵ atak ku wɛsɛk yit taŋ rokghɛn kufɛk nku chik atak kusot yit azatse ya.

⁷⁶ Nwuna, kangon meŋ, babaŋ ta be adidɔk Adarai, arɔko nwun yu bah yes aya ko asi nywaŋ Adagbik yi ataren,

⁷⁷ nwun bah nɔk banet nku kufuk aton kutakhywet atak kuhana afɔt mba

⁷⁸ arɔ kutɔl kutossyɔm KUNOM yit, ku wuruk yinom bah ne icho ku ti bɛh arɔ yit

⁷⁹ ku bah rom aton baya ko ba se atak kugbyik ywiywil kukuu, abah tɛnɛs nanen yit ati wɔri yit ataren kumenkafah.”

⁸⁰ Kangoni rasak, ka te kugyigyak atak ikabik, nkam sot atak kayitkakot ka na ti tu izen ko ka tak tɔl kpas arɔ banet Iserela.